Read 2 ካዎታ ማፃፋ 19

2 ካዎታ ማፃፋ19gof_etw

ህዝቅያስ እሳያሳ ዞረ ኦይችስ

¹ካዎይ ህዝቅያስ ሄሳ ስእዳ ዎደ፥ ባ ማኡዋ ዳክድ፥ ካዮ ማኦ ማእድ፥ ፆሳ ኬ ገልስ።²ካዎ ጋ አዋተን አይስያ ኤልያቄም፥ ዋና ፃፈይ ሳምናስነ ጭማ ካህነት ካዮ ማኦ ማእድ፥ አሞፀ ናኣ ናብያ እሳያሳኮ ባና መላ ኪትስ።³ኤንቲ እሳያሳኮ ብድ፥ “ህዝቅያስ ሀይሳዳ ያጌስ፤ ‘ሀች ጋላሳይ መቶ ጋላስ፥ ሴራ ጋላስነ ዬላ ጋላስ። ሄስካ ናእ የለታናዉ ዎደይ ጋክን፥ ባናካዳ የላናዉ ዎልቅ ይዳ ማጫሳ መላ።⁴ደኦ ፆሳ ጫያና መላ፥ እያ ጎዳይ፥ አሶረ ካዎይ፥ ኪትዳ ቶራ ሞጮና ቃላ ኡባ፥ ጎዳይ ነ ፆሳይ ስኦና አገና። ቃስ ጎዳይ፥ ነ ፆሳይ ሄ ስእዳ ቃላ ጋሶን እያ ሴሮና አገና። ሄሳ ግሾ፥ ኑ አሳ ግዶፈ ፓላህድ አትዳይሳታስ ዎሳ’ ” ያግዶሶና።⁵ካዋ ህዝቅያሳ አይለት እሳያሳኮ ብዳ ዎደ፥⁶እሳያስ ኤንታ ሀይሳዳ ያግስ፤ “ህንተ ጎዳስ ሀይሳዳ ያግድ ኦድተ፤ ‘አሶረ ካዋ አይለት ታና ጫይሽን፥ ኔኒ ስእዳ ጫሻ ቃላስ ያዮፋ።⁷ሄኮ፥ ታኒ እያ ግዶ እስ አያና የዳና፤ እ ሄ ዎርያ ስእድ ባ ቢታ ስማና። እ ባ ቢታ ብድ፥ ያን ማሻን ሀይቃናዳ ኦና’ ” ያግስ።⁸አሶረ ካዎይ ላክሶ ካታማፐ ደንድድ ብዳይሳ አሶረታ ቶራ ሞጮናይ ስእድ፥ ጉየ ስሚድ ካዎይ ልብና ካታማን ኦለተይሳ ደምስ።⁹ካዎይ ሳናክሬም፥ “ሄኮ፥ ቶጰ ካዎይ ትርሃቅ ነና ኦላናዉ ይስ” ግያ ዎርያ ስእድ፥ ህዝቅያሳስ ሀይሳዳ ያግድ ኪትስ።¹⁰“ይሁዳ ካዋዉ ህዝቅያሳ፥ ኔኒ አማነትያ ፆሳይ፥ ‘የሩሳላመይ አሶረ ካዋ ኩሸን ገለና’ ያግድ ጭሞፎ።¹¹አሶረ ካዎት ቢታ ኡባ ይስድ፥ ኦዳባ ኔኒ ስአዳሳ። ያትን፥ ኔኒ አታና ዳኒ?¹²በን ታ ማይዛት ይስዳ ቢታ ፆሳት፥ ሄሳትካ፥ ጎዛና፥ ካራነነ ራፌሳ ቢታ ፆሳትነ ታላሳራን ደእያ ኤደነ ፆሳት ሄ ቢታ ዮፐ አሽዶና?¹³ሀማታ ካዎይ፥ አርፋዳ ካዎይ፥ ሳፋርዋይማ ካዎይ፥ ሄና ካዎይነ እዋ ካዎይ አዉን ደኦና?” ያግድ ኪትስ።¹⁴ህዝቅያስ ዳብዳብያ ኪተትዳ አሳፐ ኤክድ ናባብስ። ዳብዳብያ ፆሳ ኬ ኤፍድ፥ ጎዳ ስንን ምጭስ።¹⁵ያትድ፥ ጎዳ ሀይሳዳ ያግድ ዎስስ፤ “አቤት ጎዳዉ፥ ክሩበታፐ ግዶን ኡትያ እስራኤለ ፆሳዉ፥ ሳኣ ካዎተታ ኡባ ቦላ ነ ፃላል ፆሰ፤ ሳሉዋነ ሳኣ ኔኒ መዳሳ።¹⁶አቤት ጎዳዉ፥ ነ ሀይ ሃ ዛራዳ ስአ። አቤት ጎዳዉ፥ ነ አይፍያ ዶያዳ ፄላ። ነና፥ ደኦ ፆሳ ጫያናዉ ሳናክሬም የድዳ ቃላ ስአ።¹⁷አቤት ጎዳዉ፥ አሶረ ቢታ ካዎት ካዎተታነ ኤንታ ቢታ ይሰይስ ቱማ።¹⁸ኤንታ ፆሳታ ታማን ፁግድ ይስዶሶና፤ ኤንታ ፆሳት ካሰካ አሳ ኩሸይ ማስድ ከስዳ ምነ ሹቹ ግድያ ግሾ፥ ቱማ ፆሳታ ግዶኮና፤ ሄሳ ግሾ፥ ኤንቲ ኤንታ ይስዶሶና።¹⁹አቤት ጎዳዉ፥ ነ ፃላል ፆሰ ግደይሳ ሳኣ ካዎተት ኡባይ ኤራና መላ፥ ሀእ ዛራዳ፥ ጎዳዉ፥ ኑ ፆሳዉ፥ ኔኒ ኑና እያ ኩሸፐ አሻ” ያግድ ዎስስ።

