Xoossa Keetha Miisheta
1Hessafe guye, Solomoney adussatetha laatamu wadha, gompay laatamu wadha, dhoqatethay tammu wadha gidiya yarsho bessa naase biratape oosisis.2Qassi naase birata seerisidi, doonay ya gaxape ha gaxaa gakanaw tammu wadha, adussatethay ichashu wadhanne yuushoy hastamu wadha gidiya Abba saane medhisis.3Abba Saane doonan kare baggara yuuyi aadhidi, iyara oyketidi medhetida misileti de7oosona; he misileti nam7u maaran de7iya boorata misileta.4He Abba Saane naase biratape medhetida tammanne nam7u boorata misiletas zokuwan uttis. Booratape heedzati pudeha bagga, heedzati wuloha bagga, heedzati dugeha bagga, heedzati qassi doloha bagga simmidi xeelliyaba daanosona. Abba Saane enta bolla uttis; entaasi guye baggay giddoko simmi uttis.5Abba Saaney issi takadho mela orde; iya doonay wanca doona mela; suufe ciishshi daanees. He Abba Saaney usupun tammu mukulu litiro gidiya haatha oykeysa.6Solomoney meecetiya tammu kereta; oosisidi, ichashaa ushacha garsa baggara, ichashaa haddirsa baggara wothis. Entan xuussa yarsho ashoy meecetees; shin Abba Saane haathan kahineti meecetoosona.7Hessafe guye, Solomoney entaw imetida halchuwada xompe wothiya tammu kocata worqafe oothidi, ichashaa ushacha baggara, ichashaa haddirsa baggara Xoossa keethan wothis.8Tammu xarpheezata oothidi, ichasha ushacha baggara, ichasha haddirsa baggara Xoossa keetha giddon wothis. Qassi xeetu disteta worqafe oothis.9Solomoney kahinetas giddo dabaaba, kare bagga gita dabaaba giigisis; dabaabas pengeta giigisidi, pengeta naase biratan lanxis.10Abba Saaniya Xoossa keethafe garsan doloha baggan wothis.11Kiraami kereta, akaafatanne xaarota medhis; Kiraami kawa Solomones Xoossaa keethan ooso oothidi polis.12I oothida oosotika nam7u tuussata, tuussata huuphen wothiya saane mela nam7u gumbota, tuussata bolla de7iya nam7u gumbota alleeqisiya nam7u gite daaniya santhalaata,13issi issi tuuqiya bolla nam7u maaran naase biratape oosetida issi issi xeetu oromaane teera misileta, kumethi oyddu xeetu oromaane teera misileta,14oydetanne oydeta bolla uttiya meecha tammu kereta,15Abba Saaneynne iyape garsan de7iya tammanne nam7u boora misileta,16kereta, akaafata, qaphetanne hara miisheta ubbaa. Kiraam-Abi kawa Solomones Xoossa keethaa oosuwas medhida ha miisheta ubbaa geeshsha naase biratape medhis.17Kawoy Solomoney Sukotapenne Xareedape giddon, Yordaanose denban de7iya naase birata sheeshiya bessan ha ubbaa oosisis.18Naasepe medhetida ha miishe ubbay daro gidida gisho, ay mela deexiyako likey eretibeenna.19Solomoney Xoossa keethan de7iya miisheta ubbaa worqafe oosisis. Hessika worqafe oosetida yarsho bessa, Godaa sinthan wothiya uythay uttiya xarpheeza,20wogaa mela Ubbaafe Geeshsha Bessaa sinthan poo7ana mela xompe wothiya worqa kocaa, worqa xompeta,21walahi bayna worqafe oosetida ciishsha misileta, xompetanne qapheta,22xompe toysiyabata, xaarota, ixaane cuyisiyabatanne tama ekiya qapheta. Ha miisheti ubbay geeshsha worqafe oosetidosona. Xoossaa keethas kare bagga pengetanne Ubbaafe Geeshsha Bessaa geliya pengeta worqan tiyis.