1 Samuel4mbb_wbt

1Ne is menge lalag ni Samuel nezineg diyà te tivuuk he Israel. Naaǥew te menge Filistihanen kes Kavan te Kebpekid-uyun Dutun he timpu nekidtebek is menge Israilihanen te menge Filistihanen. Diyà te Ebenezer megkampu is menge Israilihanen, ne is menge Filistihanen, ne ziyè dan daan megkampu te Afek.2Ne midsurung te menge Filistihanen is menge Israilihanen ne zutun te meinit he tebek dan. Nengezaag te menge Filistihanen is menge Israilihanen; 4,000 is nepatey he menge Israilihanen.3Hein nepasad is tebek ne midlikù kes menge Israilihanen he nesamà diyà te kampu zan. Hein nekeuma zan mid-insà is menge pengulu te Israilihanen te, “Maan is mibelagad kiw te Nengazen. Maan is nezaag kiw te menge Filistihanen? Deyzey pa ke egkuwaan tew kes Kavan te Kebpekid-uyun diyà te Shilo para eduma kenitew is Nengazen ne edluwasen kiw zin dutun te menge kuntada tew.”4Umbe, midsuǥù sikandan te menge etew he ibpekuwa ziyà te Shilo kes Kavan te Kebpekid-uyun te Nengazen he Mekeǥeǥehem. Is tangeb din ne zuen dezuwa he ledawan te kirubin, ne zutun is Nengazen ed-ubpà te pid-elangan. Elin daan dutun miduma kes dezuwa he anak ni Eli he si Hofni wey si Finehas.5Hein nekeume en kes Kavan te Kebpekid-uyun dutun te kampu, nemengulahì is menge Israilihanen, ne utew mezaǥing is laǥeng dan tuus te kegkelipey zan, dutun henduen te newalwal is tanà.6Ne hein nezineg te menge Filistihanen is kulahì te menge Israilihanen, ke sikandan te, “Maan is nemengulahì kes menge Hebriyuhanen diyà te kampu zan?” Dutun te netuenan te menge Filistihanen he nekeuma kes Kavan te Nengazen dutun te kampu te menge Israilihanen,7nengahandek sikandan. Ke sikandan te, “Dilikadu kiw su nekeuma ziyà te kampu te menge Israilihanen kes menge megbevayè dan. Wazè pa heini meulaula puun pa zengan.8Kehizu tew utew! Hentei ve vuwa is ebpekeluwas kenitew zutun te mekeǥeǥehem he menge megbevayè dan? Iyan heini kes menge megbevayà he midhimatey te menge Ehiptohanen diyà te sibsivayan pinaaǥi te mibarangbarang he menge kezeetan.9Piru, ebpekevurut kiw, ne kenè kiw egkahandek para kenè kiw meuripen te menge Hebriyuhanen iring te kegkeuripena tew kandan dengan. Umbe ebpekidtebek kiw kandan!”10Umbe, nekidtebek is Filistihanen, ne nezaag dan haazà is menge Israilihanen. Utew mezakel is nemematey; 30,000 he menge Israilihanen is minatey. Ne is nengesamà he menge Israilihanen ne mibpemelaǥuy ne mibpen-ulì dan diyà te ubpaan dan.11Kenà iyan dà haazà, kekenà, naaǥew pa te menge Filistihanen kes Kavan te Kebpekid-uyun, wey nepatey kes dezuwa he anak ni Eli he si Hofni wey si Finehas.

Is Kebpatey ni Eli

12Dutun he andew te tebek, duen sevaha he etew he nekepelaǥuy he sakup te pemilya ni Benjamin ne mibpehendiyà te Shilo. Mibindas din is kumbalè din, ne mibukbukan din is ulu zin te eliyavuk he tuus te utew mesakit is gehinawa zin.13Dutun te kebpekeuma zin diyà te Shilo, dutun si Eli is ebpimpinuu ziyà te bangkù he kilid te zalan su edtaǥad ke zuen ebpekepenudtul su igkeipeng din sikan is Kavan te Kebpekid-uyun te Megbevayà. Si Eli, ne 98 en is penuiǥen din, umbe kenè en utew ebpekaahà. Ne zutun, midtudtul zutun te etew ziyà te inged is neulaula te tebek. Nezineg haazà te menge meǥinged ne nemensineǥew zan. Nezineg haazà ni Eli ne mid-insà si Eli, “Hengkey is idsineǥew te menge etew?” Migaanggaan med-uvey haazà is etew ziyà te ki Eli.16Ke sikandin te, “Beǥu e pa he nekeuma is ebpuun diyà te tebek. Nekepelaǥuy a.” Migkaǥi si Eli te, “Hengkey ves is neulaula mamà?”17Midtavak kes etew te, “Nezaag is menge Israilihanen te menge Filistihanen ne mibpelaǥuy zan. Utew mezakel is nemematey he sundaru tew, naapil zaan kes dezuwa he menge anak nu he si Hofni wey si Finehas. Wey naaǥew zaan kes Kavan te Kebpekid-uyun te Megbevayà.”18Hein nehisgutan dutun te etew kes Kavan te Kebpekid-uyun te Megbevayà, ne nekeley-ang si Eli zutun te bangkù he mibpinuuwan din he ziyà te kilid te pultahan te inged. Ne nevadtì is lieg din te kebpekezakdak din su melambeg wey meǥurang en daan sikandin, ne segugunà sikandin mibpatey. Nehimu sikandin he pengulu te Israel seled te 40 he tuig.19Dutun he penahun ne meǥaan en ed-anak is ambey ni Eli he esawa ni Finehas. Hein nezineg din he naaǥew kes Kavan te Kebpekid-uyun te Megbevayà wey nezineg din he minatey is esawa zin wey enuǥang din he maama, segugunà mibelilit is getek din ne iyan en ked-anak din. Piru utew sikandin midreǥeni.20Ne hein nekaanak en sikandin ne edluwèluwà sikandin te gehinawa, migkeǥiyan sikandin te menge mengunguyamu te, “Pekevurut ka! Su maama is anak nu!” Piru wazè en sikandin medtavak.21Hein wazè pa sikandin mebpatey iyan inngazan din dutun te vatà is Ikabud, he ke và dà egkeǥiya, “Naawè en diyà te Israel is mekeǥeǥehem he kebpekiduma te Megbevayà te Israel.” Su ǥeina kun te naaǥew kes Kavan te Kebpekid-uyun te Megbevayà wey minatey is esawa zin wey enuǥang din he maama.
expand_more
Search