ጳዉሎሳነ ዎርዶ ሀዋረታ
1ታ ጉ ኤያተ ህንተ ሀእካ ዳንዳአና ጋዳ ቆፓይስ፤ ሀያና ዳንዳእተ።2ፆሳይ ህንተዉ ቆፕዳይሳዳ፥ ታካ ህንተዉ ቆፓይስ። ታኒ ህንተና ጌሻ ጌላእዳ እስ አድያ፥ ክርስቶሳስ እማናዉ ኦይቻ ዎስ።3ሽን ሾሻይ ባ ገንያን ሄዋኖ ባለዳይሳዳ ኦን ኤር ህንተ ዎዛናይ ኢትድ ክርስቶሳስ ደእያ ህንተ ሱረተነ ጌሻተ አጋንደት ጋዳ ህርጋይስ።4እስ አስ ይድ፥ ኑኒ ህንተዉ ማርካትዳ የሱሳፐ ሀራ የሱሳ ህንተዉ ማርካትኮ፥ ዎይኮ ህንተ ኤክዳ አያናፐነ ዎንገላፐ ሀራ አያናነ ዎንገላ ህንተዉ ኦድኮ፥ ስእ ግድ ኤኬታ።5ሽን ታኒ የሱሲ ኪትዳ “ግታ ሀዋረታ” ገተትድ ፀገተይሳታፐ ጉፃይስ ጋዳ ቆፕከ።6ታኒ ኦዳ ኤሮና አስ ግድኮካ፥ ኤራተ ታዉ ደኤስ። ሄሳ ታ ህንተዉ ዳሮ ኦገን ቆንጭሳስ።7ታኒ ሚሸ ኦይቾና ፆሳ ዎንገላ ህንተዉ ጮ ኦድዳይስነ ህንተና ቁ ኦዳ ታና ቶችዳይስ ታዉ ናጋራ ግዲ?8ታኒ ህንተዉ ኦናዉ ሀራ ዎሳ ኬታፐ ሚሸ ቦንቃ ኤካስ።9ታ ህንተራ ደእያ ዎደ ታና መትንካ ህንተፈ እስ አስካ ዋይሳብከ። ማቀዶነፐ ይዳ አማነይሳት ታና ኮሽያባ ኡባን ማድዶሶና። ሀች ጋካናዉ ታ ህንተዉ ቶሆ ግዳብከ ስንስካ ቶሆ ግድከ።10ክርስቶሳ ቱማተይ ታናን ደእሽን፥ ታ ጬቁዋ አካያ ቢታን ታና ኦንካ ድገና።11ታ ሀይሳ አይስ ጋይና? ህንተና ዶሶና ግሾዬ? ታኒ ህንተና ዶሰይሳ ፆሳይ ኤሬስ።12“ኑካ ህንተ መላ ኦስ” ያግድ ጬቅያ ሀንኮ ሀዋረታ ጬቁዋ ጋሱዋ ይሳናዉ ሀእ ታ ኦይሳ ስንስካ ኦና።13ሀይሳ መላ አሳት ክርስቶሳ ሀዋረ ዳናናዉ ባንታና ላምያ ዎርዳንቾ ሀዋረታነ ጭምያ ኦሳንቾታ።14ሄስ ማላልስያባ ግደና፤ አይስ ጊኮ፥ ፃላሄይ ፖኦ ኪታንቾ ዳናናዉ ባና ላሜስ።15ሄሳ ግሾ፥ ፃላሄ ኦሳንቾት ፅሎተ ኦሳንቾታ ዳናናዉ ባንታና ላምኮ ሄስ ግታባ ግደና። ኤንቲ ዉርሰን ባንታ ኦሱዋዳ ኤካና።ጳዉሎሳ ጋክዳ መቶ
