ሞአበነ አሞነ ፆነተ
1ሄሳፈ ጉየ፥ ሞአበትነ አሞነት ማኡናት እዮሳፈፃ ቦላ ደንድዶሶና።2ጉ አሳት እዮሳፈፃኮ ይድ፥ “ማፅነ አባፈ ሄፍንን ደእያ ኤዶመፐ ዳሮ ኦላንቾት ነና ኦላናዉ ይዶሶና። ኤንቲ ሀሳሶን-ታማራን ደኦሶና” ያግድ ኦድዶሶና። (ሀሳሶን-ታማር ኤንጋዳስ ሀራ ሱን።)3እዮሳፈፅ ያይዳ ግሾ ጎዳ ኦይቻናዉ ቆፋ ቃችስ፤ ይሁዳ ቢታ ኡባን ፆማ አዋጅስ።4ይሁዳ አሳ ኡባይ ጎዳፐ ማዶ ኮያናዉ ሺቅዶሶና፤ ኤንቲ ጎዳፐ ማዶ ኮያናዉ ይሁዳ ካታማ ኡባፈ ይዶሶና።5እዮሳፈፅ፥ ይሁዳነ የሩሳላመ ሺቁዋ ግዶን፥ ፆሳ ኬን ደእያ ኦራ ዳባባ ስንን ኤቅስ።6ባ ቃላ ቁ ኦድ፥ “አቤት ጎዳዉ፥ ኑ አዋታ ፆሳዉ፥ ሳሎን ደእያ ፆሳይ ነና ግድኪ? ሳአን ደእያ ካዎተታ ኡባ ሃረይ ነና። ግታተነ ዎልቅ ነ ኩሸን ደእያ ግሾ ኔራ ኤቀታናዉ ዳንዳኤይ ባዋ።7አቤት ኑ ፆሳዉ፥ ካሰ ሀ ቢታን ደእያ አሳ፥ እስራኤለ ስንፈ የደዳ ነ ላግያ አብራሃመ ዘረስ መርናዉ እምዳይ ነና ግድኪ?8ኤንቲ ሀ ቢታን ደእዶሶና፤ ያን ነ ሱንስ ኬ ኬፅድ፥9‘ኑ ቦላ ኢታ መቶይ ዎይኮ ኦል ዎይኮ ጋዶይ ዎይኮ ኮሽ ጋክኮ፥ ነ ሱንይ ደእያ ነ ኬ ስንንነ ነ ስንን ኤቅድ፥ ኑ መቱዋን ኔኮ ዋሳና። ነ ኑ ዋሱዋ ስአዳ ኑና አሻና’ ያግዶሶና።10“ሄኮ፥ ሀእካ፥ እስራኤለ አሳይ ግብፀፈ ከይዳ ዎደ፥ ኤንታ ቢታ ኦሎና መላ ኦዳ ኤንታ ይሶና መላ ድግዳ አሞነት፥ ሞአበትነ ሳይረት ሀ ቢታን ደኦሶና።11ኑ ኦዶባስ ኤንቲ ኑስ ዛርዳባ በአ። ነ ኑስ እምዳ ላታ ቢታፈ ኤንቲ ኑና የደናዉ ይዶሶና።12አቤት ኑ ፆሳዉ፥ ነ ኤንታ ፕርድኪ? ኑና ኦላናዉ ይዳ ሀ ዳሮ ኦላንቾታራ ኦለታናዉ ኑስ ዎልቅ ባዋ። ኑኒ ኦናባ ኤሮኮ፤ ሽን ኑ አይፈት ነና ፄሎሶና” ያግስ።13ይሁዳ አሳ ኡባይ ባንታ ናይታራነ ባንታ ማቸታራ ሺቅድ ጎዳ ስንን ኤቅዶሶና።14ሄ ዎደ ዛካርያሳ ናአይ ያሀዝኤል ሺቁዋ ግዶን ኤቅዳሽን ጎዳ አያናይ እያ ቦላ ዎስ። ዛካርያስ ባናያ ናአ፤ ባናይ ይኤላ ናአ፤ ይኤል ማታና ናአ፤ ማታን ሌወ ኮቸነ አሳፋ ያራ።15ጎዳ አያናይ ያሀዝኤላ ቦላ ዎን፥ “ካዋዉ እዮሳፈፃ፥ ይሁዳንነ የሩሳላመን ደእያ አሳዉ፥ ኡባይ ስእተ! ጎዳይ ህንተና ያጌስ። ‘ሀ ዳሮ ኦላንቾታ ጋሶን ያዮፍተነ ዳጋሞፕተ። ኦላይ ህንተባ ግዶናሽን ፆሳባ።16ዎንቶ ኤንታ ቦላ ከይድ ፂፃ ጌተትያ በሳ ፑደ ከይሽን ይሩኤላ መላ ቢታን ደእያ ዛንጋራ ዉርሰን ህንተ ኤንታ ደማና።17ሀ ኦላ ኦለተይ ህንተና ግደከታ። ይሁዳነ የሩሳላመ አሳዉ፥ ህንተ በሳ በሳ ኦይክድ ምንድ ኤቅተ። ጎዳይ ህንተና አሽያ አሹዋ በእተ። ያዮፍተ፤ ዳጋሞፍተ፤ ዎንቶ ኤንታ ቦላ ከይተ፤ ጎዳይ ህንተራ ግዳና’ ” ያግስ።18እዮሳፈፅ ሶምኦ ሳአ ጋድ ጎይንስ፤ ይሁዳ አሳ ኡባይ የሩሳላመን ደእያ አሳ ኡባይ ጎዳ ስንን ኩንድድ ጎይንዶሶና።