1 Sameela Maxaafa2gof_ltw

Haanni Woosaa

1Haanna haysada yaagada woossasu;“Ta wozanay Godan ufaytees;ta kacey Godan dhoqu gis.Ta morketa bolla taani ceeqetayis;ne ashoy tana ufaysees.2Godaa mela geeshshi baawa;ne meli oonika baawa.Nu Xoossaafe attishin,hara Zaalli baawa.3Otoro haasaya aggite;otoro qaali hinte doonape keyopo.Godaa Xoossay ubbaa erees;asa ooso yiggidi xeellees.4Olanchota dongey meqis;shin daaburanchoti wolqa demmidosona.5Kallidaysati koshatidi unetidosona;shin koshatidaysati ha77i kallidosona.Maynthiya laapun nayta yelasu;shin daro nayta yelidaara barka attasu6Goday wodhees, pathees;Si7oolen yeggees, yaape kessees.7Goday dureyees; Goday manqethees;kawushshees; dhoqu oothees.8I manqota baanape denthees;metootanchota bidope denthees.Enta boncho asaara utisees;boncho araata laatisees.Biittaa baasoti Godaasa;enta bolla alamiya essis.
9“I geeshshata tohuwa naagees;shin iitata dhuman si77i oothana;asi ba wolqan xoonenna;10Godaara eqeteysati liiqana;Goday salope enta bolla dadada dechana.Goday sa7an de7iya ubbaa pirdana;I ba kawas minotethi immana;I ba tiyidaysas xoono immana.”11Hessafe guye, Hilqaani Raman de7iya ba soo bis; shin na7ay Sameeli kahiniya Eelipe garsara Godaas oothees.

Eeli Nayta Iitatethi

12Eeli adde nayti iita; enti Godaa bonchokona.13He wode kahineti asaara de7iya gahetethan oothiya wogi de7ees. Hessika asay yarsho yarshiya wode kahiniya oosanchoy heedzu achara de7iya qaphe ekidi buroo ashoy kaxishin yees.14Doysiya otuwan woyko distiyan woyko xaaruwan ba qaphiya yeddidi, ay qommo asho gidikoka kessi efidi kahiniyas immees. Yarsho yarshanaw Seelo yaa Isra7eele asa ubbaa bolla enti haysada oothosona.15Qassi modhuwa yarsho bessan xuugganaape sinthe kahiniya oosanchoy yarsho yarshiya addiyako bidi, “Kahiney qaye ashope attishin, kaxida asho neepe ekonna gisho, iyaw caacanaw asho hamma” yaagees.16Addey zaaridi, “Koyrottidi modhoy xuugeto; hessafe guye, ne koyeysa eka” yaagees; shin kahiniya aylley, “Akay, taw ha77i imma, ne diggiko, taani wolqan ekana” yaagees.17Godaas immiya yarshuwa Eeli nayti kadhida gisho, enta nagaray Godaa sinthan aadhidi daris.18Shin Sameeli na7a de7ishe liinope oosetida efuudema7o ma7idi Godaa sinthan oothees.19Sameela aayiya laythan laythan guutha qolle giigisada, laytha yarsho yarshanaw ba azinaara bashe iyaw ekada bawusu.20Eeli Hilqaananne iya machiw, “Hinte Godaas dummayidi immida ha na7aa bessan Goday new ha machefe hara nayta immo” yaagidi anjees; yaatin, enti banta soo simmoosona.21Goday Haanna anjin, qanthatada heedzu adde naytanne nam7u macca nayta yelasu. Na7ay Sameeli Godaa sinthan diccis.22Eeli daro cimis. Iya nayti Isra7eele asa ubbaa bolla oothida iitabaanne Geeshsha Dunkaaniya pengen Godaas oothiya maccasatara tunidaysa si7is.23Hessa gisho entako, “Hinte haysa melaba ayis oothetii? Hinte iita oosuwa taani asa ubbaafe si7as.24Ta nayto, hessa aggite; Godaa asay hintena giyabay lo77o gidenna.25Issi asi ase naaqiko, Xoossay iyaw gaannatana; shin asi Godaa naaqiko, iyaw gaannatanay oonee?” yaagis. Goday entana wodhanaw koyida gisho enti banta aawa zoriya si7onna ixidosona.26Na7ay Sameeli Godaa sinthaninne asa sinthan diccisinne sabetis.

Eeli Keetha Bolla Odetida Tinbite

27Issi gallas nabey Eeliko yidi, “Goday haysada yaagees. ‘Ne aawa soo asay Gibxe biittan Paarona kushen de7iya wode ta entaw qoncabikina?28Ne aaway kahine gididi ta yarsho bessa keyana mela, ixaane cuyisana melanne ta sinthan efuude ma7idi oothana mela Isra7eele zare ubbaafe iya dooras. Isra7eele asay taman yarshiya yarsho ubbaa taani ne aawa kochaas immas.29Taani ta de7iya bessan shiiqana mela kiitida ta yarshuwanne imuwa hinte ayis kadhidetii? Ta asa Isra7eele, taw shiishida yarsho ubbaafe dooretidaysa midi modhana mela oothada ne nayta taape aathada ayis bonchadii?’30“Hessa gisho, Goday, Isra7eele Xoossay haysada yaagees. Ne kochaynne ne aawa kochay merinaw taw oothana. Shin ha77i hessi taape haako; tana boncheyisata bonchana; tana kadheysati kadhetana.31Ne kochan asi ceeggonna mela taani ne wolqaanne ne aawa soo asaa wolqaa dhaysiya wodey yaana.32Neeni ta keethan meto be7ana; taani Isra7eele asaas immiya anjuwa neeni be7ada qanaatana; shin ne soo asan ceeggana asi oonika baawa.33Taani ta yarsho bessaafe dhaysona asi de7iko, iya gaason ne ayfey afuxishe qooqana; ne wozanay azzanon xuugetana; ne kocha ubbay na7atethan hayqana.34Ne nayti nam7ay, Afnaninne Finihaasi issi gallas hayqana; hessa new malla gidana.35Ta wozanaadanne ta qofaada oothiya taw ammanetiya kahine denthana. Taani iyaw ammanetida soo asi immana; taani tiyida kawa sinthan enti ubba wode oothana.36Ne kochaa giddofe attida ubbay guutha miishe woyko baso uythi woossanaw yidi, iya sinthan gufannidi, ‘Taani miyaba demmana mela kahine oothada tana shuumarki’ yaagana” yaagis.
expand_more
Search