ይሁዳ ካዋ አብያ
1ካዎይ እዮርባም ካዎትዳ ታማነ ሆስፑን ላይን አብይ ይሁዳን ካዎትስ።2አብይ የሩሳላመን ሄ ላይ ካዎትስ። እያ አየ ሱንይ ምካዮ፤ እያ ግብአ አድያ ኡርኤላ ናአ። አብይነ እዮርባም ኦለትሸ ደእዶሶና።3አብይ ዶረትዳ ኦይዱ ፄቱ ሙኩሉ ምኖ ኦላንቾታ ኤክድ ኦላስ ከይስ። እዮርባም ዶረትዳ ሆስፑን ፄቱ ሙኩሉ ምኖ ኦላንቾታ ኤክድ አብያራ ኦለታናዉ ከይስ።4ሄሳፈ ጉየ፥ አብይ ደረይ ዳርያ ኤፍሬማ ቢታን ደእያ ፃማራይማ ደርያ ሁጰን ኤቅድ፥ ሀይሳዳ ያግስ፤ “ነኖ፥ እዮርባማ፥ ህንተኖ፥ እስራኤለ አሳዉ፥ ኡባይ ታ ግያባ ስእተ!5ጎዳይ እስራኤለ ፆሳይ ዳዊታነ እያ ኮቻይ እስራኤለ ቦላ መርናዉ ካዎታና መላ ዳዊታራ ማፅነን ጫቅዳይሳ ኤረከትዬ?6ግዶሽን፥ ዳዊታ ናኣ ሶሎሞነ አይለይ፥ ናባፃ ናአይ እዮርባም ደንድድ ባ ጎዳ ቦላ ማካልስ።7ሮብኣም ዮጋ፥ ኤር ባይናይሳነ ኤንታራ ኤቀታናዉ ዳንዳኦና ዎደ ፓና ላፋ አሳት እዮርባማኮ ሺቅድ ሶሎሞነ ናኣ ሮብኣማ ቦላ ደንድዶሶና።8“ጎዳይ ዳዊታ ኮቻስ እምዳ ካዎተራ ህንተ ኤቀታናዉ ቆፔታ። ህንተ ሄሳ ቆፕዳይ ህንተ ዳሮ ግድያ ግሾነ ፆሳታ ግዳና መላ እዮርባም ዎርቃፈ መዳ ማራት ህንተራ ደእያ ግሾሳ።9ጎዳስ ኦያ አሮና ኮቸ ግድዳ ኦያ ካህነታነ ሌወታ ህንተ የደደታ። ሀራ ቢታ አሳይ ኦይሳዳ ህንተዉ ሀራ ካህነታ ሹምደታ። ባና ዱማያናዉ እስ ዎፋኖነ ላፑን ማራዘ ኤክድ ያ ኦናካ ዎርዶ ፆሳታስ ካህነ ኦድ ሹማታ።10“ግዶሽን፥ ኑስ ጎዳይ ኑ ፆሳ፤ ኑኒ እያ አግቦኮ። ካህነ ግድድ ኦያ አሮና ኮቻት ኑስ ደኦሶና፤ ሌወት ኤንታ ማዶሶና።11ኤንቲ ኡባ ጋላስ ዎንታነ ኦማርስ ጎዳስ ፁሳ ያርሾ ያርሾሶናነ ሳውያ እፃነ ጩይሶሶና። ጎዳ ስንን ዎያ ኡይ ጌሻ ፃርጴዛ ቦላ ዎሶና። ኦማርስ ኦማርስ ፆምፐ ዎያ ኮጫ ቦላ ታማ ኦይሶና። ኑኒ ጎዳ ኑ ፆሳ ኪታ ናጎስ፤ ሽን ህንተ እያ አግደታ።12ፆሳይ ኑራ ደኤስ፤ እ ኑና ካለስ። ኦላ ሞይዘ ፑንያ እያ ካህነት ኑራ ደኦሶና፤ ኑኒ ህንተራ ኦላ ዶማናዉ ሞይዘ ፑናና። እስራኤለ አሳዉ፥ ጎዳራ ህንተ አዋታ ፆሳራ ኦለቶፍተ! ህንተ እያ ፆናናዉ ዳንዳኤከታ” ያግስ።13ሄ ዎደ እዮርባም ባ ኦላንቾታፐ እስ ጩጋ ኤንታፈ ጉየራ ዙግድ ናጋና መላ የድስ። አትዳ እስራኤለ ኦላንቾት ይሁዳ ኦላንቾታ ስንን ደእያ ዎደ ዙግድ ናግያ ኦላንቾት ኤንታፈ ጉየራ ደኦሶና።14ይሁዳ ኦላንቾት ጉየ ስሚድ ፄልያ ዎደ ኤንታ ኦላናዉ ይዳይሳት ጉየራነ ስንራ ደኤይሳ በእዳ ዎደ ጎዳኮ ዋስዶሶና፤ ካህነት ሞይዘ ፑንዶሶና።15ይሁዳ ኦላንቾት ኦላ ዋሶ ዋስዳ ዎደ ጎዳይ እዮርባማነ እስራኤለ አሳ ኡባ አብያ ስንንነ ይሁዳ ስንን ፆንስ።16እስራኤለ ኦላንቾት ይሁዳ ኦላንቾታ ስንፈ ባቃትን ፆሳይ ኤንታ ይሁዳ ኦላንቾታ ኩሸን አድ እሚስ።17አብይነ እያ ኦላንቾት ኤንታ ዲፍ ኦድ ዉርስዶሶና። ሄ ኦላን 500,000 ዶረትዳ እስራኤለ ኦላንቾት ሀይቅዶሶና።18እስራኤለ አሳይ ሄ ዎደ ፆነትዶሶና፤ ይሁዳ አሳይ ጎዳን ባንታ አዋታ ፆሳን አማነትዳ ግሾ ኤንታ ፆንዶሶና።19አብይ እዮርባማ የደድ እያፐ ቤተለ፥ ይሻናነ ኤፍሮና ኤንታ ጉታታራ ኦይክስ።20አብይ ደእዳ ላይን እዮርባም ስሚድ ምንቤና። ጎዳይ እዮርባማ ሾጭን ሀይቅስ።21ግዶሽን፥ አብይ ምን ምን ብስ። አብይ ታማነ ኦይዱ ማቾ ኤክድ ላታማነ ናምኡ አደ ናይታነ ታማነ ኡሱፑን ማጫ ናይታ የልስ።22አትዳ አብይ ታርከይ፥ እ ኦዳባይነ እ ኦድዳባይ ናብያ እዶ ታርከ ማፃፋን ፃፈትስ።