እዮስያስ ፓስካ ባኣለ ቦንችስ
1እዮስያስ የሩሳላመን ጎዳ ፓስካ ባኣለ ቦንችስ። ኮይሮ አጌናን ታማነ ኦይዳን ጋላስ ፓስካ ዶርሳ ሹክዶሶና።2እዮስያስ ካህነታ ኦሶን ሹምድ፥ ኤንታ ፆሳ ኬ ኦሶን ምንስ።3ባንታና ጎዳስ ዱማይዳ፥ እስራኤለ ኡባ ታማርስያ ሌወታ ሀይሳዳ ያግስ፤ “ጌሻ ታቦትያ ዳዊታ ናአይ፥ እስራኤለ ካዎይ ሶሎሞነይ ኬፅዳ ፆሳ ኬን ዎተ። ህዛፐ ጉየ ታቦትያ ህንተ ሀሸን ቶካናዉ ኮሸና። ሀእ ጎዳስ፥ ህንተ ፆሳስነ፥ እያ አሳ እስራኤለስ ኦተ።4እስራኤለ ካዎይ ዳዊቲነ እያ ናአይ ሶሎሞነይ ፃፍዳይሳዳ ህንተ ጩጋን ጩጋንነ ህንተ ሶ አሳን አሳን ህንተና ጊግስተ።5ሌወት ህንተ ዳቦታ፥ እስራኤለ ኮቻታ ማዳናዉ ህንተ ያራን ያራን ፆሳ ኬን ኤቅተ።6ጎዳይ ሙሰ ባጋራ ኦድዳ ቃላ እስራኤለ አሳይ፥ ህንተ ዳቦት ናጋና መላ ግግስተ፤ ህንተካ ህንተናተ ጌሽተ ፓስካ ዶርሳ ሹክተ” ያግስ።7እዮስያስ ሄ በሳን ደእያ አሳስ፥ ፓስካ ያርሾ ግዳና መላ 30,000 ዶርሰነ ዴሸ እሚስ፤ ቃስ 3,000 ኮርማታ እሚስ። ሄ ኡባ ካዎይ ባ ሻሉዋፐ እሚስ።8ካዎ ሹማት ባንታ ሸነን አሳስ፥ ካህነታስነ ሌወታስ ያርሾ መሄ እምዶሶና። ፆሳ ኬ ሀላቃት ካልቀይ፥ ዛካርያስነ ይኤል ፓስካ ያርሾስ ግድያ ናምኡ ሙኩሉነ ኡሱፑን ፄቱ ማራዘታ፥ ሄ ፄቱ ኮርማታ እምዶሶና።9ሌወታ ሀላቃት ኮናነይነ እያ እሻት፥ ሻማየይነ ናትናኤል፥ ቃስ ሀሻብ፥ ይኤልነ ዮዛባት ፓስካ ያርሾስ ሀንያ እቻሹ ሙኩሉ ማራዘታነ ኮለታ፥ እቻሹ ፄቱ ኮርማታ እምዶሶና።10ፓስካ ባልያስ ኡባባይ ጊግስ፤ ካዋ ኪታን፥ ካህነት ባንታ በሳን በሳን፥ ሌወት ባንታ ጩጋን ጩጋን ኤቅዶሶና።11ፓስካ ዶርሳት ሹከትዶሶና፤ ሌወት ጋልባ ቃርዶሶና፤ ካህነት ሱ ያርሾ በሳ ቦላ ርጮሶና።12ሙሰ ማፃፋን ፃፈትዳይሳዳ አሳይ ጎዳስ ያርሻና መላ ፁሳ ያርሾስ ጊግዳ ዶርሳታ አሹዋ ሌወት ባንታ ሶ አሳን አሳን ሻከትድ ኡትዳ እስራኤለ ያራታስ እምዶሶና፤ ኮርማታካ ሄሳዳ ኦዶሶና።13ሌወት ዎጋይ ኪተይሳዳ ሹከትዳ ፓስካ ዶርሳ አሹዋ ታማን ጫጭዶሶና፤ ጌሻ ያርሾታ ፃሮን፥ ኦቶንነ ድስተን ዶይስድ፥ እስራኤለ አሳ ኡባስ ኤሶን ሻክድ ሻክድ እምዶሶና።14ሄሳፈ ጉየ፥ ሌወት ባንታዉነ አሮና ኮቸ ግድዳ ካህነታስ ፓስካ ያርሾ ጊግስዶሶና። ሄሳ ኤንቲ ኦዳይ፥ ካህነት ፁሳ ያርሾነ ሞዋ ያርሽሸ ቃማ ጋካናዉ ኦያ ግሾሳ።