1Wii weɗ waasi kaahayɗoh ne ŋ hey ɗu marke. Findi Fiis ci woyoha : « Seede kanak wala kaahay raak ɗah, in nu nik miniɗ tufkiɗu. »2Wi ŋ hay kotiŋ ngo kanakɗoh, ŋ woyeena, te woti ŋ nikɗi nga, waaye mi yii woyisa ɓi bakaaɗee waam, na ɓinooɓi jen : Ŋ hayis ɗu marke ɗah, ŋ faɗanɗi ali ɓo' !3Ɗu na waake firndeeni Kiristaani na woyohe taamboh nga so haa e ? Nga ɗu, a ñakɗi hatil, a na tume na hatil ŋ harmban ɗu.4A daaƴu ŋ kurwaana ŋ ñak hatil, waaye a yii pes ŋ hatiliŋ Kooh. Ɓoo namiɗ ñak hatil ŋ niki ɓoo nik nga ɗe, waaye ɗu hey hote ne ɓoo ɓii pes na ɗe taamboh ŋ hatiliŋ Kooh.5Ɓeesaat haf ɗu baahiɗ po ɗu inah andi ɗu ɓii ŋ kosi ; waakaat firndeeni ŋ haf ɗu. Wa wooriɗ ɗu ne Yeesu Kiristaa yii nga ɗu e ? Wa ɗaleen ineem ɗah, ɓeesi ɗu ɓees haf ɗu heen teeɓohe ne ɗu jallaaɗi.6Waaye ŋ oolkiɗ ne ɗu hey hote firndeeni ne ɓoo nikɗi jalla'aaɗi.7Ɓoo na kiime Kooh ne ɗu tumuu ali in baahaaɗi ; wa nikɗi haa ne ɓoo na waaɗe teeɓoh ne ɓoo Apootar baahiɗ. Waaye ɓoo na kiime Kooh ne ɗu tumee ini baah. Ini uup po neɓ weɗ ne ŋ etohɗi ɓees hatiliŋ ki'apootar kiŋ ngo.8Laam ɓoo raakɗi hatil hiñohoha keeh ki ; hatiliŋ ɓoo, wa hiñohoha wuu keeh ki dong.9Ɓoo ñak hatil te ɗu raak hatil ɗah, ɓoo hey neɓse nga, waaye ini ɓoo na kiime Kooh weɗ ne ɗu nik ɓo' mitiɗ.10Weɗ tah po ŋ kaɓɗohee ɗu fiisii ŋ nikaaɗiikiŋ ngo nga ; ne kaɗ po ŋ nik nga ɗah, wa etohuu ne ŋ tum nga ɗu tumohaaɗ ndengiɗ ŋ kikilifaaki Heɗi eɗ to. A eɗ to wa yahrohoha kosiŋ ɗu haa, waaye kaɗɗohaa wa fiki.
Askohi
11Ini mirndoh, ɓaah ciŋ ngo, sumaat, haɓɗissaat pesohaaɗiŋ ɗu, ñaahtiɗohaat, kerhiɗohaat, pesaat ŋ jam, te Kooh yi riif na waaɗoh na jam hey nike na ɗu.12Kañɗohaat ŋ harmban ɗu, ɗu morgiɗkohee, wa hun na keeñ hooliɗ. Ɓo'-Kooh ci nik ndii jen ɓa ɗii kañiɗ ɗu.13Baahohiŋ Yeesu Kiristaa Heɗi na waaɗi Kooh waaɗ ɗu na ambsukohi ɓoo raak ŋ Fuuɗsi Hoolohngaani nikaat na ɗu jen !