ዳዊቲ ሳኦላፐ ባቃትስ
1ዳዊቲ ካህንያ አብመለከኮ ኖባ ብስ። አብመለከይ ዳዊታራ ጋሄታናዉ ኮኮርሸ ይድ፥ “ኔኒ ነርካ ዋናዳ ያዲ? ኔራ አስ ዋንድ ባዌ?” ያግድ ኦይችስ።2ዳዊቲ ካህንያ አብመለከ፥ “ካዎይ ታኮ፥ ‘ታኒ ነና ኪትዳ ኪታነ ታ ነዉ ኦድዳባ ኦንካ ኤሮፖ’ ያግድ ታና ኪትስ። ታ አሳት እስ በሳን ታራ ጋሄታና መላ ኦዳ ዎስ።3ሀእ ነ ኩሸን አይብ ደኢ? እቻሹ ኡይ ዎይኮ ነዉ ደእያባ ታዉ እማ” ያግስ።4ካህነይ ዛሪድ፥ “ጮ አስ ምያ ኡይ ታዉ ባዋ፤ ሽን ነ አሳት ባንታና ማጫሳፐ ናግዳባ ግድኮ፥ ኤንቲ ማናዉ ዳንዳእያ ጌሻ ኡይ ደኤስ” ያግስ።5ዳዊተይ ዛሪድ፥ “ቱማ ኑኒ ሀ ኪታ ኤክድ ከይዳፐ ዶምድ፥ ማጫሳፐ ናገትዳ፤ ሀር አቶሽን ሀራ ኪታካ ኤክድ ከይያ ዎደ ኤንቲ ባንታ ጌሻተ ናጎሶና። ሽን ሀች ዋንድ ጌያናዉ ኮሸኔ?” ያግስ።6ሄሳ ግሾ፥ ካህነይ ዳዊታስ ጌሻ ኡይ እሚስ። ካህንያስ ደእያ ኡይይ፥ ጎዳ ስንን ዎናዉ ሄ ጋላስ ሆኦ ኡይራ ላመትዳ ኡይፈ አትሽን፥ ሀር ባዋ።7ሳኦላ አይለታፐ እሶይ፥ እያ መህያ ሄመይሳታ ሀላቃይ፥ ዶይቃ ጌተትያ ኤዶመ አደይ፥ ሄ ጋላስ ጎዳ ስንን ናግሸ ደኤስ።8ዳዊቲ አብመለከኮ፥ “ቶር ዎይኮ ማሽ ነዉ ዳንዴሻ? ካዋ ኪታይ ኤሶያ ግሾ ታኒ ታ ማሻ ዎይኮ ሀራ ኦላ ሚሸ ኤሀብከ” ያግድ ኦይችስ።9አብመለከይ፥ “ኔኒ ኤላ ዛንጋራን ዎዳ ፍልስፄመ አድያ ጎልያዳ ማሻይ ሀይሳን ደኤስ፤ ጩርቃራ ፃፀትድ፥ ኤፉደ ማኡዋፐ ጉየ ባጋራ ደኤስ። ኔኒ ኮያባ ግድኮ እያ ኤካ፤ እያፐ አትሽን፥ ሀራ ማሽ ሀይሳን ባዋ” ያግስ። ዳዊቲ፥ “እያ መላ ማሽ ባዋ፤ እያ ታዉ ሀማ” ያግስ።10ሄ ጋላስ ዳዊቲ ሳኦላፐ ባቃትድ፥ ጋተ ካዋ አንኩሳኮ ብስ።11ሽን አንኩሳ ሞርናት፥ “ሀይስ ዳዊቲ ባ ቢታን ካዎ ግደኔ? ማጫሳይ የፅሸነ ዱርሸ፥ ‘ሳኦል ሙኩሉ ዎስ፤ ዳዊቲ ታሙ ሙኩሉ ዎስ’ ያግድ ሳቢዳ አድያ ግደኔ?” ያግዶሶና።12ዳዊቲ ኤንታ ሃሳያ ባ ዎዛናን ስእድ፥ ጋተ ካዋ አንኩሳ ዳሮ ያይስ።13ሄሳ ግሾ፥ ዳዊቲ ኤንታ ስንን ጎሹ ዳንስ። ኤንቲ እያ ኦይካና ሀንያ ዎደ ጎሻዳ ፐንገ እብ ቃጨ ኦይክስ፤ ቡቻራ ሳሶ ቆልስ።14አንኩስ ባ ኦሳንቾታኮ፥ “ሄኮ፥ ሀ አደይ ጎዬስ፤ ህንተ አይስ እያ ታኮ ኤህደቲ?15ሀ አደይ ታ ስንን ጎያናዳ ህንተ ኤህዳይ፥ ታ ማታን ሀር ጎየይ ይነዬ? ሀ አደይ ታ ሶ ገላናዉ በሲ?” ያግስ።