1Awarni aya imsar, aqa ajeǧid n ayt n Ɛammun immut. Mmis Ḥanun idweř d ajeǧid deg wemcan nnes.2Xenni inna Dawud: “Necc xseɣ ad ssecneɣ tamexsiwt icewwaren i Ḥanun, mmis n Naḥac, am mammec i d ayi isscen babas tamexsiwt nnes icewwaren.” Dawud issekk ireqqasen ḥima ad t iɛezza x řmewt n babas s ufus n imsexxaren nnes u imsexxaren n Dawud iwḍen ɣar temmurt n ayt n Ɛammun.3Xenni nnan řḥukkam n ayt n Ɛammun i sidi nsen Ḥanun: “Ma ixs Dawud s tidett ad iweqqar babac di tiṭṭawin nnec, umi dd-issekk netta imsexxaren maḥend ad cek ɛezzan? Ma war dd-issekk Dawud imsexxaren nnes ɣarek, ḥima ad arzun di tendint, ad ssmunen řexbar uca xenni ad tt arren war teǧi d nettat?”4Xas uca iṭṭef Ḥanun imsexxaren n Dawud, iḥeff asen azyen zi tmart u iqess asen azyen n warruḍ ař ḍeffar, uca issekk i-ten.5Umi xebbaren aya i Dawud, issekk asen ireqqasen, minzi nitni tuɣa ttseḍḥan ixef nsen aṭṭas. Inna ujeǧid: “Qqimem di Ariḥa ař dd ɣa temɣar tmart nwem, xenni ad dd-tdewřem.”6Umi ẓrin ayt n Ɛammun belli nitni tuɣa ssarzgen ixef nsen ɣar Dawud, ssekken ayt n Ɛammun ireqqasen u cran zeg ayt n Aram zi Bayt-Raxub u zeg ayt n Aram zi Ṣuba ɛicrin-ařaf n yeryazen x iḍaren, u zeg ujeǧid n Maɛka ařef n yeryazen u zeg yeryazen n Ṭub tenɛac-ařaf n yeryazen.7Umi isřa Dawud aya, issekk netta Yuwab s marra řɛeskar nnes, ayt n bu-teɣruḍt.8Ayt n Ɛammun ffɣen-dd u sedden ixef nsen i umenɣi ɣar wadaf n tewwart n tendint, maca ayt n Aram n Ṣuba d Raxub d yeryazen n Ṭub d Maɛka tuɣa aten s yixef nsen deg iyyar.9Umi iẓra Yuwab, aqa amenɣi ixeẓẓar i-ten deg uɣembub ɣar zzat u ɣar ḍeffar, ixḍar netta zi marra inni ittwafarzen di řɛeskar n Israil uca issbedd i-ten i umenɣi ajemmaḍ n ayt n Aram.10Min iqqimen n řgens igga i-ten sadu ufus n umas Abicay, wenni ten issbedden ajemmaḍ n ayt n Ɛammun.11Inna netta: “Mařa Aram ijhed xafi, xenni as-dd, fekk ayi! Mařa ayt n Ɛammun jehden xak, xenni ad dd-aseɣ ad cek fekkeɣ.12Iři d aryaz u ad niři d iryazen di ṭṭweɛ n řgens nneɣ u di ṭṭweɛ n tneddam n AREBBI. Ejj SIDI ad igg min iǧan d lemliḥ di tiṭṭawin nnes.”13Xenni iqarreb-dd Yuwab d řgens i ɣares iǧan i umenɣi ak-d Aram uca ina ṭṭfen di tarewřa zzat i wudem nnes.14Umi ẓrin ayt n Ɛammun, aqa ayt n Aram arewřen, ṭṭfen uřa d nitni di tarewřa zzat i wudem n Abicay uca iwḍen ɣar tendint. Yuwab iɛqeb awarni i umenɣi ak-d ayt n Ɛammun uca yiweḍ ɣar Urcalim.15Umi ẓrin ayt n Aram aqa nitni ttwaɣeřben zzat i wudem n Israil, nnyarwen twařa nneɣnit.16Uca Hadad-Ɛazar issekk ireqqasen, ijja ad dd-asen ayt n Aram inni izeddɣen x ujemmaḍ n iɣzar n Lfuraṭ uca nitni usin-dd ɣar Ḥilam. Cubak, akumandar n řɛeskar n Hadad-Ɛazar, iffeɣ zzat i wudem nsen.17Umi ittwanna aya i Dawud, issmun netta marra Israil, iẓwa L’Urdun, yusa-dd ɣar Ḥilam. Ayt n Aram sedden ixef nsen i umenɣi qibač i Dawud u mmenɣen akides.18Ayt n Aram arewřen zzat i wudem n Israil u Dawud iqḍa x sebɛa-mya n ikarruten n umenɣi d arebɛin-ařef n imnayen n ayt n Aram. Ɛawed iwta netta Cubak, akumandar n řɛeskar nsen, ařami immut din.19Umi ẓrin marra ijeǧiden nni tuɣa ittraḥen ak-d Hadad-Ɛazar, belli aqa nitni twaɣellben zzat i wudem n ayt n Israil, ggin nitni řehna ak-d Israil u sexxaren as. Ayt n Aram ggʷeden ad fekken ayt n Ɛammun twařa nneɣnit.