Doonzo woo k'ande'er korere
1Ti eshuwotso! keewan b́ wotit́ dúronat b́ gizewosh eegoru itsh guut'o geyiratse.2Doonzo b́ weet aawo úmp'etso t'úwon b́ wafok'o b́ wottsotse it it tookon sheengshde'k'at danfte.3Ashuwots «Keew jamó jeenonat s'k erkee» bo etor na'a maac'ts máátsuwats na'a shuwi shambo bin b́detsfok'o t'afo danerawo boats b́ weeti, eegi weeronoru bítse keshosh falatsne.4Ti eshuwotso itmó, t'aluwots itnaliye, mansh aaw man ump'etsok'o itats waratse.5It it únets shááni ashuwots, aawi ashuwots itne, nooye wee t'úwi wee t'alwi ashuwots noonaliye.6Mansh eshe no tooko kewde beewone bako k'oshwotskok'o tokrk'ayone.7Tokriru ashuwots t'úwone botokriri, mashiruwotswere t'úwone bomashiri.8Noomó aawi ashuwotsi nowottsotse notooko keewon no angok'on beewone, imnetiyonat shunon t'ururiyok'o nogerats tahde'oone, kashosh jangetso kes'tswots boatse baziyosh bogúúfef k'obiyok'o tookats guufde'one,9Ik'o noon b́ s'eeg fayosh b́woterawon nodoonz Iyesus Krstos weeron no kashishee.10Krstos no jangosh b́k'ir kashon nobeyal wee nok'iriyal bínton nobeyishe.11Mansh and it k'alirwok'on iko iko kup'shon t'engde'e.S'uwaatsi izonat jamon
12Eshuwotso! ititse finon shaatsirwotsi, doonzon it naashwotsnat iti iziruwotsi it mangiyituwok'o itn k'oniruwoone,13Bo finatse tuutson boosh eents manogonat shunon it detsetwok'owa, itwere it atsatsewo jeenon beewere.14Eshuwotso! «Wihuwotsi fayore, aaw shuuk' deshawwotsi kúp'shwere, maawtswotsi te'uere, ash jamosh k'amoore» etaat gawiruwone.15Asho konworu gondi shegrosh gndon bí anirawok'o it atso korde'er, dab jam aawo it it took tookosh wotowa mank'o k'osh ashuwotssh k'osh ash jamwotssh sheeng finosh kup'ore.16Jam aawo gene'owere,17it eed'irawo Ik'o k'onwere,18jam keewon Ik'o udoore, Krstos Iyesusn it detsts beyon Ik'o itatse b́ geyirwo maniye.19S'ayin shayiri fino úp'k'ayere,20bek'o gac'k'ayere.21Jam keewo faduwere, sheeng wottso deshde'ere.22Gond fin jamatse wokoore.23B́ tookon jeeni Ik'o Izar Izewer jam keewon iti S'ayintsuwe, it Shayiro, it kasho, it ats jamo no doonz Iyesus Krstos b́ weet aawosh ik jagalo koteyar beewe.24Iti s'egtsmań amanek b́ wottsosh han k'alituwe.25Ti eshuwotso! nooshowere Ik'o k'onwere.26Eshúw jamwotsi S'ayints jobon jamo aatewere.27Woshan amants jamwotssh b́ nababetwok'o doonzo shútson oona itsh etetuwe.28No doonz Iyesus Krstos s'aato itnton wotowe.