Sameela Xeegetethaa
1Na7ay Sameeli Eelipe garsara Godaas oothees; Godaa qaalay he wode daro al7o; qoncethika baawa.2Ayfey daaburin waayetidi xeelliya Eeli issi qamma ba bessan zin7is.3He wode Xoossa xompey buroo to7ibeenna; Godaa Taabotey de7iya keethan Sameeli dhiskis.4Goday Sameela xeegis; Sameeli, “Yee” gidi koyis.5I Eeliko woxi bidi, “Neeni xeegin Heko yas” yaagis. Shin Eeli, “Ta nena xeegabike; bada zin7a” yaagin, Sameeli bidi zin7is.6Qassi Goday, “Sameela” yaagidi nam7antho xeegin, Sameeli dendidi, Eeliko bidi, “Neeni xeegin Heko yas” yaagis. Shin Eeli, “Ta na7aw, ta nena xeegabike; bada zin7a” yaagis.7Godaa qaalay buroo iyaw qonciboonna gisho, Sameeli Godaa gideysa eribeenna.8Goday Sameela heedzantho xeegin dendidi, Eeliko bidi, “Neeni xeegin Heko yas” yaagis. Hessan Goday na7aa xeegidaysa Eeli akeekidi,9“Bada zin7a; I nena xeegiyaba gidiko, ‘Godaw, oda; ta ne aylley si7ayis’ yaaga” gidi, Eeli iyaw odin, Sameeli ba bessaa bidi zin7is.10Hessafe guye, Goday yidi iya matan eqidi, kaseysada, “Sameela, Sameela” yaagidi xeegis. Sameeli, “Ne aylley si7ees, oda” yaagis.11Goday Sameela, “Heko, taani asa haythas iitiya issiba Isra7eele bolla oothana hanayis.12He gallas taani Eeli soo asaa bolla oothana gada odida ubbaa koyrope wursethi gakanaw polana.13Eeli eridi seeronna aggida iya nayta nagaraa gisho, taani iya soo asaa bolla merinaw pirdanaysa iyaw kase oda wothas.14Hessa gisho, ‘Eeli soo asaa nagaray yarshoninne imon polo atto geetetenna’ yaagada taani iya soo asaas kase caaqas” yaagis.15Sameeli wontana gakanaw dhiskis; wontin dendidi, Xoossa keetha pengiya dooyis. Sameeli qoncidaba Eelis odanaw yayyis.16Eeli, “Ta na7aw, Sameela” yaagidi xeegis. Sameeli, “Yee” gidi koyis.17Eeli, “Goday new odiday aybee? Taape aykoka qosopa; neeni Xoossay new odidabaape issibaaka taape qosiko, Xoossi nena pirdo” yaagidi oychis.18Sameeli aykoka qosonna ubbaa Eelis odis. Eeli, “I Godaa; bana lo77idaba ootho” yaagis.19Sameeli diccishe bis; Goday iyara de7ees. Sameeli odidabaape issi qaalika sa7an wodhenna.20Daanepe Barsaabe gakanaw, Sameeli tuma Godaa nabe gideysa Isra7eele asa ubbay eris.21Goday Seelon qoncees; yan ba qaalan banatetha Sameelas qoncisees.