Yihuda Kawa Iyo7aasa
1Iyyuy, Isra7eele biittan kawotida laapuntho laythan, Iyo7aasi Yihudan kawotis; I Yerusalaamen oytamu laythi kawotis. Iya aaye sunthay Saabo; iya Barsaabe maccas.2Kahiney Yoodahey, iya tamaarsidanne zorida gisho, I de7ida laytha ubban Iyo7aasi Godaa sinthan suureba oothis.3Asay he bessan yarshonne ixaane cuyisethi aggiboonna gisho, dhoqa goyinno bessata dhaysibeenna.4Iyo7aasi kahineta xeegidi, “Xoossa keetha yaa geeshsha miishe ubbaa shiishite. Hessika huuphe taybuwa wode imetiya miishiyanne asay ba shenen Xoossa keethi ehiya miishiya.5Kahineti ubbay he miishiya ehiya asaape banta gishuwa gishuwa ekidi, Xoossa keetha giddon iitida ubbaa loythana” yaagis.6Shin kawoy Iyo7aasi kawotida laatamanne heedzantho laythi gakanaw, kahineti Xoossa keetha oorathibookona.7Kawoy Iyo7aasi kahiniya Yoodahenne hara kahineta xeegidi, “Xoossa keetha giddon iitida bessata ayis ooratheketii? Miishe Xoossa keetha oorathanaw immitepe attishin, hintew imetiya miishiya hinte kushen oykofite” yaagis.8Kahineti, “Asaape hara miishe ekoko; Xoossa keetha giddon iitida bessaa oorathana” yaagidi zaaridosona.9Yaatin, kahiniya Yoodahey issi saaxine ekidi, iya kamaa lukidi, yarsho bessa matan Xoossa keethi geliya pengiya ushacha baggara wothis. Pengiya naagiya kahineti Xoossa keetha yida miishiya ubbaa saaxiniyan yeggoosona.10Enti saaxiniyan daro miishey dagaayetidaysa be7ida wode ubban, kawo xaafeynne kahine halaqay yidi, miishiya taybidi, karxiitan qoloosona.11Taybetida miishiya salla7idaape guye, Xoossa keetha oosuwa xeellana mela sunthetida asaas immoosona. Enti miishiya ekidi, Xoossa keethan anaaxetasinne gimbeysati immoosona.12Miishiya shuchu masseysatasinne qoo7eysatas qanxanaw, Xoossa keetha oorathanaw, sanqa, shuchunne koshshiya harabata shammanaw go7etoosona.13Xoossa keetha yida miishiyape Xoossa keetha bira burcukota, qapheta, keretanne moyzeta woyko worqanne bira miisheta oothanaw kessibookona.14He miishe ubbay Xoossa keetha oorathiya asaas qanxetis.15Xoossa keetha oosuwa xeellanaw sunthetida asati ammanetida asi gidida gisho, “Miishiyan ay ay oothidetii?” yaagidi oychida asi oonika baawa.16Naaqo yarshonne nagara yarshos qanxetiya miishey kahinetas gelesipe attishin, Xoossa keetha oorathiya miishe saaxiniyan gelenna.17He wode Araame kawoy Azaheeli bidi, Gaate katama olidi oykis. Kaallidi Yerusalaame olanaw simmis.18Shin Yihuda kawoy Iyo7aasi iyape kase kawotida Yihuda kawoti Iyosaafexi, Iyoraaminne Akaziyaasi Godaas dummayida miisheta, ba imota, Xoossa keetha imotanne kawo gadho shalo minjiya bessan de7iya worqa ubba ekis. Araame kawas Azaheelas yeddin, Azaheeli Yerusalaame olanaw dendoysa aggaagis.19Kawoy Iyo7aasi hanida harabaynne I oothidaba ubbay Yihuda kawota Taarike Maxaafan xaafetis.20Hessafe guye, iya moorinnati iya bolla maqetidi, Siila efiya ogiyan Miilo geetetiya keethan wodhidosona.21Iya wodhida oosanchoti Sim7ata na7aa Yozakaaranne Shomeera na7aa Yozabaata. Iyo7aasi Dawita Kataman ba mayzata duufon moogetis; iya bessan iya na7ay Amasiyaasi kawotis.