ይሁዳ ካዋ አማስያሳ
1እዮአካዛ ናአይ፥ እስራኤለ ካዎይ ዮኣስ ካዎትዳ ናምአን ላይን፥ ይሁዳ ካዋ እዮኣሳ ናአይ አማስያስ ካዎትስ።2እ ካዎትያ ዎደ ላይ እያዉ ላታማነ እቻሻ፤ እ የሩሳላመን ላታማነ ኡዱፉን ላይ ካዎትስ። እያ አየ ሱንይ ዮዳኖ፤ እያ የሩሳላመ ማጫስ።3አማስያስ ጎዳ ስንን ሱረባ ኦስ፤ ሽን እያ ማይዛይ ዳዊቲ ኦዳይሳዳ ግዶናሽን፥ ባ አዋ እዮኣሳ ኦግያ ካልስ።4አሳይ ቃ ጎይኖ በሳታ ይስቤና፤ አሳይ ሄ በሳን ያርሾ ያርሸይሳነ እፃነ ጩይሰይሳ አግቦኮና።5አማስያስ ካዎተ ምንድ ኦይክዳፐ ጉየ፥ ካሰ ካዋ፥ ባ አዋ እዮኣሳ ዎዳ ሹማታ ዎስ።6ሙሰ ህገ ማፃፋን ፃፈትዳይሳዳ፥ ጎዳይ፥ “ናይት ኦዳ ናጋራ ግሾ፥ አዋታ ዎናዉ በሰና፤ ቃስ አዋት ኦዳ ናጋራ ግሾ፥ ናይታ ዎናዉ በሰና። አስ ኡባይ ባ ኦዳ ናጋራን ናጋራን ሀይቃናዉ በሴስ” ያግድ ኪትዳይሳዳ ባ አዋ ዎዳ አሳ ናይታ ዎቤና።7አማስያስ ማፅነ ዛንጋራን ታሙ ሙኩሉ ኤዶመ አሳ ዎድ፥ ሴላ ካታማ ኦላን ኦይክድ፥ ሄ በሳ ዮቅትኤላ ግድ ሱንስ፤ ሀች ጋካናዉ ሄ ሱንን ፄገቴስ።8ሄሳፈ ጉየ፥ አማስያስ እዩ ናኣ ናኣ፥ እዮአካዛ ናኣ፥ ዮኣሳኮ፥ “ሃያ፤ አነ ናምአይ ኦላ ጋሄቶስ” ያግድ አሰ ኪትድ ማንድስ።9ሽን እስራኤለ ካዎይ ዮኣስ፥ ይሁዳ ካዋ አማስያሳኮ፥ “ልባኖሰን ደእያ ክንቾተይ፥ ልባኖሰን ደእያ ዝጋኮ፥ ‘ነ ናእዉ ታ ናኣስ እማ’ ያግስ። ሽን ልባኖሰን ደእያ እስ ዶአይ ያራ ካንድ፥ ሄ ክንቾትያ የስ።10ኤ፥ ኔኒ ቱማ ኤዶመ ቢታ ፆናዳሳ፤ ሀእ ኦቶርታዳሳ። ኔኒ ነ ፆኑዋን ኡፋይታዳ፥ ነ ሶን ዎፑ ጋዳ ኡታ። ነ ቦላነ ነ ቢታ ይሁዳ ቦላ መቶነ ዮ ኤህያባ አይስ ደንይ?” ያግድ ዛርስ።11ሽን አማስያስ እያ ስእቤና። እስራኤለ ካዎይ ዮኣስ ኦላስ ከይን፥ እነ ይሁዳ ካዎይ አማስያስ ይሁዳን ደእያ ቤት-ሳሜሳ ካታማን ኦላ ጋሄትዶሶና።12እስራኤለይ ይሁዳ ፆንን፥ ይሁዳ አሳ ኡባይ ባቃትድ፥ ባንታ ሶ ባንታ ሶ ብዶሶና።13እስራኤለ ካዎይ ዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካዋ አማስያሳ ቤት-ሳሜሳ ካታማን ድእስ። የሩሳላመ ድርሳ ግምብያ፥ ኤፍሬማ ፐንግያፈ ብድ፥ ማዛነ ፐንግያ ጋካናዉ ደእያ ኦይዱ ፄቱ ዋ ግድያ በሳ ላልስ።