Read 2 KƆLINTƆ 6

2 KƆLINTƆ6yns_tsc

¹Ntɔn bi ibà abaay ande, bi kàmàlalɛɛl mukɔɔn awal kab a ngway a Nzam a bunàbun.²Ntɔn nde an'tɛn naa:« Utaaŋ aŋàbwaŋ, mɛ kàkyer awem,kilä a ngweel a mɔ̈ɔ̈, mɛ kàkyer abay. »Le, apanà là taaŋ aŋàbwaŋ. Le, apanà kyilä a ngweel a mɔ̈ɔ̈.³Bi ikwen anki, itàkal kaben, mubööl mbuur kyà, ntɔn bàkɔ̈ɔ̈n apɛl isal abi.⁴Wɛɛ akà bi, unsà ya yanswà, bi iswɛɛŋà bi ŋakwo naa ndandaa bi ibà asyääl a Nzamu mbwo a muküünà mbɔɔnamu mpay mbɔɔn,amu an'kyà,amu bɔɔmà aŋàdiir,⁵amu iki,amu an'bɔlokà,amu lingyoomà,amu yɔ̈ɔ̈n,amu nkɔ̈ɔ̈n a twaal,amu nkiin a isaa,⁶u mbwo a pɛɛl,u mbwo a ngyööb,u mbwo a nkääŋ a mpem,u mbwo a ubwaŋ,u mbwo a Dweelà In'kyɛɛl,u mbwo a ukwen a ndandaa,⁷u mbwo a ndaa a ndandaa,u mbwo a ngwal a Nzam,inwään abi byànwään anà byigyɛɛŋ,yà mukyer ndaa a balàbal u mii a Nzam,⁸amu làkoo anà nsaal,amu in'tswe anà nsyäŋà,bàfiwal asànaa aŋatwee,kyekà bi ibà bàndandaa,⁹
bàfiwal asànaa biyöb anki,kyekà bàkiyöb ubwaŋàbwaŋ,bàfiwal asànaa akü,kyekà bi ibà anà mɔ̈ɔ̈,bàfiwal asànaa baar abuntaaŋàmbar,kyekà bi kàkü anki,¹⁰
bàfiwal asànaa aŋangyɛb,kyekà taaŋ lanswà bi ibà kun'sak,bàfiwal asànaa aŋàlàmbwà,kyekà bi ifàkyer aŋin'naaŋ mbɔɔn,bàfiwal asànaa bi undiir watɛy,kyekà bi ibye anà indiir byanswà!¹¹Atɔŋ a Kɔlintɔ, bi kàyäm anà bɛ u nsaay yanswà, bi kàladuub mpem abi kölàköl.¹²Bi kàladübà anki mpem abi, wɛɛ bɛ lidüüb mpem abɛ.¹³Apanà sye, mɛ in'tɛn a bɛ asànaa akà baan amɛ, bɛ sye làduub mpem abɛ kölàköl!

Igyɛɛŋ akà baar mpa abà Ayudà

¹⁴Twon lan'tüüb anà baar bàkɔ̈ɔ̈n làkwikilà. Un'tüüb nà kan'kwo mukäl uboo a balàbal anà ube? Un'tüüb nà uboo a pɛɛlà anà làpib?¹⁵Nkwà nà ayà uboo a Klistɔ anà Bɛlyar? Isam nà akyà uboo a ŋàlàkwikilà anà mbuur mpa awà ŋàlàkwikilà?¹⁶Undiir nà wun'tüüb uboo a idwà a Nzam anà bànzam a itɛk? Ntɔn bi, bi ibà idwà a Nzam a mɔ̈ɔ̈ asànaa kàtɛn Nzam ŋakwo naa:« Mɛ in'sàkal anà in'sàlyaŋ uboo a ba,mɛ in'sàkal Nzam a ba, ba bàsàkal un'sɛŋ amɛ. »¹⁷Kyakin,« Làtoo uboo a baar aban, làkäl ukɔl,twon lan'ba akà undiir mwɛy wàŋingyäy,waa mɛ in'sàlawal.¹⁸Mɛ in'sàkal taa ntɔn bɛwaa bɛ làsàkal baan abaal anà bakaar ntɔn mɛ. » Mwol aŋangwal yanswà.

2 KƆLINTƆ 6 / yns_tsc

Igyɛɛŋ akà baar mpa abà Ayudà

2 KƆLINTƆ6yns_tsc