ይሁዳ ካዋ እዮኣሳ
1እዮኣስ ካዎትያ ዎደ እያዉ ላይ ላፑና፤ እ የሩሳላመን ኦይታሙ ላይ ካዎትስ። እያ አየ ሱንይ ሳቦ፤ እያ በርሳበ ማጫስ።2ካህነይ ዮዳሄይ ደእዳ ላይ ኡባን እዮኣስ ጎዳ ስንን ሱረባ ኦስ።3ዮዳሄይ ካዋ እዮኣሳስ ናምኡ ማቾ እምን ኤንቲ እያዉ አደ ናይታነ ማጫ ናይታ የልዶሶና።4ጉ ዎደፐ ጉየ እዮኣስ ፆሳ ኬ ኦራናዉ ቆፕስ።5እዮኣስ ካህነታነ ሌወታ ሺሽድ፥ “ይሁዳ ብድ ህንተ ፆሳ ኬ ላይን ላይን ኦራናዉ እስራኤለ ኡባፈ ሚሸ ሺሽተ፤ ሄሳ ሀእ ኤለስድ ኦተ” ያግስ። ሽን ሌወት ኤለስድ ኦቦኮና።6ሄሳ ግሾ፥ ካዎይ ካህነ ሀላቃ ዮዳሄ ፄግድ፥ “ጎዳ አይለይ ሙሰይነ የሩሳላመ አሳይ ፆሳ ዱንካንያ ኦሱዋስ ከሳና መላ ኪትዳ ጊራ የሩሳላመፐነ ይሁዳፐ ሺሻና መላ ሌወታ አይስ ኪታብኪ?” ያግስ።7ሄ ዎደ ኢታ ማጫሰ ጎቶላ ናይት ፆሳ ኬ መንዶሶና። ኤንቲ ጎዳ ኬን ደእያ ጌሻ ሚሸ ኡባ ኤክድ ባኣለ ጎይናናዉ ጎኤትዶሶና።8ካዎይ ሌወታ ኪትን፥ ኤንቲ ሳፅነ ጊግስድ፥ ፆሳ ኬ ፐንግያፈ ካረ ባጋራ ዎሶና።9ፆሳ አይለይ ሙሰይ መላ ቢታን ደእሸ፥ እስራኤለ አሳፐ ሺሻና መላ ኪትዳ ጊራ ጎዳስ ኤሀና መላ ይሁዳንነ የሩሳላመን ሌወት አዋጅዶሶና።10ሀላቃትነ አሳ ኡባይ ኡፋይትድ ሳፅነይ ኩማና ጋካናዉ ጊራ የግዶሶና።11ሳፅነይ ሌወታ ባጋራ ካዎ ሞርናታኮ ጋክን ሳፅንያ ግዶን ዳሮ ሚሸይ ዳጋየትዳይሳ በእዳ ዎደ ኡባን ካዎ ፃፈይነ ካህነ ሀላቃይ ይድ ሳፅንያፐ ሚሸ ከስድ ሳፅንያ በሳን ዛር ዎሶና። ኤንቲ ኡባ ዎደ ሄሳ ኦድ ዳሮ ሚሸ ዳጋይዶሶና።12ሄ ሚሽያ ካዎይነ ዮዳሄይ ፆሳ ኬ ኦሱዋ ኦና መላ ሹመትዳ አሳታስ እሞሶና። ኤንቲ ፆሳ ኬ ኦራናዉ ሹቹ ማሰይሳታ፥ አናፀታ፥ ብራታነ ናሰ ብራታ ኦሳንቾታ ቃፃርዶሶና።13ኦሳንቾት ፆሳ ኬ ምን ኦድ ካሰይሳዳ ኦራዶሶና።14ፆሳ ኬ ኦራ ኦሶይ ዉርዳ ዎደ ፓላህዳ ዎርቃነ ብራ ካዋኮነ ዮዳሄኮ ኤህዶሶና። ኤንቲ ሄ ዎርቃነ ብራ ፆሳ ኬ ጋ ኦሱዋስ ጎኤትያ ሚሸታ፥ ፁሳ ያርሾስ ሀንያ ሳነታነ ሀራ ዱማ ዱማ ሚሸታ ኦዶሶና። ዮዳሄይ ደእዳ ላይን ኡባን ፆሳ ኬን ፁሳ ያርሾይ ያርሸቴስ።15ዮዳሄይ ዳሮ ጭምድ ሀይቅስ፤ እ ሀይቅያ ዎደ እያዉ ላይ ፄታነ ሀስታማ።16ዮዳሄይ እስራኤለን ፆሳስነ ፆሳ ኬስ ሎኦባ ኦዳ ግሾ ዳዊታ ካታማን ካዎታ ዱፎን እያ ሞግዶሶና።እዮኣሳ ኢታተ