እሳያስ ካዋስ የድዳ ኪታ

²⁰ሄሳፈ ጉየ፥ አሞፀ ናአይ እሳያስ ህዝቅያሳኮ ሀይሳዳ ያግድ ኪትስ፤ “ጎዳይ እስራኤለ ፆሳይ ሀይሳዳ ያጌስ። ኔኒ አሶረ ካዋ ሳናክሬማ ጋሶን ታና ዎስዳ ዎሳ ስአስ።”²¹ጎዳይ ሳናክሬማባ ሀይሳዳ ያጌስ።“ፅዮነ ጌላእያ ነና ካዉሱ፤ነና ቦራዉሱ፤የሩሳላመ ማጫ ናእያባ ሁጵያ ቃዳ ነና ቀልቅሳዉሱ።²²ኔኒ ጫይዳይነቶችዳይ ኦኔ?ኔኒ ነ ቃላ ኦደ ቦላ ቁ ኦዲ?ኦቶሮን ቁ ጋዳ ኦና ፄላዲ?ሄሳ ኔኒ ኦዳይ ታ ቦላ፥እስራኤለ ጌሻ ቦላ ግደነ!²³ኔኒ ኪትዳ አሳ ባጋራ ጎዳ ጫያዳሳ።ቃስ ሀይሳዳ ያጋዳሳ፤ታኒ ታዉ ደእያ ዳሮ ፓራ ጋረታንቃ ደረታ ሁጰ፥ልባኖሰ ዙማ ሁጵያ ከያስ።ከያዳ ኡባፈ አዱቅያ ዝጋታነኡባፈ ሎእያ ፂዳታ ቃንፃስ።ታኒ እያዉ ዉርሰ ጋፃነስክዳ ዎራ ጋካስ።²⁴ታኒ አላጋ ቢታታን ሃ ኦላቦካዳ፥ ሃ ያፐ ኡያስ።ግብፀ ቢታን ጎግያ ሃ ኡባታኒ ታ ቶሁዋን የዳ መልሳስ” ያጋዳሳ።

