1ሄሳፈ ጉየ፥ ካዎይ እዮሳፈፅ የሩሳላመን ደእያ ባ ጋ ሳሮ ስምስ።2ቆንጨ በእያ፥ አናና ናአይ እዩይ ካዋ እዮሳፈፃራ ጋሄታናዉ ከይድ፥ “ኔኒ ኢታታ ማዳናዉ ዎይኮ ጎዳ እፀይሳታ ዶሳናው በሲ? ሄሳ ግሾ፥ ጎዳ ሀንቆይ ነ ቦላ ይስ።3ግዶሽን፥ አሼራ ኤቃ ምስለታ ቢታፈ ድግዳ ግሾነ ፆሳ ኮያናዉ ነ ዎዛና ጊግስዳ ግሾ ኔኒ ሎኦባ ኦዳሳ” ያግስ።
እዮሳፈፅ ዳይናታ ሹምስ
4እዮሳፈፅ የሩሳላመን ደእስ። በርሳበፐ ዶምድ ደረይ ዳርያ ኤፍሬማ ቢታ ጋካናዉ አሳ ግዶን ዩይድ፥ ጎዳኮ፥ ኤንታ አዋታ ፆሳኮ ኤንታ ዛርስ።5ይሁዳ ቢታን ደእያ ግምበትዳ ካታማታ ኡባን ዳይናታ ሹምስ።6ኤንታኮ፥ “ህንተ ፕርደይ አሳሳ ግዶናሽን፥ ህንተ ፕርድያ ዎደ ጎዳይ ህንተራ ደእያ ግሾ ህንተ ፕርድያ ዎደ ናገትተ።7ሀእካ ጎዳስ ያይተ፤ ጎዳ ኑ ፆሳ ማታን ናቆይ፥ ሶምኦ ፄልድ ማደይነ ዎፈ ኤኮይ ባይና ግሾ አኬክድ ፕርድተ” ያግስ።8ቃስ፥ ጎዳ ህግያ ፖልሳና መላነ አሳ ግዶን ደንድያ ሞቱዋ ፕርዳና መላ ሌወታፐ፥ ካህነታፐነ እስራኤለ አሳ ሶ ሀላቃታፐ ጉ አሳታ እዮሳፈፅ የሩሳላመን ሹምስ።9እዮሳፈፅ ኤንታ ሀይሳዳ ያግድ ኪትስ፤ “ጎዳስ ያሻን፥ አማነተንነ ኩመ ዎዛናን ኦተ።10ባንታ ካታማን ደእያ ህንተ እሻት ሸምፖ ዎን፥ ህገ ዎይኮ ኪታ ዎይኮ አዋጆ መንን ህንተኮ ዪኮ፥ ኤንቲ ጎዳ ስንን ባላ ግዶናዳ፥ እያ ሀንቆይ ህንተ ቦላነ ህንተ እሻታ ቦላ ዮናዳ ኤንታ ሴርተ። ህንተ ኤንታ ሴርኮ ህንተ ህንተ ሁጰን ባላ ግደከታ።11ጎዳባ ግድዳ ኡባን ካህነታ ሀላቃ አማረ፤ ካዎባ ግድዳ ኡባን ይሁዳ ኮቻስ ሀላቃ ግድዳ እስማኤላ ናኣ ዛባዳ ሹማስ። ሌወት ህንተ ቦላ ሀላቃ ግዳና። ህንተ ምንድ ኦተ፤ ሱረባ ኦይሳራ ጎዳይ ግዶ” ያግስ።