2 Qorontoosa Kiita1gof_ltw

1Xoossa shenen Yesuus Kiristoosa hawaare gidida Phawuloosinne, nu ishaa Ximotiyoosi, Qorontoosan de7iya Xoossaa woosa keethaasinne Akaya biittan de7iya Xoossaa asa ubbaas xaafida kiitaa.2Xoossaa nu Aawapenne Godaa Yesuus Kiristoosape, aadho keehatethaynne sarotethay hintew gido.

Phawuloosi Xoosse Galatees

3Maarotetha Aawas, ubba wode nuna minthethiya Xoossaas, nu Godaa Yesuus Kiristoosa Aawas galati gido.4Xoossay nuus immida minthethuwan, meton de7eyisata nu minthethana mela Xoossay nuna nu meto ubban minthethees.5Nuuni Kiristoosa daro waayiya shaaketidaysada qassi nuuni iya daro minthethuwan minnana.6Nuuni waayetiko hessi hintena minthethanaasanne hintena ashshanaasa. Qassi nuuni minetiko nuuni gencida waayiya mela hinteka gencidi, Xoossay hintew immiya minthethuwan minnana.7Hinte nu ekida metuwa mela ekidi, nu minthethuwan shaaketanaysa nu eriya gisho nu ufaysay hintenan mino.8Nu ishato, Iise biittan nuna gakida metuwa hinte erana mela koyoos. He nuna gakida metoy nu wolqaafe darin, hayqonna attoko gidi ufaysi qanxidashin.9Nuuni nu bolla hayqo pirdi pirdetida mela qopida. Shin nuuni nu huuphen gidonashin, hayqidaysata denthiya Xoossan ammanetana mela hessi hanis.10Xoossay hessa mela iita hayqope nuna ashshis; ha77ika ashshana; sinthafeka I nuna ashshana gidi iyan ufaysi wothoos.11Woosan nuna maaddite. Daro woosa gaason Xoossaa maaduwa nu demmiya wode daro asay nu gisho Xoossaa galatoosona.

Phawuloosi Ba Halchuwa Laammis

12Nuuni nu geeshsha kahan ceeqetoos. Nuuni ha alamiyan de7ida de7uwan ubbaraka hintera nu de7ida de7uwan tumatethaninne suuretethan hintera de7ida. Hessika, ha alamiya cincatethan gidonashin, Xoossaa aadho keehatethaana.13Nu hintew xaafida dabdaabey hinte nabbabanawunne akeekanaw danda7iyabaape attishin, haraa gidenna. Hinte iya akeekanaw danda7eysa ta ammanayis.14Ha77i hinte nuna hanida keena ereeta, shin sinthafe kumethi eranaysa ta ammanetayis. Nu Godaa Yesuusi simmiya wode nuuni hintenan ceeqetidaysada hinteka nunan ceeqetana.15Hessa taani loytha erida gisho, hinte nam7antho go7etana mela kasetada hinteko baanaw qofa qachas.16Taani Maqedoone bashenne yaape simmashe hintena be7ana. Taani yaape Yihuda biya wode hinte tana ta ogiyan maaddana gada qopas.17Taani hessa gashe ay oothanaw bessiyako eronna asi daaniyana? Woyko taani ta qofaa qachiya wode asa qofada, issi toho “Ee” qassi issi toho “Akay” giya asa meleyee?18Shin Xoossay ammaneteysa gidiya gisho, nu hintew odiya qaalay “Ee” woyko “Akay” geysa gidenna.19Taani, Sillaaseynne Ximotiyoosi hintew markatida Xoossaa Na7ay, Yesuus Kiristoosi ubba wode “Eepe” attishin, “Ee” nne “Akay” gidenna.20Xoossay immana gida ubbay Kiristoosa baggara “Ee” gidees. Nuuni Kiristoosa baggara Xoossaa bonchoos, “Amin7i” gey hessa gishosa.21Nunne hinte Kiristoosan minnidi eqana mela oothidaynne ba oosuwas dooriday Xoossaa.22Nuuni iyabaa gideysa erisanaw ba maatamiya nu bolla wothis; qassi ba Geeshsha Ayyaana oythi oothidi nu wozanan wothis.23Taani Qorontoosa boonna aggiday hinte azzanonna attana melasa; hessi wordo gidiko Xoossay ta shempuwa taape eko.24Hinte, hinte ammanuwan minnidi de7iya gisho, nu hintena ufaysanaw hintera issife ootheysatape attishin, hintena wolqan ammantheyisata gidoko.
expand_more
Search