Aka kilongosi mu likundi bandu babuhobale Kilisitu
1Lende lilobi la sakaka, ngati mundu najutokule lihengu lukunzemale hoju jupalika kuhenga lihengu la sapi.2Kilongosi jupalika kuba mundu jwanga na makosa, nu jupalika kuba nu mmbomba jumu pena, jubiya nu uwesu ukulilongosa mweni, mundu joanzoane bandu jojubii nu uwesu ukuamu majambu gaki sapi na jukusanga ageni na jojuwesa kubola;3jwikuba nndepi au wala jojukomana ila jubiya mpoli, jojupala lukwali, jwiikuba mundu jojupala lupija;4jupalika jubiya mundu jojuwesa kulongosa bandu bu nyumba jaki, nakahenga bana baki bunzowannya kwi isima yoti.5Ndaba ngati mundu ngasejuwesa kulongosa sapi bandu bu nyumba jaki, jiwesa boo kulitunza likundi la bandu babuhobale Kilisitu laka Sapanga?6Ngasejupalika mundu jwanga kukola sukuhobale baahenga kuba kilongosi mu likundi la bandu babuhobale Kilisitu, ili jwiika kukipuna nu kutemuliwa ngati mbaja ebuntemuliwa.7Kupalika jubiya jwana sipa ja sapi kwa bandu babii kunza ja likundi lebunhobale Kilisitu, ili bandaumu nukuabuka mu ntegu waka lijobi.
Baajangati mu likundi la bandu babuhobale Kilisitu
8Baajangati mu likundi lebunhobale Kilisitu apalika kuba bandu bana tabiya jaamboni na bini ihisima; bikuba alepi ba divai au batokule lupija,9apalika kuba na mwoju gwa sapi gukumanya majambu ga amboni ni giliya nu usakaka wu nkati jukuhobale.10Kupalika hoti alegwa, abonikana abii sapi na bakabonikana atenda kupalika, ndienu apia mahengu gabu.11Akaahanu babu apalika kuba na tabia ja sapi, banga kwaalongale bandu liya, na baawesa kulilongoo mweni bana isima na bahobale mu majambu goti.12Jojujangati mu kikundi sa bandu babuhobale Kilisitu kupalika jubiya nu mmbomba jumu pena, na jojuwesa kulongosa sapi bana baki na bandu bu nyumba jaki.13Ndaba bajangati bahenga lihengu labu sapi nakuba nganganganga, na awesa kupwaga sanga kujogopa kupete kuhobale kwabu mu Kilisitu Yesu.
Malamuki ga mwisu
14Nuguhandaki balua jenze koni hobale kuhika kwaku masoba ga pambipi.15Lakini nanzeliwi, ndienu balua jenze jugumanyisa namuna hetupalika kutama nabu mu nyumba jaka Sapanga, jejuje bandu babuhobale Kilisitu baka Sapanga jojubii mwomi, na jejuje ndi kipanda nu nsingi wa sakaka.16Ngasekibii kiholu sokapi kupete ukolongu na sili ju kuhobale kwitu hejibii ngolongu.Jabonikana mu liumbu lu umundu,jabonikana kuba junu upali mu Loho kuba ndi jwaamboni,jabonikana na atumi bu kunani kwaka Sapanga.Jaalandila bandu banga kuhobale Sapanga,jabombaliwa nu undema,jajukulika mu ulumbi.