Olwimbo lwa Ana
1Go mango Ana aderhaga ogu musengero:«Omurhima gwâni gukuzize Nyakasane namanakubûla obuhashe bwâni erhi Nyakasane orhuma.Lêro nâni namabumbûla akanwa embere z’abashombanyi bâni, bulya nsîmire okubà wamanyôkola2Ntà mwimâna aka Nyamubâho, na ntà muntu oli nka ye, na nt’ibuye lizibu aka Nyamubâho.3Murhaciyûshûlaga okuderha ebinwa by’obucibonyi, murhacihîraga mwajacirana, bulya Nyakasane abà Nyamuzinda oyishi byoshi, ye yishi obuzirho by’ebijiro byoshi.4Omuherho gw’abacikunga oburhwâli gwavunisire, kwoki abarhajira burhwâli anabarhwâlihize.5Abacikung’iyigurha, bakola bajà balimya lyo babona ecibalya, n’abashalye barhacigwâsirwi okulimya ebiryo. Engumba yabusire kali nda oku nyalumburhamburha alungumarhirwa.6Nyakasane ye yîrha yena lamya, ye yandagaliza omu kuzimu ye nakûla mwo.7Nyakasane ye kenya yena gaza. Ye bonya muguma nshonyi oku azikûla owundi.8Ye kûla omugalugalu omu katulo, n’omukenyi amukûle omu camvu, amudahaze omu ndêko y’abaluzi n’okumuhà entebe y’irenge; bulya ebikondo by’igulu binali bya Nyakasane, enyanya yabyo yo ayûbasire igulu.9Ye langa enshando z’abemêzi bâge, oku ahirigisa banyankolamaligo omu mwizimya, bulya omuntu arhankahasha okuhimana n’emisî yâge yône.10Abashombanyi ba Nyamuzinda bagendesibwa emihanda erhashingânana, Ow’enyanya abakankamira emalunga. Nyamubâho ye twîra amashanja goshi emmanja. Ye wanahà Omwâmi ayimânikaga obuhashe; n’okuhà omurhambo wâge olukengwa.»11Elkana anacilîkûla agaluka e Rama, ci omwâna yêhe ayôrha haguma na Eli mpu akakolera Nyamubâho. Bagala ba Eli12Bene Eli byàli byâbi, birhakengaga Nyakasane.13Nêci barharhînyaga, barhanakengaga omwanya gw’ecikono c’abadâhwa nk’oku abantu balibarhegesirwe, bulya ngasi yêshi wahânaga entûlo nterekêro, mwambali w’omudâhwa akagiyisha afumbasire amango enyama ekola yadogoma, omushurhi gw’amîno asharhu.14N’okugudahiriza omu nyungu, nîsi erhi omu cungu, nîsi erhi omu lukalangiro, n’ebi gulya mushurhi gwakalengeza, omudâhwa anacîhekerabyo. Kwo bakagijira ntyo ngasi muny’Israheli wajâga eyo Silo.15Ciru ankabà barhali cisingônola olujimbi, mwambali w’omudâhwa erhi okwôla, akola ali, n’okubwîra owalirherekêra, erhi: «Mpà enyama y’okuyôkera omudâhwa, bulya arhakuyêmêrere enyama nyende, ci nyama mbishi yonene».16N’owarherekêraga akaderha mpu: «Rhang’olinde rhusingônole olujimbi ogaliyanka enyama nk’oku onalonzize, n’emisî».17Ecâha c’eyo mishebenge càli cinene omu masù ga Nyakasane bulya bakagigayaguza ebyarherekîrwe Nyakasane.Samweli erhi ali e Silo
18Samweli ali akola akakolera Nyamubâho; ali mwâna wayambalaga akanzo k’enondwè.19Nina akagimulukira ecishûli akagimulerhera ngasi mwâka, ngasi kurherema bône ibà, mpu barhûle enterekêro y’omwâka.20Eli akagigisha Elkana na mukâge, n’okubabwîra: «Nyamubâho akuhè iburha mwene oyu mugoli, libè lya kubahemba kw’obu buhirhi orhûzire Nyamubâho», go mango bakagishubira emwâbo.21Nyamubâho agashanira Ana, ashubiburha barhabana basharhu na banyere babirhi. Omwâna Samweli yêhe aj’ayushûkira omu masù ga Nyamubâho.Bene Eli