19ቃሃታነ ቆረ ኮቻፈ ጉ ሌወት ኤቅድ ባንታ ቃላ ቁ ኦድ፥ ጎዳ እስራኤለ ፆሳ ጋላትዶሶና።20ኤንቲ ዎንታ ጉራ ደንድድ ተቁሄ መላ ቢታ ብዶሶና። ኤንቲ ከይዳ ዎደ እዮሳፈፅ ደንድ፥ “ይሁዳንነ የሩሳላመን ደእያ አሳዉ ታኒ ገይሳ ስእተ። ጎዳን፥ ህንተ ፆሳን አማነትተ፤ ህንተ ምናና፤ ናበታ አማንተ ኡባይ ህንተዉ እንጀታና” ያግስ።21እዮሳፈፅ አሳራ ዞረትዳፐ ጉየ፥“ጎዳ ጋላትተ፥እያ ሲቆይ መርናሳ” ያግድ የፅሸነ እያ ጌሻ ቦንቹዋ ሳቢሸ ኦላንቾታ ስንራ ብያ አሳታ ሹምስ።22ኤንቲ ማዝሙረ የነ ጋላታ ዶምዳ ዎደ ይሁዳ ኦላናዉ ይዳ አሞነታ ቦላ፥ ሞአበታ ቦላነ ሳይረታ ቦላ ጎዳይ ዳጋማ የድስ።23አሞነትነ ሞአበት ሳይረታ ቦላ ደንድድ፥ ኤንታ ኩመ ይስዶሶና። ኤንቲ ሳይረታ ይስዳፐ ጉየ ባንታ ግዶን እሶይ እሱዋ ይስዶሶና።24ይሁዳ አሳይ መላ ቢታን ደእያ ኦላንቾታ በአናዉ ይዳ ዎደ ባንታ ሞርከት ደእያ በሳ በእዶሶና። ኤንታ አሀይ ቢታን ዝንእዳይሳ ደምዶሶና፤ ኤንታፈ እስ አስካ ከስ ኤክቤና።25ሄሳፈ ጉየ፥ እዮሳፈፅነ እያ አሳይ ድኦ ኤካናዉ ብድ ሽንቀ፥ ኦላ ሚሸ፥ ማኦታነ ሀራ አልኦ ሚሸታ ደምዶሶና። ሽን ድኦ ኡባ ኤፋናዉ ዳንዳእቦኮና፤ ድእዳባይ ዳሮ ግድዳ ግሾ ሺሻናዉ ሄ ጋላስ ኤክስ።26ኤንቲ ኦይዳን ጋላሳን ባራካ ዛንጋራን ሺቅድ ጎዳ ጋላትዶሶና። ሄሳ ግሾ ሄ በሳ “አንጆ ዛንጋራ” ያግድ ሱንዶሶና።27ሄሳፈ ጉየ፥ ይሁዳ አሳይነ የሩሳላመ አሳ ኡባይ እዮሳፈፅ ካለን፥ ኡፋይሳን የሩሳላመ ስምዶሶና።28ኤንቲ የሩሳላመ ጋክድ ዲራ፥ ማስንቆራነ ዛየራ ፆሳ ኬ ገልዶሶና።29እስራኤለ ሞርከታ ጎዳይ ኦልዳይሳ ቢታን ደእያ ካዎተት ኡባይ ስእዳ ዎደ ያይዶሶና።30ያትድ ፆሳይ እዮሳፈፃስ ኡባ ባጋራ ሸምፖ እምዳ ግሾ እያ ካዎተይ ሳሮተ ደምስ።እዮሳፈፃ ዉርሰ
31እዮሳፈፅ ይሁዳን ካዎትያ ዎደ እያ ላይ ሀስታማነ እቻሻ፤ እ የሩሳላመን ላታማነ እቻሹ ላይ ካዎትስ። እያ አይያ ሽልሀ ናእዉ አዙቦ።32እዮሳፈፅ ባ አዋ አሳ ኦግያን ሄመትስ፤ እ ሄ ኦግያፐ ሀድርስ ኡሻች ግቤና፤ ጎዳ ስንን ሱረባ ኦስ።33ግዶሽን፥ ቃ ጎይኖ በሳታ ይስቤና፤ አሳይ ቡሮ ባ ኩመ ዎዛናን ባንታ አዋታ ፆሳኮ ስምቤና።34እዮሳፈፅ ኦዳባይ ኮይሮፐ ዉርሰ ጋካናዉ እስራኤለ ካዎታ ታርከ ማፃፋን፥ ሀናና ናኣ እዩ ታርከ ማፃፋን ፃፈትስ።35እስ ዎደ ይሁዳ ካዎይ እዮሳፈፅ ኢታባ ኦዳ እስራኤለ ካዋ አካዝያሳራ እስፈተ ኦስ።36ናምአይ ዛልኤ ማርካበ መናዉ ዞረትዶሶና፤ ኤፅዮን-ጋብራን ማርካበታ መዶሶና።37ግዶሽን ማሬሳ አደይ ዶዳ ናአይ አላዛር፥ “ኔኒ አካዝያሳራ እስፈተ መዳ ግሾ ነ ኦዳባ ጎዳይ ይሳና” ያግድ እዮሳፈፃ ቦላ ትንብተ ኦድስ። ሄሳ ግሾ፥ ማርካበት መቅዶሶና፤ ኤንቲ ዛልኤ ኦሱዋ ኦናዉ ዳንዳእቦኮና።