15ዳዊቲ፥ አሳፍ፥ ሄማንነ ካዋ ናበይ ኤድታም ካሰ ኪትዳይሳዳ አሳፋ ያራት፥ ማዝሙረ የፀይሳት ባንታ በሳን ደኦሶና። ፐንገ ናገይሳት ባንታ በሳን ደኦሶና። ኤንታ ዳቦት፥ ሌወት ኤንታዉ ጊግስዳ ግሾ ኤንቲ ባንታ ኦሱዋ አግቦኮና።16ጎዳስ ኦያ ኦሶ ኡባይ፥ ፓስካ ባኣለ ቦንቾይነ ፁሳ ያርሾይ፥ ካዎይ እዮስያስ ኪትዳይሳዳ ሀንድ ሄ ጋላስ ጊግስ።17ያን ሺቅዳ እስራኤለ አሳይ ሄ ጋላስ ፓስካ ባልያ ቦንችዶሶና፤ ኤንቲ ኡይ ባኣለ ላፑን ጋላስ ቦንችዶሶና።18ናብያ ሳሜላ ዎድያፐ ዶምን፥ ሄሳ መላ ፓስካ ባለይ እስራኤለን ቦንቸትቤና። እዮስያስ፥ ካህነት፥ ሌወት፥ ይሁዳ አሳይ፥ እስራኤለ አሳይነ የሩሳላመ አሳይ ቦንችዳይሳዳ ፓስካ ባኣለ ካሰ እስራኤለ ካዎታፐ ቦንችዳ እሶይካ ባዋ።19ፓስካ ባለይ እዮስያስ ካዎትዳ ታማነ ሆስፑን ላይን ቦንቸትስ።እዮስያሳ ዉርሰ
20እዮስያስ ፆሳ ኬ ጊግስዳፐ ጉየ ግብፀ ካዎይ ናኮይ ኤፍራፂሳ ሻፋ ማታን ደእያ ካርካምሻን ኦለታናዉ ብስ። እዮስያስ እያ ተቃናዉ ከይስ።21ሽን ናኮይ እዮስያሳኮ አሰ ኪትድ፥ “ይሁዳ ካዋዉ፥ ታናነ ነና ካችያባይ አይቤ? ታኒ ይዳይ ታ ሞርከታ ኦላናሳፈ አትሽን፥ ነና ኦላናሳ ግደና። ታ ሞርከታ ታኒ ኤሶን ኦላናዳ ፆሳይ ታና ኪትስ። ፆሳይ ነና ይሶናዳ ታራ ደእያ ፆሳራ ኤቀተይሳ አጋ” ያግስ።22ግዶሽን፥ እዮስያስ ጎዳይ ናኮ ባጋራ ኦድዳይሳ ስኦናነ ጉየ ስሞና እፅስ። ባ ካዎ ማኡዋ ላምድ ማግዶ ደንባን ኦለታናዉ ብስ።23ዶንገን ዱከይሳት ካዋ እዮስያሳ ጫድን፥ ካዎይ ባ አይለታኮ፥ “ታኒ ኢታ ጫደትዳ ግሾ ታና ኦላ ግዶፈ ከስተ” ያግስ።24እዮስያሳ ፓራ ጋርያፐ ዎስድ፥ እያ ፓራ ጋርያን ዎድ፥ እያ የሩሳላመ ኤህዶሶና። እ ያን ሀይቅድ ባ ማይዛታ ዱፎን ሞገትስ። ይሁዳ አሳይነ የሩሳላመ አሳ ኡባይ እያዉ ዬክዶሶና።25ናበይ ኤርምያስ እዮስያሳስ ዘለልስ ከስድ ፃፍስ። ዘሌልድ ዬክያ ማጫሳይነ አደ ኡባይ ሀች ጋካናዉ እዮስያሳስ ቆፖሶና። ሄ ዘለልሳይ እስራኤለ ዬሆ ዘለልሳ ማፃፋን ፃፈትስ።26እዮስያስ ኦዳ ሀራባይ፥ ጎዳ ህገን ማፃፋን ፃፈትዳይሳ መላ እ ኦዳ ሎኦ ኦሶይነ27ኮይሮፐ ዉርሰ ጋካናዉ እ ኦዳ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ።