1 Timoote2sav_wbt

Nakoh ci kaɗ ŋ findi ɓooɓi kiimohan Kooh

1Mbaa ini uup raak njiriñ, weɗ mi na hee woye paaɗ : Mi na ñaahohe ne ɓi Janguuni nik ŋ kiim Kooh, ɓa kiimee keeh-keeh wuu ɓooɓi jen, wa hun na corkiɗ Kooh.2Ɓa kiimɗee buur ci na kilifaaciŋ kur ci jen ne ɓoo min raak kipes yeeɓkiɗ huniɗ na jam, ɓoo haɓɗee in yurhiɗ ŋ fiki Kooh, na mandohaaɗ baahiɗ keeh-keeh.3Ineem weɗ moɗ te weɗ neɓ Kooh Mucɗohiŋ ɓoo,4Kooh yi waaɗ ne ɓo' ci jen muc te ɓa kaɗ po ɓa min inah keeh ki.5Laam :
A Kooh yino dong raak,te harmbanɗoh yino nam raakŋ harmban Kooh na ɓo' ci.A Kiristaani Yeesu, te a ɓo',6yi eɗoh kiñin kiŋ ɗe haf cene a romkoh ɓo' ci jen.Ineem weɗ Kooh teeɓoh wi jamanooni a gapohee wa ree.7Ŋ pangkiŋ Kooh weem, a tummba so yegɗohoh na Apootar ne ŋ jangɗee ɓi nikɗi Yawuut kosi na keeh ki. Mi na woye keeh, ŋ leyɗi.8Mbaa ŋ waaɗ ne, ŋ ɗisik nu ɗu coh ɗah, ƴaar ci kiimee Kooh, ɓa raɗsee Kooh yaah hooliɗ, wa hunuu na ayruk na taastiɗoh.

Ini kaɗ ŋ ɓitiɓ ci

9Ŋ namiɗ waaɗ ne ɓitiɓ ci liiɓ baahiɗ ŋ kulɓaaci ɓa na ɓekke, ɓa haɓɗukee na kulɓa yiwiɗ, eɗuuɗ cir. Ɓa haɓɗukuu haɓɗuk uupiɗ ŋ haf ciŋ ɓa, na urus ci wala per ci ɓa na tokke, na kulɓaaci na care kopor laayiɗ.10Waaye haɓɗukiŋ ɓa nikaat tum in baahiɗ findi ɓitɓi woo ne a nikiɗ Kooh.11Ɓitiɓ joy joy kerhiɗ jangɗohoh ci, a jangee na yeeɓuk.12Ŋ teyɗohɗi ɓitiɓ ne a jangɗohee wala a adgiɗ ƴaar ; a joy joy ɗek.13Laam, a Aadama ɗeɓ mahu, Aawa taammba nga.14Te a Aadama ñaañohu haa, a ɓitɓa a yi ñaañohu, a kerhiɗeeɗi Kooh, a keennda ŋ bakaaɗ.15Waaye raakiŋ ɓitiɓ ci kuɓu hondohɗi ɓa mucɗune ɓa ris kosiɗ Kooh, ɓa waaɗ ɗe, ɓa pesee pes hooliɗ wuu ce te peseem hun na amb haf ɓa ɗah.
expand_more
Search