16ኦንካ ታና ኤያ ግድ ቆፖና መላ ዛራዳካ ኦዳይስ። ታ ህንተዉ ኤያ ዳንኮካ ታ ጉራ ጬቀታና መላ ታና ኤያ ኦድ ኤክተ።17ታኒ ሀይሳዳ ጬቀታዳ ኦደተይ፥ ጎዳይ ኮየይሳዳ ግዶናሽን፥ ኤያተን ኦዳይስ።18ዳሮ አሳይ ሀ ሳአባን ጬቀትያ ግሾ፥ ታካ ጬቀታና።19ህንተ ዎዛናማ ግድያ ግሾ፥ ኤያ አሳባ ኡፋይሳን ዳንዳኤታ።20ኦንካ ህንተና አይለይኮ ዎይኮ ህንተና ቦንቅኮ ዎይኮ ባዉ ማደታናዉ ህንተኮ ሺቅኮ ዎይኮ ህንተ ቦላ ኦቶርትኮ ዎይኮ ህንተና ባቅኮ ህንተ ዳንዳኤታ።21ኑኒ ሄሳ ኦናዉ ዳሮ ዳቡራንቾ ግደይሳ ዬላታሸ ታ ኦዳይስ። ሽን ኦንካ ምንድ ጬቀትኮ፥ ታካ ጬቀታናዉ ምናይስ። ታኒ ሄሳ ኤያ አሳዳ ኦደታይስ።22ኤንቲ እብራዌ? ታካ እብራወ። ኤንቲ እስራኤሌ? ታካ እስራኤለ። ኤንቲ አብራሃመ ሼሼ? ታካ አብራሃመ ሼሽ።23ኤንቲ ክርስቶሳ ኦሳንቾ? ታኒ ጎሻ አሳዳ ኦዳይስ፥ ኤንታፈ አያ ክርስቶሳ ኦሳንቾ። ታኒ ኦሶን ዳሮ ዳቡራስ፤ ዳሮ ዎደ ቃሸታስ፤ ጋራፈታስ፤ ዳሮ ዎደ ሀይቆፐ አታስ።24አይሁደት ታና ሀስታማነ ኡዱፉና እቻሹ ቶሆ ጋራፍዶሶና።25ሄ ቶሆ ፃምአን ሾጨታስ፤ እስ ቶሆ ሹቻን ጫደታስ፤ ማርካበይ ሄ ቶሆ መእስ፤ አባ ግዶን እስ ቃማ ኩመ አቃዳ ፔአስ።26ታኒ ዳሮ ኦግያ ዳቡራን ሄመታስ። ክፃ ሃፈነ ፓንጋፈ አታስ። አይሁደትነ አይሁደ ግዶና አሳይ ታ ቦላ መቶ ጋዶሶና። ካታማይ፥ ባዞይ፥ አባይ፥ ታና ያሽስ፤ አማንያ ዳንያ አሳት ታና ዋይስዶሶና።27ታኒ ኦሶን ዳቡራስነ ጫዋታስ፥ ዳሮ ቶሆ ስኮ ያስ፥ ኮሻታስ፥ ሳሞታስ፥ ዳሮ ቶሆ ፆማስ፥ ሜገታስ፥ ካሎታስ።28ሀራባ ኡባ ታይቦና ኡባ ዎደ ታና ቆፍሰይ ዎሳ ኬታባ።29እስ አስ ዳቡርያ ዎደ እያራ ታ ዳቡራብክና? እስ አስ ናጋራን በትያ ዎደ ታ አዉደ ቂሮቶና አጋድና?30ታ ጬቀታናዉ ኮሽያባ ግድኮ ታኒ ዳቡራንቾ ግደይሳ ኤርስያባን ጬቀታና።31መርናዉ ቦንቸትዳ ፆሳይ፥ ኑ ጎዳ የሱስ ክርስቶሳ አዋይ፥ ታ ዎርዶቶናይሳ ኤሬስ።32ዳማስቆ ካታማን ካዋ አርስፆሳፐ ጋርሳራ ሃረይስ ታና ኦይናዉ ኮይድ ዳማስቆ ካታማ ፐንግያ ናግስስ።33ሽን አሳይ ታና ዳቾን የግድ፥ ካታማ ድርሳ ማስኮትያራ ዎስን ታኒ እያ ኩሽያፐ አታስ።