22Ciru ankabà Eli alikola mushosi bwenêne, kurharhumaga arhamanya ngasi kwoshi abagala bakagirhindibuzamwo bene Israheli boshi,23Akababwîra, erhi: «Bici birhuma mujira birya nakayumva boshi baderha?24“Ka nanga bâna bâni! emyanzi ndwîrhe nayumva erhali minjà”.25“Erhi omuntu ankahemukira owâbo, Lungwè yênene wankabatwîra olubanja, ci erhi ankahemukira Nyamubâho yênene, indi wankamulagira?”» Ci kwônene barhayumvîrhizagya izù ly’Îshe, bulya Lungwè alihizire oku abarhumira ababayîrha.26Omwâna Samweli yêhe aj’ayûshûka n’okuyinjiha embere za Nyamubâho. Eli amanyîsibwa oku enyumpa yâge yahanwa.27Mwambali wa Lungwè, muguma ayisha emwa Eli anamubwîra erhi: «Yumva oku Lungwè adesire erhi: “Kw’orhamanyiri oku nacimanyîsize enyumpa yinyu, amango bali e Mîsiri, bajà ba mwâmi Faraoni mwâmi w’e Mîsiri”.28“Nacîshozire sho omu milala y’Israheli mpu mujire mudâhwa wâni wakarheremera oku luhêro lwâni; akatumbûsa omugî gw’obukù, anakaziyambala ecishûli c’obudâhwa (efodi) embere zâni. Nahîre ab’enyumpa ya sho ngasi nterekêro y’abâna b’Israheli”.29“Bici bicirhumire okagayaguza entûlo, n’enterekêro namurhegesire okujirira omu Ndâro yâni. Na bici bicirhuma okâkenga bagala bâwe kundusha, bulya munacîtwêze n’enterekêro z’olubaga lwâni lw’Israheli”.30“Co cirhumire yumva obugeremwa bwa Nyamubâho, Lungwè w’Israheli, naliyôsire ndesire nti enyumpa yâwe n’eya sho, zigwâsirwe okuyumva ensiku zoshi. Ci buno, gwârhi Nyamubâho. Lêro buno ntakaciderha ntyo, bulya niene nie nkengêsa abankenga boshi, nabo abangayaguza kwo mbalola nka byâsi by’aha camvu”.31“Yumvagya: Ensiku ziyîruka nâtwâmwo okuboko kwâwe, n’obuhashe bw’enyumpa ya sho, kuhika habulikane omushosi omu nyumpa yâwe”.32“Orhangilolêreza minjà manganaci najirîre bene Israheli, ci kwônene omu mulala gwâwe mwohe, murhakabà mushosi ciru n’omuguma”.33“Ci kwônene nayôrha na muguma w’omu mulala gwâwe, hôfi n’oluhêro lwâni lyo amasù gâge gafà n’oluhenegè, n’iroho lyâge lihehûke, ci kwônene banji b’omu mulala gwâwe bakâg’ifà banaciri omu myâka y’obusole”.34“N’ecimanyîso c’okûla wacîbonera oku bâna bâwe bombi, Hofni na Pinehasi: Bafà bombi lusiku luguma”.35“Nayîmika omudâhwa mwemêzi, owakakola nk’oku omurhima gwâni gukunda, na nk’oku muzigira, namuyubakira enyumpa erhakahuligana, naye yênene, akashokolera omushîgwa wâni”.36“Na ngasi wakasigala omu nyumpa yâwe ayishikafukama analambame, akola amusengera bujuma bulebe bwa magerha, nîsi erhi hyuntu hibega hisungunu anakamuyimbirira erhi: Mâshi nkusengîre ompire muli mukolo mulebe, gw’obudâhwa, lyo nkazibona ehihimbi hy’ehyuntu hy’okumakûza”».