1Nakwesnod la re xaꞌ biꞌ gol, cheꞌla btoni xaꞌ xajka xud la nde re mbyo yenꞌ btoni or xajka wes la.2Leꞌ re men got gol btoni xaꞌ xajka xnaꞌa nde leꞌ re mzaꞌ yenꞌ kon xgab nambi btoni or xajka ptanꞌ la.3Blaꞌsto re ngol nguj salꞌ naꞌ, xaꞌ jwanꞌ liga ndyak yalti.4Tez nzo ngol nguj salꞌ naꞌ nde nzi xinꞌ xaꞌ o xinꞌ xot xaꞌ, re or ya ndablo ner teꞌd or wiꞌr re men liz or, telaꞌs or re yalwen mbli xud or lo or nde tagaꞌ lir, tak jwanꞌ reꞌ jwanꞌ wen nde jwanꞌ ndryoꞌ lazoꞌ Dios.5Leꞌ xaꞌ got nguj salꞌ naꞌ, xaꞌ liga mbyanꞌ thib nya, ngembed xaꞌ laꞌsto Dios xaꞌ, ndlyabe nde yalꞌ nyabꞌ xaꞌ nde ndyodiꞌsno xaꞌ Dios.6Per leꞌ re ngol nguj salꞌ naꞌ xaꞌ jwanꞌ nakij re jwanꞌ narax lo izyo reꞌ nak xaꞌ xajaꞌ thi men nguj, tenye naban xaꞌ.7Noga mnabeꞌ re jwanꞌ reꞌ lo xaꞌ, sa ngen plo tob ro men xis xaꞌ;8tak tez thib xaꞌ nankwanꞌta jwanꞌ nakinꞌ re xaꞌ lenꞌ liz xaꞌ nekla jwanꞌ nakinꞌ re ta xaꞌ, nandlod xaꞌ nak xaꞌ men ndli lazonꞌ Dios, nde mas narax nak xaꞌ lo thi xaꞌ jwanꞌ nandlid lazonꞌ Dios.9Lo yeꞌs tenꞌ nzo le re ngol nguj salꞌ naꞌ, benꞌta ndablo yo le re xaꞌ mbrid ndaꞌb la son gal linꞌ, xaꞌ jwanꞌ galꞌ ngok lo salꞌ naꞌ,10xaꞌ jwanꞌ nabeꞌz nxyoꞌb xkiꞌs naꞌ lo re jwanꞌ wen mbli xaꞌ; tez nabeꞌz mxenꞌ xaꞌ re xinꞌ xaꞌ, nabeꞌz mkayaꞌ xaꞌ re men mzin liz xaꞌ, nadoꞌ mbli xaꞌ sinꞌ lo re xaꞌ ndli lazoꞌn Dios, mblaꞌsto xaꞌ re men jwanꞌ liga ndariꞌd yalti, xaꞌ jwanꞌ thiblaꞌ mbli re yalwen.11Nde naꞌkod la le re ngol yenꞌ nguj salꞌ naꞌ lo yeꞌs; tak senꞌ re jwanꞌ ndryoꞌ lazoꞌ belꞌ xaꞌ mbey xaꞌ nde nzikeꞌ tija xaꞌ lo Crist, taxa ncholaꞌs xaꞌ selyaꞌ xaꞌ tedib gob.12Nde nchak xaꞌ men nxyoꞌb xkenꞌ tak mchixlaꞌ xaꞌ jwanꞌ ner mke yek xaꞌ.13Nde tagaꞌ ncholal xaꞌ men ngete choja re liz men, nchak saꞌb xaꞌ, nde nanaktey benꞌta nchak saꞌb xaꞌ, noga nchak xaꞌ men nakij diꞌs yix, ndlya xaꞌ xij re jwanꞌ nandabloda lya xaꞌ nde ni xaꞌ jwanꞌ nandabloda ni xaꞌ.14Jwanꞌ na ncholas na, re ngol yenꞌ nguj salꞌ naꞌ selyaꞌ xaꞌ tedib gob, keno xaꞌ xinꞌ xaꞌ, kenap xaꞌ re men liz xaꞌ, tamod sa xaꞌ ta ngiꞌno naꞌ naꞌnixinta xaꞌ xis re xaꞌ reꞌ.15Tak pla xaꞌ mbwanla xgab naꞌ nde mdonke xaꞌ xis Maxuꞌ.16Tez nzo men ndli lazonꞌ Dios nde nzo ngol ta xaꞌ nguj salꞌ naꞌ, ndablo taꞌ xaꞌ jwanꞌ nakinꞌ ngol ya, sa naꞌtyodod ngol lo yodoꞌ, sa leꞌ yodoꞌ toyal laꞌsto re ngol nguj salꞌ naꞌ, xaꞌ jwanꞌ liga ndeche jwanꞌ.17Re xaꞌ ngol xgab naꞌ xaꞌ jwin ndoyeꞌ yodonꞌ Dios, nzalꞌ xaꞌ xobyek men xaꞌ nde kix men ka xaꞌ, nde masra lo re xaꞌ jwanꞌ toz nke sinꞌ ndej nde ndloꞌ xkiꞌs Dios.18Tak leꞌ xkiꞌs Dios nchab: "Nakod la yex ro ngon senꞌ lo nkenoa maꞌ sinꞌ ngis maꞌ trig." Nde tagaꞌ: "Xaꞌ nke sinꞌ nzalꞌ xaꞌ yax ka xaꞌ tak nke xaꞌ sinꞌ."19Natonzad la yalke jwanꞌ nke men xis thi xaꞌ ngol xgab naꞌ nak sinꞌ lo yodoꞌ tez nandenod xaꞌ ya chop o son men jwanꞌ liga mbwiꞌy.20Re xaꞌ jwanꞌ thidka ndli jwanꞌ narax, ndablo kwez la yek xaꞌ ndowiꞌ reta men yodoꞌ, sa nogaꞌ re xaꞌ seb lazonꞌ.21Ndowiꞌ Dios, Jesucrist nde re ang mblí Dios, nyaꞌb na lia reta jwanꞌ reꞌ, thita gok lo re men nde nakwid la xaꞌ.22Jwin bli xgab senꞌ xoꞌb la yaꞌa yek xaꞌ jwanꞌ ak sinꞌ lo yodoꞌ, tak ndaga gaꞌsnoa xken xaꞌ ya. Nambi pkete.23Naꞌgutra la benꞌta nitye, cheꞌla guꞌ lud bin lo ta thibla nayiz lenꞌ la.24Xken rol men, ndryoꞌxoꞌba senꞌ teraꞌ yoꞌ xaꞌ lo men koꞌxyoy, leꞌ xken ti pla men xisla ndryoꞌxoꞌba.25Tagaꞌ ndryoꞌxoꞌb re jwanꞌ wen ndli men; per ti pla jwanꞌ nandloꞌda leꞌy troxoꞌbka.