ካዋ ህዝቅያሳ ፓፁዋ
1ሄ ዎደ ካዎይ ህዝቅያስ ሀርግድ፥ ሀይቃናዉ ማትስ። አሞፀ ናአይ ናበይ እሳያስ እያኮ ብድ፥ “ጎዳይ፥ ‘ኔኒ ነ ሀርግያፈ ፓፃካ፤ ነ ሀይቃና፤ ሄሳ ግሾ፥ ነ ኬ ጊግሳ’ ” ያግስ።2ህዝቅያስ ጎዳኮ ስሚድ፥ ፆሳ ዎስስ።3“አቤት ጎዳዉ፥ ታኒ ነ ስንን ቱማተን፥ ኩመ ዎዛናን ሄመትዳይሳነ ነና ኡፋይስያባ ኦዳይሳ ኔኒ ቆፓና መላ ታኒ ነና ዎሳይስ” ያግድ፥ ዳሮ ጫመትድ፥ ዬክድ ዎስስ።4እሳያስ ካዋ ስንፈ ከይድ፥ ካዎ ጋ ዳባባ ካንድ ቦና ደእሽን፥ ጎዳ ቃላይ ሀይሳዳ ያግሸ እያኮ ይስ።5“ጉየ ስማዳ ባዳ ታ አሳ ካለያ ህዝቅያሳስ ሀይሳዳ ያጋዳ ኦዳ። ጎዳይ፥ ነ ማይዛ ዳዊታ ፆሳይ ሀይሳዳ ያጌስ፤ ‘ታኒ ነ ዎሳ ስአስ፤ ነ አፉ በአስ። ሄኮ፥ ታኒ ነና ፓና፤ ሄ ጋላሳፐ ጉየ፥ ኔኒ ፆሳ ኬ ባና።6ነ ላይ ቦላ ታኒ ነዉ ታማነ እቻሹ ላይ ጉጃና። ታኒ ነናነ ሀ ካታማ አሶረ ካዋ ኩሸፐ አሻና። ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማስ ኦለታዳ አሻና’ ያጌስ” ያግስ።7እሳያስ፥ “ባላሰ ቴራ ዳፅድ፥ እያ ክፃ ቦላ ዎተ፤ እ ፓፃና” ያግስ።8ህዝቅያስ እሳያሳ፥ “ጎዳይ ታና ፓናይሳነ ታኒ ሄን ጋላስ ፆሳ ኬ ባናይሳስ ማላታይ አይቤ?” ያግድ ኦይችስ።9እሳያስ፥ “ጎዳይ ባ ግዳ ቃላ ፖላናዉ ነዉ ማላታ እማና። ህዛ ኔኒ ሀይሳታፐ አዉሳ ዶራይ? ኩያይ ታሙ ደ ስን ባና መላ ኮያዬ? ታሙ ደታ ጉየ ባና መላ ኮያይ?” ያግድ ኦይችስ።10ህዝቅያስ፥ “ኩያይ ስን ባናይስ መተና፤ ኩያይ ጉየ ስማናዳ ኦ” ያግስ።11ናበይ እሳያስ ጎዳ ዎስን፥ ጎዳይ ካዎይ አካዝ ግምብስዳ ደ ቦላ ሸምፕዳ ኩያይ ታሙ ደ ጉየ ዛርስ።ባብሎነፐ ኪተትዳ አሳታ
12ሄ ዎደ ባልዳና ናአይ፥ ባብሎነ ካዎይ፥ ማሮዳክ ባልዳን ህዝቅያስ ሀርግዳይሳ ስእዳ ግሾ፥ ዳብዳበነ እሞታ ህዝቅያሳስ የድስ።13ህዝቅያስ ኪተትድ ይዳ አሳታ ሞክስ። ባ ሻሎ ምንጅያ ኬን ደእያ ብራ፥ ዎርቃ፥ ሳዉዋ፥ አልኦ ዛይትያ፥ ባ ኦላ ሚሽያነ ባ ሻሎ ምንጅያ ኬን ደእያባ ኡባ ኤንታ በስስ። ባ ሶን ዎይኮ ባ ጋን ደእያባ ኡባፈ ህዝቅያስ ኤንታ በሶና አግዳባይ አይብካ ባዋ።14ናበይ እሳያስ ካዋ ህዝቅያሳኮ ብድ፥ “ሀ አሳት ዎይግዶና? ኤንቲ አዉፐ ይዶና?” ያግድ ኦይችስ። ህዝቅያስ፥ “ኤንቲ ታኮ ሃሆ ቢታፈ፥ ባብሎነፐ ይዶሶና” ያግስ።15እሳያስ፥ “ኤንቲ ነ ሶን አይ አይ በእዶና?” ያግስ። ህዝቅያስ፥ “ኤንቲ ታ ጋን ደእያ ኡባ በእዶሶና፤ ታ ሻሎ ምንጅያ ኬን ደእያባፐ ታኒ ኤንታ በሳቦናባይ ባዋ” ያግስ።16እሳያስ ህዝቅያሳኮ፥ “ጎዳይ ግያባ ስአ።17‘ሄኮ፥ ነ ጋን ደእያባ ኡባይነ ነ ማይዛት ሀች ጋካናዉ ሺሽዳባ ኡባይ ድኤትድ፥ ባብሎነ ቢታ ባና ጋላስ ያና፤ እያፐ አይብካ አተና።18ቃስ ነዉ የለታና፥ ነ አሾነ ነ ሱ ግድዳ ነ አደ ናይት ድኤትድ ብድ፥ ባብሎነ ካዎ ጋን ሹፋ ግድድ ኦና’ ” ያግስ።19ህዝቅያስ ዛሪድ፥ “ኔኒ ኦድዳ ጎዳ ቃላይ ሎኦ” ያግስ። ህዝቅያስ፥ “ታኒ ደእዳ ላይን ሳሮይነ ዎፓተ ዳና ግደነ” ያግድ ቆፕስ።ህዝቅያሳ ሀይቁዋ
20ህዝቅያስ ሀንዳ ሀራባይ፥ እያ ምኖተይነ ሃ ዜርድ፥ ቢታ ግዶራ ሃ ካታማ ገልስዳባይ ይሁዳ ካዎታ ታርከ ማፃፋን ፃፈትስ።21ህዝቅያስ ሀይቅድ፥ ባ ማይዛታን ጋሄትስ፤ እያ በሳን እያ ናአይ ምናሰይ ካዎትስ።