1Moona Fuuɗsi Hoolohngaani woyiɗ hooliɗ ne ŋ jamanooci mirndohan, ɓi ɓo' hey faɗe kosi, ɓa taambiɗ jiiniici na muuƴɗohe na ini jiiniiceem na jangɗohe.2Ɓooɓeem hey faɗe naafeehaaci leyoh ci ɓa ñaañoh ɓa. Ñaañohoh ceem, liiɓohaaciŋ ɓa ñaasuuɗ na tiwiñ dohɗuuɗ.3Ɓa na sangohe kilookoh, ɓa faɗɗukohee ɓooɓi ɓi kañam. Te moona a Kooh fer kañam ceem. A fer ca ne ɓi kos te ɓa inahha keeh ki njirñiɗkohee ca, corkiɗee ɗe ŋ ineem.4In ci Kooh fer jen baahiɗ, ali sangaah raakɗi nga waaye ɗu njirñiɗkohee ca ɗah, corkiɗaat ɗe nga.5Laam in ci Kooh fer jen, ca hooliɗ, ne ca njirñiɗkohu findi a woyoha, te wa hun na kiim Kooh ɗah.
Surgaaniŋ Yeesu baahiɗi
6Fu jangiɗ ɓaah ciŋ ɓoo kosiɗ ci in ceem ɗah, fu hey nike surga baahiɗ, yiŋ Kiristaani Yeesu. Ŋ ineem, fu na hee pesohe woo ciŋ kosi, fu na hee pesohe jangɗohi baahiɗi fu ŋoɗ nga.7Kina sikɗuk andiin ci hunɗi na kosi, andiin ci mbalay ci, waaye meeɗɗa haf fu tum ini neɓ Kooh.8Meeɗiɗ faaniŋ ɗa yoonduk, wa raakiɗ njiriñ, waaye njirñiŋ wa laayɗi. Meeɗiɗ haf fu tum ini neɓ Kooh weɗ raak njiriñ ŋ in ci jen, wa hun na gapohiŋ Kooh ŋ kipes kii na wi na haye.9Woo keem wooriɗ te wa oolkaah jameet.10Weɗ tah ɓoo na pangke panguk miskiɗ, ɓoo lebere. Laam ɓoo oolkiɗ Koohi na pese, a yi Mucɗohiŋ ɓooɓi jen, ŋ woyisɗi ɗa kosiɗ ci.
Altiɗkohaah wuu kosiɗ ci
11In ceem ceɗ fu joy nakoh, fu jangɗohee ca.12Ali ɓo' kinaat ɗa heef sagu kikomaakiikiŋ ɗa ! Waaye fu, nika altiɗkohaah ŋ kosiɗ ci ŋ woo ciŋ ɗa na pesohaaɗiŋ ɗa na waaɗi fu waaɗ ɓooɓi na kosiŋ ɗa na hool kiŋ ɗa.13Ndengɗuka fu jangee ŋ fiki ɓooɓi jen teereeci hooliɗ ci ; fu paysohee ca na ɓa ne fu ñaah ɓa, fu jangɗohee ca, fu tumohaah ɗaa po ŋ hay.14Kina sagankoh ini Fuuɗsi Hoolohngaani on ɗa, wi fu rahas taamboh ŋ woo-woosuuɗ ci woysee nga ɗa, wa yakak ci adgoh Janguuni degee ɗa yaah ciŋ ɓa.15Faɗoha ineem nof te fu tufuk nga baahiɗ po ɓooɓi jen hot ne fu yii kaɗ fiki.16Wortuka ŋ pesohaaɗiŋ ɗa na jangɗohiŋ ɗa. Amba nga baahiɗ. Fu tum ineem ɗah, fu hey muce, fu na ɓi na sikɗukee ɗa.