1ሄሳፈ ጉየ፥ እዮሳፈፅ ሀይቅድ ባ ማይዛታራ ጋሄትስ። ዳዊታ ካታማን ባ ማይዛታ ዱፎን ሞገትስ። እያ በሳን እያ ናአይ እዮራም ካዎትስ።
ይሁዳ ካዋ እዮራማ
2እዮራማ እሻት አዛርያሳ፥ ይኤላ፥ ዛካርያሳ፥ አ ዛርያሳ፥ ምካኤላነ ሳፋፃ፤ ሀይሳቲ ይሁዳ ካዋ እዮሳፈፃ ናይታ።3ኤንታ አዋይ እዮሳፈፅ ኤንታዉ ዳሮ ብራ፥ ዎርቃ፥ አልኦ ሚሸነ ግምበትዳ ካታማታ እሚስ። ሽን እዮራም እያዉ ባይራ ናአ ግድያ ግሾ ካዎተ እያዉ እሚስ።4እዮራም ባ አዋ ካዎተ ኤክድ ምንዳ ዎደ ባ እሻታ ኡባነ እስ እስ እስራኤለ ሀላቃታ ማሻን ዎስ።5እዮራም ካዎትያ ዎደ እያዉ ላይ ሀስታማነ ናምአ፤ የሩሳላመን ሆስፑን ላይ ካዎትስ።6እዮራም አካባ ናእዉ ኤክዳ ግሾ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንን ኢታባ ኦስ።7ግዶሽን፥ ጎዳይ ካሰ ዳዊታራ ጫቅዳ ጫቁዋ ግሾ ዳዊታ ኮቻ ይሳናዉ ኮይቤና። ዳዊታ ኮቻይ መርናዉ ካዎታና መላ ጎዳይ እያዉ ጫቅስ።8እዮራማ ካዎተ ላይን፥ ኤዶመ አሳይ ይሁዳ ካዋ ቦላ ማካልድ ባንታዉ ካዎ ካዎዶሶና።9ሄሳ ግሾ፥ እዮራም ቶራ ሞጮናታነ ፓራ ጋረታ ኤክድ ኤዶመ ኦላናዉ ብስ። ኤዶመ አሳይ እያነ እያ ፓራ ጋረታ ሀላቃታ ኦልዶሶና። ሽን እዮራምነ እያ አሳይ ቃማ ደንድድ ባቃትዶሶና።10ሄ ዎደፐ ዶምድ ሀች ጋካናዉ ኤዶመ አሳይ ይሁዳ አሳስ ሃረትቦኮና። እዮራም ጎዳ፥ ባ አዋታ ፆሳ አግዳ ግሾ ልብና አሳይ ሄ ዎደ ይሁዳ ካዋ ቦላ ማካልዶሶና።11እዮራም ይሁዳ ገዘ ቢታን ቃ ጎይኖ በሳታ ጊግስስ፤ የሩሳላመን አሳ ላይማታና መላ ኦስ፤ ይሁዳ አሳካ ባለስ።12ናበይ ኤልያስ እዮራማስ ዳብዳበ ሀይሳዳ ያግድ ፃፍስ፤ “ጎዳይ፥ ነ አዋ ዳዊታ ፆሳይ፥ ‘ኔኒ ነ አዋ እዮሳፈፃ ዎይኮ ይሁዳ ካዋ አሳ ኦግያን ሄመታናይሳ አጋዳ፥13እስራኤለ ካዎታ ኦግያን ሄመታዳሳ። አካባ ሶ አሳይ ኦዳይሳዳ ይሁዳንነ የሩሳላመን ደእያ አሳይ ኤቃ ጎይናና መላ ኦዳሳ። ቃስ ኔፐ ሎእያ፥ ነ አዋ ሶ አሳ፥ ነ እሻታ ዎዳሳ።14ሄሳ ግሾ፥ ጎዳይ ነ አሳ፥ ነ ናይታ፥ ነ ማቸታነ ነዉ ደእያ ኡባ ዎልቃማ ጋዶን ሾጫና።15ነና ማራጨ ሀርገይ ኦይክን፥ ማራጨይ ካረ ከያና ጋካናዉ ነ ኢታ ሳከታና።’ ”16ጎዳይ ፍልስፄመታነ ቶጰ ማታን ደእያ አራበታ እዮራማ ኦላና መላ ደንስ።17ኤንቲ ይሁዳ ቦላ ደንድድ ካዎ ጋን ደእያ ሚሸ ኡባ፥ ካዋ አደ ናይታነ እያ ማቸታ ድእዶሶና። ቃስ፥ እያ ናይታ ኡባፈ ካሎ ግድዳ አካዝያሳፐአትሽን፥ ሀራ እስ ናእካ አትቤና።18ሄሳፈ ጉየ፥ ጎዳይ ፓፃናዉ ዳንዳኦና ማራጨ ሀርገን እዮራማ ሾጭስ።19ናምኡ ላይ ግዶን ሀርገይ እያ ቦላ ጎብስ፤ እያ ማራጨይ ካረ ከይስ፤ እ ኢታ ሳከትድ ሀይቅስ። እያ ሞግያ ዎደ አሳይ ካሰ ማይዛታስ ኦዳይሳዳ እያ ቦንቾስ ም ዶርድ ታማ ኤቦኮና።20እዮራም ካዎትያ ዎደ እያዉ ላይ ሀስታማነ ናምአ፤ እ የሩሳላመን ሆስፑን ላይ ካዎትስ። እ ሀይቅያ ዎደ ኦንካ አዛንቤና። እዮራም ዳዊታ ካታማን ሞገትስፐ አትሽን፥ ካዎታ ዱፎን ሞገትቤና።