Amnoonanne Timaaro
1Issi wode haysada hanis. Dawita na7aa Abeseloomes Timaaro geetetiya issi mala lo77o micha de7awusu. Dawita na7ay Amnooni Timaaro dosis.2Amnooni ba michiw Timaaro dosida gisho iyo qopishe daro gilqis. Iya geela7o gidida gisho iyo aykoka oothanaw danda7etonnaba iyaw daanis.3Shin Amnoonas Dawita ishaa Saama na7aa Iyonadaaba geetetiya laggey de7ees; Iyyonadaabi daro eca asi.4Iyyonadaabi, “Neeni kawo na7a gidashe wonta wonta ayis gilqay? Neeni taw ayis odikii?” yaagidi Amnoona oychis. Amnooni, “Ta ishaa Abeseloome michiw Timaaro taani dosas” yaagis.5Iyyonadaabi, “Hargetiya asada hanada hiixan zin7a. Ne aaway nena be7anaw yaa wode, ‘Ta michiya Timaara yada taw miyaba immo; taani iyo be7ishin ta sinthan kathada tana barso’ yaagada oycha” yaagis.6Amnooni hargetida asada hanidi hiixan zin7is. Kawoy iya be7anaw yaa wode Amnooni, “Ta michiya Timaara yada, ta be7ishin ta sinthan uythi uukada tana ba kushera barso” yaagis.7Dawiti, kawo gadhon de7iya Timaariko kiittidi, “Ne ishaa Amnoona soo bada iyaw kathi katha” yaagis.8Timaara ba ishaa Amnoona soo basu; he wode I hiixan zin7is. Timaara guutha dhiille munuqada Amnooni be7ishin uythi uukasu.9Timaara uythaa bashepe kessada iyaw aathasu; shin I moonna ixis. Amnooni, “Asa ubbaa kare kessite” yaagin, asa ubbay iya matape keyis.10Hessafe guye, Amnooni, “Taani ne kushepe maana mela kathaa haa qol7a ekada ya” yaagis. Timaara ba uukida uythaa ekada, ba ishaa Amnoona sinthe shiishasu.11Timaara kathaa iyako shiishiya wode iyo oykidi, “Ta miche, haaya! Taara zin7a” yaagis.12Iya, “Ta ishaw, akay hanenna! Tana wolqanthofa! Haysa melabay Isra7eelen hani erenna; haysa mela borsoba oothofa.13Ta pokuwa taani waatada genthanaw danda7iyana? Qassi neka Isra7eele giddon kawusha asi gidana. Hayyana kawa oycha; taani nena gelanaysa I diggenna” yaagasu.14Shin I iyo si7onna ixis. I wolqaama gidiya gisho, iyo wolqan oykidi iissis.15Hessafe guye, Amnooni iyo daro ixis; kase iyo dosidaysafe aathidi ixis. Amnooni, denda, “Keya! Keyada ba!” yaagis.16Iya, “Neeni tana keyada ba geysi kase ne ta bolla oothida iitaape aadhees” yaagasu. Shin I iyo si7onna ixis.17Amnooni ba aylliya xeegidi, “Ha maccasiw ta sinthafe kessa; iyo kare kessada wulaa gorda” yaagis.18Aylley iyo kare kessidi wulaa gordis. Geela7o gidida kawo macca nayti ma7iya alleeqo ma7o ma7asu.19Timaara bido ba huuphen qolada, ba ma7ida alleeqo ma7uwa daakada; ba huuphiya oykada, waaso goochashe basu.20I ishaa Abeseloomey iyo be7ida wode, “Ne ishay Amnooni nena iissidee? Ta miche, neeni ha77i si77i ga. I ne ishaa; ha odaa ne ulon oykofa” yaagis. Yaatin, Timaara azzanashe, asan keyonna ba ishaa Abeseloome son de7asu.21Kawoy Dawiti ha odaa si7ida wode daro yilotis.22Abeseloomey Amnoonako camma mal7a pogibeenna. Ba michiw Timaaro iissida gisho Amnoona morkis.Abeseloomey Amnoona Wodhis
23Nam7u laythafe guye, Efreema zawa matan Haxoora geetetiya bessane Abeseloomey dorsa ikise meedees. Kawa adde nayti ubbay he bessaa yaana mela Abeseloome enta xeegis.24Abeseloomey kawako bidi, “Taani ne aylley ta dorsata ikisiya meedisayis; nenne ne moorinnati nuura yedherketii?” yaagis.25Kawoy, “Akay, ta na7aw! Nu ubbay biiko, new tooho gidana” yaagis. Abeseloomey kawa daro shoobbinka kawoy boonna ixis; shin Abeseloome anjis.26Abeseloomey, “Neeni boonna ixiko, ta ishaa Amnooni nuura boo” yaagis. Kawoy, “I neera ayis bii?” yaagis.27Shin Abeseloomey shoobbidi aggonna ixin, Dawiti Amnoonanne ba adde nayta iyara yeddis.28Abeseloomey ba aylletako, “Amnooni woyne uyidi mathotiya wode taani hintena, ‘Amnoona shocite’ yaagada kiittiya wode iya wodhite. Yayyofite! Hintena kiittey tana. Minnite! Xaalite!” yaagidi kiittis.29Abeseloome aylleti I kiittidaysada Amnoona wodhidosona. Hessafe guye, kawa adde nayti ubbay dendidi, banta baquluwa baquluwa toggidi baqatidosona.30Enti buroo oge bolla de7ishin, “Abeseloomey kawa nayta ubbaa wursis; entafe issoyka attibeenna” geetetiya worey Dawita gakis.31Kawoy dendi eqidi, azzanidi, ba ma7uwa daakidi biittan zin7is. Iya aylleti ubbay banta ma7uwa daakidi, iya matan eqidosona.32Dawita ishaa Saama na7ay Iyyonadaabi, “Ta godaw, kawo nayti ubbay hayqidosona gada qopofa; Amnoona xalaali hayqis. Amnooni ba michiw Timaaro iissida gallasape doomin, Abeseloomey iya bolla oothanaw qopidabay hanis.33Hiza hayqiday Amnoona xalaala gidiya gisho, ‘Kawa adde nayti ubbay hayqidosona’ giya woriya kawoy tuma goopo” yaagis.34He wode Abeseloomey baqatis. Naagiya addey dhoqu gidi xeelliya wode wuloha baggara de7iya ogiyara dere lanqiya oykidi daro asay yeysa be7idi kawas odis.35He wode Iyyonadaabi, “Heko, taani ne aylley odidaysada kawa adde nayti yidosona” yaagis.36I odi wursiya wode kawa adde nayti gelidi banta qaala dhoqu oothidi waassidosona. Qassi kawoynne iya moorinnati ubbay yibbata yeeho yeekidosona.37Abeseloomey baqatidi, Geshura kawo gidida Amhuda na7aa Talmayako bis. Shin kawoy Dawiti ba na7aas daro gallas yeekis.38Abeseloomey baqatidi Geshura biitta bidaape guye yan heedzu laythi de7is.39Kawoy Dawiti Amnoona hayquwan gakida azzaniyape minnida gisho, Abeseloome be7anaw laamotis.