1Mi khat in bishop nasep a seam nuam le, nasep pha seam nuam a hihi, ci sia thuman a hihi.2Bishop sia paubang ngawl, zi khat nei, a kidawm, pilvang, nuntakzia pha, leangna do thiam, ngual hil thei hi tu a;3Sapittui dawn nuam mama, ngual vua thei, a thiangtho ngawl sum duhop mi hi ngawl tu hi; thuak zo tu, ngual taw thu ki nial in buai ngawl tu, duhop ngawl tu ahizong;4A innkuan phatak in a ukzo, a tate in a thu ni tu a, a zatak huai hi tu hi;5Banghangziam cile ama innkuan zong bangbang in uk tu ci a he bua le, Pathian i pawlpi sia bangbang in keam thei tu ziam?6Thu um thak hi ngawl tu hi, tabang hi bale ki phatsakna taw ki suangtak tu a, doaimangpa sia ki phatsakna taw a pu bang in puk tu hi.7Tua bek domngawl in a puasang mihing te mai ah minpha a nga mi hi hamtang tahen; tabang hi bale zawnsakna le doaimangpa i thang sungah awk tu hi.
Upa
8Tasia bangma in upa te zong a zatak huai, leii ka ngawl, sapittui tampi dawn ngawl, a thiangtho ngawl sum a duhop ngawl te;9Upna thuthuk sia a thiangtho khentel theina taw a len hi tahen.10Hi te sia ki ze-et masa tu a; paubang ngawl ci a ki heak thiang zawkciang in, upa nasep seam tahen.11Tasia bangma in amate i zite zong a zatak huai, a man ngawl ngual a mawsiat thei te hi ngawl in, pilvang le na theampo ah a muanhuai te a hi hamtang kul hi.12Upa te sia zi khat nei, a tate le a innsung phatak in a uk zo te hi tahen.13Banghangziam cile upa nasep phatak in a seam te sia amate atu in dinmun pha a nga hi a, Christ upna sungah hangsanna lianpi zong nga tu hi.
Thuthuk Lianpi
14Note kungah a manlangtak in paitu lametna taw hi te at in kong thak hi:15Ahihang ngei kong om tha le, Pathian innkuanpui sungah bangbang in om tu ci na heak thei natu uh in kong at hi, tua Pathian innkuanpui sia a nungta Pathian i pawlpi hi a, thuman khuam le zungpi a hihi.16Taciang Pathianmi hina thuthuk sia thu ki nialna om ngawl in thupi hi: Pathian sia cilesa in kilang zo a, Thaa sungah thutang suaksak zo hi, vantungmi te in mu zo uh a, Gentile te kungah ki pualak zo hi, leitung ah zong um zo uh a, minthanna sungah tumsak zo hi.