14ፆሳ ኬንነ ካዎ ጋን ሻሎ ምንጅያ ኬን ደእያ ዎርቃ፥ ብራነ ሚሸ ኡባ ኤክስ፤ ቃስ ኦይ ግድድ ድኤትዳ አሳካ ኤክድ፥ ሳማረ ስምስ።15ዮኣስ ሀንዳ ሀራባይ፥ እ ኦዳባይ፥ እያ ምኖተይነ ይሁዳ ካዋ አማስያሳራ ኦለትዳባይ እስራኤለ ካዎታ ታርከ ማፃፋን ፃፈትስ።16ዮኣስ ሀይቅድ፥ ባ ማይዛታ ጋክስ፤ ሳማረን እስራኤለ ካዎታራ ሞገትስ። እያ በሳን እያ ናአይ እዮርባም ካዎትስ።17እዮአካዛ ናአይ፥ እስራኤለ ካዎይ ዮኣስ ሀይቅዳፐ ጉየ፥ ዮኣሳ ናአይ፥ ይሁዳ ካዎይ አማስያስ ታማነ እቻሹ ላይ ደእስ።18አማስያስ ሀንዳ ሀራባይ ይሁዳ ካዎታ ታርከ ማፃፋን ፃፈትስ።19አማስያሳ ዎናዉ አሳይ የሩሳላመን ማቀትስ፤ ያትን እ ላክሶ ካታማ ባቃትስ። ሽን ኤንቲ እያ ጌዶ ላክሶ ካታማ አሰ ኪትን፥ እያ ያን ዎዶሶና።20ዎድ እያ አሀ ፓራን ጫን ኤህድ፥ ዳዊታ ካታማን የሩሳላመን እያ ማይዛታራ ሞግዶሶና።21ሄሳፈ ጉየ፥ ይሁዳ አሳ ኡባይ ታማነ ኡሱፑን ላይ ናኣ አዛርያሳ እያ አዋ አማስያሳ በሳን ካዎዶሶና።22እያ አዋይ አማስያስ ሀይቅዳፐ ጉየ፥ አዛርያስ ኤላታ ካታማ ዛር ኬፅድ፥ ይሁዳን ጋስ።እስራኤለ ካዋ ናምአን እዮርባማ
23እዮኣሳ ናአይ፥ ይሁዳ ካዎይ አማስያስ ካዎትዳ ታማነ እቻሻን ላይን፥ እስራኤለ ካዋ ዮኣሳ ናአይ እዮርባም ሳማረን ካዎትስ፤ እ ኦይታማነ እስ ላይ ካዎትስ።24ናምአን እዮርባም ጎዳ ስንን ኢታባ ኦስ፤ እስራኤለ አሳ ናጋራ ኦስስዳ ናባፃ ናኣ እዮርባም ኦግያፐ ሃክቤና።25ጋት-ሄፈራ አድያ አማተ ናኣ ናብያ፥ ባ አይልያ ዮናሳ ባጋራ ጎዳይ እስራኤለ ፆሳይ ባ ቃላን ኦድዳይሳዳ፥ ሀማታ ፕኑዋ ጌተትያ በሳፈ ዶምድ፥ ማፅነ አባ ጋካናዉ ደእያ እስራኤለ ዛዋ ዮኣሳ ናአይ እዮርባም ፆንድ ዛርስ።26እስራኤለን አሳ ኡባይ አይለ ግድን፥ ዎማኖ ግድን፥ አይ መላ ኡንኤትዳኮ፥ ጎዳይ በእስ፤ ኤንታ ማድያ ኦንካ ባዋ።27ጎዳይ እስራኤለ አሳ ሱን ሳሎፐ ጋርሳን ቁቻና ግቤና። ሄሳ ግሾ፥ ጎዳይ ኤንታ ዮኣሳ ናኣ እዮርባማ ባጋራ አሽስ።28እዮርባም ሀንዳ ሀራባይ፥ እ ኦዳባ ኡባይ፥ ኦለትዳባይነ ይሁዳ ባጋ ግድዳ ዳማስቆነ ሀማታ ካታማታ እስራኤለስ ዛርዳባይ እስራኤለ ካዎታ ታርከ ማፃፋን ፃፈትስ።29እዮርባም ሀይቅድ፥ ባ ማይዛታ፥ እስራኤለ ካዎታ ጋክስ፤ እያ በሳን እያ ናአይ ዛካርያስ ካዎትስ።