ሳኦላ ሀይቁዋ
1ፍልስፄመት እስራኤለታራ ኦለትዶሶና፤ እስራኤለት ፍልስፄመታ ስንፈ ባቃትዶሶና፤ ዳሮ እስራኤለት ግልቦአ ደርያ ቦላ ሀይቅዶሶና።2ፍልስፄመት ሳኦላነ እያ አደ ናይታ የደድ፥ እያ አደ ናይታ ዮናታና፥ አምናዳበነ ማልክሳ ዎዶሶና።3ኦላይ ተቅድ ሳኦላ ኡንኤስ፤ ዶንገን ዱከይሳት እያ ጫድድ ዳሮ ማዱንፅስዶሶና።4ሳኦል ባ ኦላ ሚሽያ ቶከይሳኮ፥ “ሀ ቃፃረትቦናይሳት ይድ፥ ታና ጫድድ ካኦና መላ ነ ማሻን ታና ጫዳዳ ዎ” ያግስ። ሽን እያ ኦላ ሚሽያ ቶከይስ ያይድ እፅን፥ ሳኦል ባ ማሻ ሳአን ኤስድ፥ እያ ቦላ ኩንድስ።5እያ ኦላ ሚሽያ ቶከይስ ሳኦል ሀይቅዳይሳ በእድ፥ እካ ባ ማሻ ሳአን ኤስድ፥ እያ ቦላ ኩንድድ እያራ እስፈ ሀይቅስ።6ሀይሳዳ ሀንድ፥ ሳኦልነ እያ ሄ አደ ናይት፥ እያ ኦላ ሚሽያ ቶከይስነ እያ አሳት ኡባይ ሄ ጋላስ ሀይቅዶሶና።7ዛንጋራንነ ዮርዳኖሰ ሻፋፐ ሄፍን ባጋራ ደእያ እስራኤለ አሳይ፥ እስራኤለ ኦላንቾት ባቃትዳይሳ፥ ሳኦልነ እያ ናይት ሀይቅዳይሳ በእድ ባንታ ካታማ አግድ ባቃትዶሶና። ፍልስፄመት ይድ፥ ሄ ካታማታ ኦይክዶሶና።8ዎንተ ጋላስ ፍልስፄመት አሀ ቦላፈ ኦላ ሚሸታ ቃርድ ኤካናዉ ይድ፥ ሳኦልነ እያ ሄ አደ ናይት ግልቦአ ደርያ ቦላ ሀይቅድ ዝንእዳይሳታ ደምዶሶና።9ኤንቲ ሳኦላ ቆያ ቃንፅድ እያ ኦላ ሚሽያ ቃር ኤክዶሶና። ያትድ ባንታ ኤቃ ኬንነ ባንታ አሳ ግዶን ፆኑዋ አዋጃና መላ ፍልስፄመ ቢታ ኡባስ ኪታ የድዶሶና።10ሳኦላ ኦላ ሚሽያ አስታሮተ ጌተትያ ኤንታ ማጫ ፆሰ ኬን ዎዶሶና። ሳኦላ አሀ ቤት-ሳና ካታማ ግምብያ ቦላ ምስማረን ሽድ ካቅዶሶና።11ፍልስፄመት ሳኦላ ኦዳባ ጋላዳን ደእያ ያበሳ አሳይ ስእዳ ዎደ፥12ምኖ አሳት ቃማ ደንድ ብድ፥ ሳኦላ አሃነ እያ ናይታ አሀ ቤት-ሳና ካታማ ግምብያ ቦላፈ ዎስድ ያበሳ ካታማ ኤህድ፥ ያን ፁግዶሶና።13ሄሳፈ ጉየ፥ ኤንታ መቀ ማፅ ኤክድ፥ ያበሳን ደእያ ታማርስከ ም ጋርሳን ሞግዶሶና፤ ያትድ ላፑን ጋላስ ፆምዶሶና።