ሱናማ ማጫስዉ
1ኤልስ፥ ሀይቅዳ እ ናኣ ፓዳ ማጫስዉ፥ “ነ ሶ አሳ ኤካዳ ሀይሳፈ ባዳ ኔኒ ዳንዳእያ በሳን አዉንካ ደአ። ጎዳይ ላፑን ላይ ኮሻ ሀ ቢታ ቦላ የድስ” ያግስ።2ማጫስያ ኤልስ ኦድዳይሳዳ ባ ሶ አሳራ ባዳ፥ ፍልስፄመ ቢታን ላፑን ላይ ደአሱ።3ላፑን ላይ ዉርሰን ማጫስያ ፍልስፄመ ቢታፈ ስማሱ። ባ ኬነ ባ ጋድያ ኦይቻናዉ ካዋኮ ባሱ።4ሄ ዎደ ካዎይ ፆሳ አስ ግድዳ ኤልሳ አይልያ ግያዛራ ኦደትሸ፥ “ኤልስ ኦዳ ግታ ኦሶ ኡባ አነ ታዉ ኦዳ” ያግስ።5ኤልስ ሀይቅዳ ናኣ ዋትድ ፓዳኮ፥ ግያዝ ካዋስ ኦድሽን፥ ሄኮ፥ ኤልስ እ ናኣ ፓዳ ማጫስያ ባ ኬነ ባ ጋድያ ኦይቻናዉ ያሱ። ግያዝ፥ “ታ ጎዳዉ፥ ካዋዉ፥ ማጫስያ ሀናሹ፤ ኤልስ ሀይቆፐ ፓዳ እ ናአይካ ሀይስሽ” ያግስ።6ካዎይ ማጫስዉ ኦይችን፥ እያዉ ኦዳሱ። ሄሳ ግሾ፥ ካዎይ ሀላቃ ፄግድ፥ “ሀ ማጫሴባ ግድዳ ኡባነ እያ አጋ ብዳ ዎድያፐ ሀች ጋካናዉ እ ጋደን ሞክዳ ኡባ እዉ ዛራ” ያግድ ኪትስ።7ኤልስ ዳማስቆ ካታማ ብድ ጋክያ ዎደ፥ ሶረ ካዎይ ዎልደ-አዳር ሳከቴስ። እ፥ “ፆሳ አስ ሀይሳ ይስ” ግያ ዎረ ስእስ።8ካዎይ አዛሄላኮ፥ “እምያባ ኤካዳ ፆሳ አድያራ ጋሄታናዉ ባዳ፥ ‘ታኒ ሀ ሀርግያፈ ፓፃኔ?’ ያጋዳ ጎዳ ኦይቻ” ያግስ።9ሄሳ ግሾ፥ አዛሄል ዳማስቆን ደእያ ዱማ ዱማ ቆሞ ሙሩታፐ ኦይታሙ ግማለን ጫንድ፥ ኤልሳራ ጋሄታናዉ ብስ። ኤልሳ ስንን ኤቅድ፥ “ነ ናአይ አራመ ካዎይ ዎልደ-አዳር፥ ‘ታኒ ሀ ሀርግያፈ ፓፃኔ?’ ያግድ፥ ነና ኦይቻናዳ ታና ኔኮ ኪትስ” ያግስ።10ኤልስ አዛሄላኮ፥ “ኔኒ ባዳ እያኮ፥ ‘ቱማ ኔኒ ፓፃና’ ያጋ። ሽን እ ቱማ ሀይቃናይሳ ታና ጎዳይ በስስ” ያግስ።11አዛሄል ዬላታና ጋካናዉ፥ ኤልስ እያ ትሽ ኦድ ፄልድ ዬክስ።12ያትን፥ አዛሄል፥ “ታ ጎዳይ አይስ ዬኪ?” ያግድ ኦይችስ። ኤልስ፥ “ኔኒ እስራኤለ አሳ ቦላ ኦና ኢታባ ታኒ ኤርያ ግሾ ዬካይስ። ኤንታ ሚፃ ኔኒ ታማን ፁጋና፤ ኤንታ ፓንታ ኔኒ ማሻን ዎና። ቃስ ኤንታ ዮጋ ናይታካ ኔኒ ሹቻን መንረና፤ ኤንታ ቃን ማጫሳታ ኡሉዋ ኔኒ ዳካና” ያግድ ዛርስ።13አዛሄል ዛሪድ፥ “ታኒ ነ አይለይ፥ ፓና ካናይ፥ ሀይሳ መላ ግታባ ዋታዳ ኦናዉ ዳንዳእያና?” ያግስ። ኤልስ ዛሪድ፥ “ኔኒ አራመ ቢታን ካዎታናይሳ ታና ጎዳይ በስስ” ያግስ።14ሄሳፈ ጉየ፥ አዛሄል ኤልሳፈ ሻከትድ፥ ባ ጎዳኮ ስምስ። ዎልደ-አዳር፥ “ኤልስ ነና ዎይግዴ?” ያግድ ኦይችስ። አዛሄል፥ “ኔኒ ቱማ ፓፃና” ያግስ።15ሽን ዎንተ ጋላስ አዛሄል ቡሉኮ ኤክድ፥ ሃን ሙክድ፥ ካዋ እያራ ቱጭን፥ ካዎይ ሀይቅስ። አዛሄል እያ በሳን ባዉ ካዎትስ።ይሁዳ ካዋ እዮራማ
