1Kinaat liiɓ ne ini ŋ woo weem tokis ne ɓoo na cambise woo ne a ɓoo min pangki. Ɓoo etohɗi ne ɓi ɓo' fiisiɗ ɗu kayit ne ɓa woo ɗu ineem findi ɓinooɓi na tumohee wa, te ɓoo namɗi etoh ne ɗu tumiɗ ɓoo ineem.2E ɗu kayteem, kayti fiisu ŋ keeñ ciŋ ɓoo, wi ɓooɓi jen min jang, ɓa inaha.3Wa hooliɗ ne e ɗu kayti Kiristaani fiis, a taambɗohhaa ŋ pangkiŋ ɓoo. Kayteem fiisohuuɗi fiisoha, wa fiisohu Fuuɗsiŋ Koohi na pese. Wa fiisuuɗi ŋ atoh ɗapas, wa fiisu ŋ keeñ ci.4Ineem weɗ oolki ɓoo ooluk Kooh taamboh ŋ Kiristaani.5Wa nikɗi haa ne ɓoo amb ne ɓoo miniɗ haɓiɗ in ngaŋ min-miniŋ ɓoo. Te ɓoo liiɓɗi ne ineem puloh nga ɓoo, min-miniŋ ɓoo puloh ŋ Kooh.6A yi nam on ɓoo po ɓoo minnda nik ɓi na pangkiɗe ambtiɗoh as, wi gaƴukɗi ŋ waasi fiisu waaye ŋ Fuuɗsi Hoolohngaani. Waasi fiisu na apohe apoh, waaye Fuuɗsi na onohe kipes.7Nakoh ciŋ waasi fiissee ŋ atoh ɗapas dong te siñaariŋ yaki Kooh yak nikee wiliɗ ca po Israayel ci mineeɗi marak ŋ fikiiriŋ Musaa sagu siñaara, te siñaaraam geneeɗi. Nik ne e pangkiŋ waasi fiisu, wi na ɓayohe ŋ kakaan weɗ hunee na kiyak hend ɗaa ɗah,8kon pangkiŋ Fuuɗsi, kiyak kiŋ wa hendan na ?9Nik ne pangkiŋ waasi na atte'e ɓo' tooñ weɗ raak kiyak ɗah, ŋ woyisɗi ɗa wi na tahe Kooh amb ɓo' ɓo' yurhiɗ !10Ɓoo miniɗ woo ne siñaarɗiŋ kiyak ki wotɓa wa tus haa ŋ siñaarɗiŋ wi woti.11Nik ne wi genɗi weɗ siñaarɗee ɗah, ŋ woyisɗi ɗa wi genan gen.12Oolki ɓoo ooluk ne kiyak keem genan gen na tahe ɓoo kaañ keeh-keeh.13Te ɓoo tumɗi findi Musaa, yi muuree fikiiriŋ ɗe ne Israayel ci markuu reehiŋ siñaari genaaɗiini.14Waaye ɓa sangee sang inah. Po woti sah, ɓa jangeesa Fiis ciŋ Ambtiɗoha Maañɗa ɗah, muureem na rise nga. Wa nihsukɗi, wa na coote rek ne fu nikka ŋ Kiristaani ɗah.15Po woti sah, Israayel ci jangeesa teereeciŋ Musaa ɗah, liiɓohaaciŋ ɓa na nike muurkiɗ.16Waaye ɓo' nu hay ŋ Heɗi ɗah, muuri nihsu.17Fu hay ŋ Heɗi ɗah, weɗ ne fu hay ŋ Fuuɗsi ; te ɗisik nu Fuuɗsiŋ Heɗi nik ɗah, raak haf fu raakiɗ nga.18Ɓoo jen, ɓoo ɓi na fikiici raakisɗi muur, siñaariŋ Heɗi wa ɗii saañis nga ɓoo findi seetu ; Heɗi, maanaam Fuuɗsi, a yii ɓoƴsoh ɓoo po, ɓoo mandan na ɗe, wa ɓaatke, siñaariŋ ɓoo uupee nga laay.