1Awarni ɛicrin n iseggʷusa i di ibna Suliman tnayen n tudrin, Taddart n SIDI u taddart n ujeǧid, imsar,2aqa Suliman ibna ɛawed tineddam i d as iwca Ḥiram uca issezdeɣ din ayt n Israil.3Awarni as iffeɣ Suliman ɣar Ḥamat-Ṣuba uca iṭṭef i-tt.4Netta ibna Tadmur di řexřa. Ibna ɛawed marra tineddam n řexzen di Ḥamat.5Netta ibna uřa d Bayt-Ḥurun n nnej d Bayt-Ḥurun n wadday, tneddam ifaryen s řeḥyuḍ d tewwura d iɛumad i ubelleɛ,6uřa d Baɛlat d marra tineddam n řexzen nni iǧan ɣar Suliman, d marra tineddam n ikarruten d marra tineddam n imnayen u xenni marra min issitem Suliman ad tt ibna di Urcalim u di Lubnan u di marra tammurt n řeḥkam nnes.7X marra řgens i iqqimen - x řgens n Iḥittiyyen, n Imuriyyen, n Ifiriziyyen, n Iḥiwiyyen u n Iyabusiyyen, inni war iǧin ca zeg ayt n Israil,8u x warrawen nsen nni iqqimen awarni asen di temmurt, inni war ttwaqḍan s ufus n ayt n Israil - igga xasen Suliman ddquřat qesḥent ař ass-a.9Maca zeg ayt n Israil war iggi Suliman d isemɣan i řexdayem nnes, minzi nitni tuɣa aten d iɛeskariyyen d imeqqranen x ineɣrafen nnes zi řɛeskar, d imeqqranen n ikarruten nnes d imnayen nnes.10Ina d imeḥḍayen imeqqranen nni tuɣa ɣar ujeǧid n Suliman, mitayen u-xemsin n yeryazen nni tuɣa ittḍebbaren x řgens.11Suliman issgeɛɛed yeǧis n firɛun zi tendint n Dawud ɣar taddart i tuɣa i d as ibna, minzi inna: “Tamɣart inu war tzeddiɣ ca di taddart n Dawud, ajeǧid n Israil, minzi imucan mani dd-tusa Ttabut n SIDI, aqa aten qeddsen.12Xenni issgeɛɛed Suliman tiɣarṣa n wecmaḍ i SIDI x uɛalṭar n SIDI nni tuɣa ibna zzat i wesqif n wadaf n Zzawect Tameqqrant,13ɛlaḥsab lfariḍa i kuř ass i tewhibt n tɣarṣa, am mammec teqqar tewṣeyyet n Musa i wussan n ssebt, i wussan n uyur n jdid u i třata řeɛyudat i ittwaggen i kuř aseggʷas: di Řɛid n Weɣrum břa Antun, di Řɛid n Ssimanat u di Řɛid n Iɛuccuten.14Am mammec dd-tusa lfariḍa n babas Dawud issbedd ɛawed tirbiɛin n ikehhanen i řxedmet nsen, d terbiɛin n Ilawiyyen i tsexxart nsen, ḥima ad ssemɣaren di Zzawect Tameqqrant u ad sexxaren i ikehhanen ɛlaḥsab awař n lfariḍa i kuř ass, uca issbedd uřa d iɛessasen n tewwart di terbiɛin nsen ɣar kuř tawwart, minzi ammu i yeǧa řumur n Dawud, aryaz n AREBBI.15Nitni war ḥeyyden ca řa deg ict n jjihet x řumur n ujeǧid i ikehhanen d Ilawiyyen, war iǧi uřa zi jjihet n ixxamen n txubay.16Ammu i tᵉttwasseqfeř marra řxedmet n Suliman zeg wass n usarsi n dsas n Taddart n SIDI ař akemmeř nnes, wah ammu i tᵉttwakemmeř Taddart n SIDI.17Xenni iruḥ Suliman ɣar Ɛiṣyun-Jabir u ɣar Aylat, ɣar tma n řebḥar, di temmurt n Idum.18S ufus n imsexxaren nnes issekk Ḥiram ɣares iɣarruba, uca imsexxaren nni issnen řebḥar, u nedhen ak-d imsexxaren n Suliman ɣar Ufir uca iwyen-dd ssenni arebɛa-mya u xemsin talint n wureɣ uca usin-dd zzayes ɣar ujeǧid Suliman.