Yihuda Kawa Hizqiyaasa
1Hizqiyaasi kawotiya wode iyaw laythi laatamanne ichasha; I Yerusalaamen laatamanne uddufun laythi kawotis. Iya aaye sunthay Abu; iya Zakariyasa na7a.2Iya mayzay Dawiti oothidaysada Hizqiyaasi Godaa sinthan suureba oothis.3Hizqiyaasi ba kawotida koyro laythan, koyro ageenan, Xoossa keethaa pengeta dooyidi oorathis.4Kahinetanne Leeweta Xoossa keethaa doloha baggara de7iya dabaaban shiishis.5Entako, “Leeweto, ta odeysa si7ite! Hintenatethaa geeshshite; Godaa hinte aawata Xoossa keethaa geeshshite; Xoossa keethaa tunisiyaba ubbaa diggite.6Nu aawati ammanetibokona; Godaa, nu Xoossaa sinthan iitabaa oothidosona. Enti Godaa aggidi, Goday de7iya bessaafe banta som7o hara soo zaaridi, iyaw banta zokuwa zaaridosona.7Qassi, enti Xoossa keethaa pengeta gordidosona; xompeta toysidosona. Xoossa keethan Isra7eele Xoossaas ixaane cuyisibookona woyko xuussa yarsho yarshibookona.8Hessa gisho, Godaa hanqoy Yihuda bollanne Yerusalaame bolla wodhis. Hinte, hinte ayfen be7eysada Goday enta bolla yashshi, dagamanne hirga yeddis.9Hessa gaason, nu aawati mashshan hayqidosona; nu naytinne nu macheti di7etidosona.10Godaa hanqoy nu bollafe kichana mela taani Godaara, Isra7eele Xoossara caaqanaw ta wozanan qopas.11Ta nayto, hinte Godaa sinthan eqana mela, iyaw oothana mela, iya oosancho gidana melanne ixaane cuyisana mela Goday hintena doorida gisho qelli goopite” yaagis.12He bessan de7iya Leeweti haysafe kaallidi xaafetidaysata. Qahaata yaraape Amasaya na7aa Mahaatanne Azaariyasa na7aa Iyyu7eela. Maraara yaraape Abda na7aa Qiisanne Yihali7eela na7aa Azaariyasa. Gedisoona yaraape Ziima na7aa Iyo7akinanne Yo7aaha na7aa Edena.13Elxafaana yaraape Shimiranne Uzi7eela. Asaafa yaraape Zakariyasanne Mataana.14Amaana yaraape Yi7eelanne Same7a. Edotaame yaraape Shamayanne Uzi7eela.15Enti banta dabbota shiishidi bantana geeshidaape guye kawoy enta kiittidaysada Godaa higgiyada Xoossa keethi geeshsho doomidosona.16Hessa gisho, kahineti Godaa keethaa geeshshanaw gelidosona; Xoossa keethaa giddon de7iya tunaba ubbaa kessidi, Xoossa keethaa dabaaba ehidosona. Yaatin Leeweti ekidi Qediroona Zangaaran holidosona.17Enti koyro ageenan, koyro gallas Xoossa keethaa geeshsho doomidosona; he ageenan hospuntho gallas barandaa gakidosona. Hara hospun gallas Xoossa keethaa goyinnoos giigisidosona. Koyro ageenan tammanne usupuntho gallas enti oosuwa polidosona.18Leeweti kawa Hizqiyaasako gelidi, “Nuuni Xoossa keethaa, xuussa yarsho bessaanne yarsho bessan go7etiya miishe ubbaa, Godaa sinthan wothiya uythaa xarpheezanne he xarpheezan de7iya miisheta ubbaa geeshshida.19Kawoy Akaazi kawotidi de7iya wode Xoossas ammanetona ixidi efida miishe ubbaa nu zaaridi geeshshida. Heko, nu geeshshida miishe ubbay Godaa yarsho bessa sinthan de7ees” yaagidosona.20Kawoy Hizqiyaasi wontetha gallas wonta guura dendidi katamaa halaqata shiishidi, entara issife Xoossa keethi bis.21Enti kawotethaa gisho, Xoossa keethaa gishonne Yihuda asaa gisho, laapun kormata, laapun marazeta, laapun dorsa urgetanne laapun koleta nagara yarshos ehidosona. Aarona koche gidiya kahineti, Godaa yarsho bessan haysata yarshana mela kawoy kiittis.22Kahineti kormata shukidi suuthaa yarsho bessa bolla dharcidosona. Marazeta shukidi suuthaa yarsho bessa bolla dharcidosona. Dorsa urgeta shukidi suuthaa yarsho bessa bolla dharcidosona.23Nagara yarshos haniya koleta kawa sinthenne asaa sinthe ehidosona; enti ubbay banta kushiya deeshata bolla wothidosona.24Kawoy xuussa yarshonne nagara yarsho yarshana mela enta kiitida gisho kahineti deeshata shukidi Isra7eele asa ubbaa nagaray atto geetetana mela enta suuthaa yarsho bessan yarshidosona.25Goday kawas qoncethi be7iya Gaadenne nabiya Naatana baggara kawa Dawiti kiitida kiita Hizqiyaasi kaallidi, Leeweta, daala, diithinne maasinqo oythidi Xoossa keethan essis.26Leeweti Dawiti go7etiya yetha miisheta oykin, kahineti zaye oykidi eqidosona.27Enti xuussa yarsho yarshana mela Hizqiyaasi kiittis. Xuussa yarshoy yarshetiya wode zayeynne Isra7eele kawa Dawita yetha miishetan Godaas yethi doometees.28Xuussa yarshoy poletana gakanaw shiiqo ubbay Godaa goyinnees; yexeysati yexoosona; zaye punneysati punnoosona.29Kahineti yarshuwa polida wode kawoynne iyara de7iya asa ubbay gulbatidi goyinnidosona.30Kawoy Dawitinne qoncethi be7iya Asaafi xaafida galataa mazmure Godaas yexana mela kawoy Hizqiyaasinne halaqati Leeweta kiittidosona; Enti ubbay ufaysan galatishe gulbatidi goyinnidosona.31Hessafe guye, Hizqiyaasi, “Ha77i hinte hintena Godaas dummayideta. Yarshonne galata yarsho Xoossa keethi ehite” yaagis. Shiiqida asay yarshonne galata yarsho ehidosona; wozani dosida asay xuussa yarsho ehidosona.32He shiiqida asay ehida xuussa yarsho tayboy laapun tammu kormata, xeetu marazetanne nam7u xeetu dorsa urgeta; he ubbay Godaas xuussa yarsho.33Issifetetha yarshos usupun xeetu kormatanne heedzu mukulu dorsati shiiqidosona.34Gidoshin, xuussa yarsho ubbaa shukidi, galbaa qaaranaw de7iya kahineti taybon guutha gidiya gisho oosoy wurana gakanawunne hara kahineti bantana geeshshana gakanaw enta dabbo gidida Leeweti maaddidosona. Bantana geeshon Leeweti kahinetape aadhidi ammanetosona.35Xuussa yarshora shiiqiya issifetetha yarshuwa, modhuwanne ushsha yarshuwa gujiya wode xuussa yarshoy daro. Hessada hanidi Xoossa keethaa oosoy zaaridi doomis.36Hizqiyaasinne asa ubbay oosuwa ellesidi polana mela Xoossay enta maaddida gisho daro ufaytidosona.