16አካባ ናአይ፥ እስራኤለ ካዎይ እዮራም ካዎትዳ እቻሻን ላይን፥ ይሁዳ ካዋ እዮሳፈፃ ናአይ እዮራም ይሁዳን ካዎትስ።17እዮራም ካዎትያ ዎደ እያዉ ላይይ ሀስታማነ ናምአ፤ እ የሩሳላመን ሆስፑን ላይ ካዎትስ።18እዮራም አካባ ናእዉ ማቾ ኤክዳ ግሾ፥ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንን ኢታባ ኦስ።19ግዶሽን፥ ባ አይልያ ዳዊታ ግሾ፥ ጎዳይ ይሁዳ ይሳናዉ ኮይቤና፤ ዳዊታ ኮቻይ መርናዉ ካዎታናዉ ደኤይሳ ጎዳይ ኡፋይሳ ቃላ እሚስ።20እዮራም ካዎትዳ ዎደ፥ ኤዶመ አሳይ ይሁዳ ካዋ ቦላ ማካልድ፥ ባንታዉ ካዎ ካዎይዶሶና።21ሄሳ ግሾ፥ እዮራም ባ ፓራ ጋረታ ኡባራ ፃእራ ጌተትያ በሳ ብስ። ኤዶመ አሳት እያነ እያ ፓራ ጋረታ ሀላቃታ ተቅዶሶና፤ ሽን እዮራም ቃማ ደንድድ፥ ከስ ኤክድ ብስ። እያ ኦላንቾት ባቃትድ፥ ጉየ ሶ ስምዶሶና።22ሄ ዎደፐ ዶምድ ሀች ጋካናዉ፥ ኤዶመ አሳይ ይሁዳ አሳስ ሃረትቦኮና። ልብና አሳይ ቃስ ሄ ዎደ ማካልስ።23እዮራም ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ።24እዮራም ሀይቅድ፥ ባ ማይዛታን ጋሄትስ። ባ ማይዛ ዳዊታ ካታማን ሞገትስ፤ እያ በሳን እያ ናአይ አካዝያስ ካዎትስ።ይሁዳ ካዋ አካዝያሳ
25አካባ ናአይ፥ እስራኤለ ካዎይ እዮራም ካዎትዳ ታማነ ናምአን ላይን፥ ይሁዳ ካዋ፥ እዮራማ ናአይ አካዝያስ ይሁዳን ካዎትስ።26አካዝያስ ካዎትዳ ዎደ፥ እያዉ ላይ ላታማነ ናምአ፤ እ የሩሳላመን እስ ላይ ካዎትስ። እያ አየ ሱንይ ጎቶሎ፤ እያ እስራኤለ ካዋ ኦምራ ናኣ ናእዉ።27እ ኤንታዉ ቦሎ ግድዳ ግሾ፥ አካባ ሶ አሳ ኦግያን ሄመትስ፤ አካባ ሶ አሳይ ኦዳይሳዳ፥ እ ጎዳ ስንን ኢታባ ኦስ።28አካዝያስ አራመ ካዋ አዛሄላራ ጋላዳን ደእያ ራሞታ ካታማን ኦለታናዉ ብድ፥ አካባ ናኣ እዮራማራ እስፈ ብን፥ አራመ አሳት እዮራማ ጫድዶሶና።29እዮራም አራመ ካዋ አዛሄላራ ኦለትያ ዎደ፥ አራመ አሳት ጫድዳ ጫቻፈ ፓፃናዉ እዝራኤለ ስምስ። እዮራማ ናአይ፥ ይሁዳ ካዎይ አካዝያስ፥ ጫደትዳ አካባ ናኣ እዮራማ ኦይቻናዉ ዱገ እዝራኤለ ብስ።