²⁵“ዳሮ ዎደፐ ካሰ ኔኒግምበትዳ ካታማታ ላላዳ፥ላለ ዶረ ከሳና መላ፥ታኒ ቆፋ ቃችዳይሳ ኔኒ ስአብኪ?ታኒ ሀእ ፖልያ ሀልቾታበን ሀልቻ ዎስ።²⁶ሄሳ ግሾ፥ ኤንታ አሳስ ዎልቅ እፅን፥ኤንቲ ካዉይዶሶናነ ዬላትዶሶና።ኤንቲ ጋደ ማታ መላ፤ጎሻን ሞክዳ ጫርሻ መላ።ኤንቲ ኬ ሁጰን ዶልያ ሻራፋ መላካፆና ደእሽን፥ሌገይ ምዳ ካዳ ሀንዶሶና።²⁷ሽን ኔኒ ኡትያ በሳ፥ከይያነ ገልያ በሳ፥ታ ቦላ ኔኒ ሸነትዳ ሸንያ ታኒ ኤራይስ።²⁸ኔኒ ታ ቦላ ይሎትዳ ግሾነነ ኦቶሩዋካ ታኒ ስእዳ ግሾ፥ታኒ ነ ሲያን ዳፎ አና፤ነ ዶናን ብፃላ ባርሳና።ያታዳ ነ ይዳ ኦግያራታኒ ነና ጉየ ዛራና” ያግስ።²⁹እሳያስ ካዋ ህዝቅያሳኮ ሀይሳዳ ያግስ፤ “ሀይስ ፖለታናይሳስ ማላታይ ሀይሳ፤ ሀ ላይ ህንተ አሰቦ ካፅዳ ካ ማና፤ ላይ ቃስ ሀ ላይ ካፅዳ አሰቦ ማና። ሽን ካልያ ላይ ህንተ፥ ህንተዉ ዘርተነ ጫክተ፤ ዎይነ ቶክተነ እያ ሚተ።³⁰ይሁዳ አሳፐ አትዳይሳት ፃጶ የድድ፥ አይፈ አይፍያ ም መላ ግዳና።³¹አትዳይሳት የሩሳላመፐ ከያና፥ ፓላህዳይሳት ፅዮነፐ ያና። ኡባፈ ዎልቃማ ጎዳ ምሻይ ሄሳ ኦና።³²“ሄሳ ግሾ፥ አሶረ ካዉዋባ ጎዳይ ሀይሳዳ ያጌስ፤ ‘አሶረ ካዎይ ሀ ካታማ ገለና፤ ዎይኮ ሀይሳን ባ ዶንገ ዱከና። እ ባ ጎንዳልያ ኦይክድ፥ ሀ ካታማ ስን አና፤ ዎይኮ ካታማ ዩሹዋ ቢታ ዶረን ተቀተና።³³አሶረ ካዎይ ባ ይዳ ኦግያራ ጉየ ስማና፤ እ ሀ ካታማ ገለና። ታኒ ጎዳይ ሀይሳ ኦዳስ።’³⁴ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማ ተቃዳ አሻና” ያግስ።³⁵ሄ ቃማ ጎዳ ኪታንቾይ ከይድ፥ አሶረ አሳይ ዱንካንዳ በሳን እስ ፄታነ ሆስፑን ታማነ እቻሹ ሙኩሉ አደታ ዎስ። ያትን አሳይ ዎንታ ደንድድ በእያ ዎደ፥ ሄኮ፥ አህ ሄራን ኩምስ።³⁶አሶረ ካዎይ ሳናክሬም ደንድድ፥ ጉየ ስም ብድ፥ ናናወ ካታማን ኡትስ።³⁷እስ ጋላስ ሳናክሬም ባ ፆሳ ናሳራካ ኤቃ ኬን ጎይንሽን፥ እያ ናይት አድራመለክነ ሳርሳር ማሻን እያ ዎድ፥ አራራተ ቢታ ባቃትዶሶና። እያ ናአይ አስራዶን እያ በሳን ካዎትስ።

2 ካዎታ ማፃፋ 19 / gof_etw

ህዝቅያስ እሳያሳ ዞረ ኦይችስ

እሳያስ ካዋስ የድዳ ኪታ

2 ካዎታ ማፃፋ19gof_etw