17ዮዳሄይ ሀይቅዳፐ ጉየ ይሁዳ ሀላቃት ይድ ካዋ ስንን ጉፋንዶሶና፤ ካዎይ ኤንታ ኦይሻ ስእስ።18ኤንቲ ጎዳ ባንታ ማይዛታ ፆሳ ኬ አግድ፥ አሼር ምስለታነ ኤቃታ ጎይንዶሶና። ኤንቲ ቆሁዋ ግሾ ይሁዳ ቦላነ የሩሳላመ ቦላ ጎዳ ሀንቆይ ዎስ።19ኤንታ ዛራና መላ ጎዳይ ናበታ ኤንታኮ ኪትስ። ናበት ኤንታዉ ማርካትዶሶና፤ ሽን ኤንቲ ስኦና እፅዶሶና።20ሄሳፈ ጉየ፥ ካህንያ ዮዳሄ ናኣ ዛካርያሳ ቦላ ፆሳ አያናይ ዎን ዛካርያስ አሳ ስንን ኤቅድ፥ “ፆሳይ፥ ‘ህንተ ጎዳ ኪታ አይስ መንቲ? ሄስ ህንተዉ ኢታ። ህንተ ጎዳ አግዳ ግሾ እካ ህንተና አግስ’ ” ያጌስ።21ኤንቲ እያ ቦላ ማቀትዶሶና። ካዎይ ኤንታ ኪትን፥ ፆሳ ኬ ዳባባን፥ እያ ሹቻን ጫድድ ዎዶሶና።22ካዎይ እዮኣስ ዛካርያሳ አዋይ ዮዳሄይ እያዉ ኦዳ ኬሀተ ሀሳዮና አግድ እያ ናኣ ዛካርያሳ ዎስስ። ዛካርያስ ሀይቅሸ፥ “ጎዳይ ሀይሳ በኦ፤ እ ሀሎ ከዮ” ያግስ።23ላይ ላመን፥ ሶረ ኦላንቾት እዮኣሳ ኦላናዉ ይዶሶና። ይሁዳነ የሩሳላመ ኦልድ ሀላቃታ ኡባ ዎድ፥ ድኡዋ ኤክድ ዳማስቆን ደእያ ባንታ ካዋስ የድዶሶና።24ሶረ ኦላንቾት ታይቦን ጉ፤ ሽን ይሁዳ አሳይ ጎዳ ባንታ አዋታ ፆሳ አግዳ ግሾ፥ ጎዳይ ዳሮ ግድዳ ኤንታ ኦላንቾታ ሶረ ኦላንቾታ ኩሸን አድ እሚስ። ኤንቲ ሀይሳዳ ኦድ እዮኣሳ ቦላ ፕርድዶሶና።25ሶረ ኦላንቾት እያፐ ሻከትያ ዎደ እዮኣስ ዳሮ ማዱንፅድ ደኤስ። ካህንያ ዮዳሄ ናኣ ሱ ግሾ እያ ሹማት እያ ቦላ ማቀትድ፥ እ ባ ሂፃን ዝንእዳሽን ዎዶሶና። እ ሀይቅን ዳዊታ ካታማን ሞግዶሶና፤ ሽን ካዎታ ዱፎን እያ ሞግቦኮና።26እዮኣሳ ቦላ ማቀትዳይሳት አሞነ ማጫሰ ስማት ናኣ ዛባዳነ ሞአበ ማጫሰ ስማርት ናኣ ዮዛባታ።27ሄኮ፥ እዮኣሳ አደ ናይታ ታርከይ፥ እያዉ ኦደትዳ ትንብተይነ እ ፆሳ ኬ ኦራዳባይ ካዎታ ታርከ ማፃፋን ፃፈትድ ደኤስ። እዮኣስ ሀይቅን እያ በሳን እያ ናአይ አማስያስ ካዎትስ።