ዳዊታነ ጎልያዳ
1ፍልስፄመት ባንታ ኦላንቾታ ይሁዳን ደእያ ሶኮ ጌተትያ በሳን ኦላስ ሺሽዶሶና። ኤንቲ ሶኮፐነ አዜቃፐ ግዶን ደእያ ኤፌስ-ዳምማ ጌተትያ በሳን ሺቅድ ኡትዶሶና።2ሳኦልነ እስራኤለት ኤላ ዛንጋራን ሺቅድ፥ ፍልስፄመታራ ኦለታናዉ ከይዶሶና።3ፍልስፄመ ኦላንቾት እስ ባጋ ዙማ ቦላ ሳልፕን፥ እስራኤለት ሀንኮ ባጋ ዙማን ሳልፕዶሶና፤ ዛንጋራይ ኤንታዉ ግዶን ደኤስ።4ጋተ ካታማን ደእያ ጎልያዳ ጌተትያ እስ ቶራ ቃራ አደይ ፍልስፄመት ዱንካንዳ ጉታፐ ከይስ፤ እያ ጌሳይ ኡሱፑን ዋነ ታካ።5እ እሻታማነ ላፑን ክሎ ግራመ ዴፅያ ናሰ ብራታ ፁሩረ ማእስ፤ ቃስ ናሰ ብራታ ባርኔፃ ባ ሁጰን ዎስ።6ናሰ ብራታ ጋምባለ ባ ቶሆን አስ፤ ባ ሀሽያን ናሰ ብራታ ቶራ ቶክስ።7እያ ቶራ ቶማይ ዋንዳራሸ መላ ኦርደ፤ እያ ቶራ አይፈይ ላፑን ክሎ ግራመ ዴፄስ፤ እያ ጎንዳልያ ቶክያ እስ አደይ እያ ስንን ሄመቴስ።8ጎልያድ ኤቅድ ባ ቃላ ቁ ኦድ፥ “እስራኤለ ኦላንቾታ ቦላ ሀይሳዳ ያግድ ጋይሬስ፤ ህንተ ዋናና ግድ ኦላስ ከይደቲ? ታኒ ፍልስፄመ አስ፤ ህንተ ቃስ ሳኦላ አይለታ ግደከቲ? አነ ህንተ ግዶፈ እስ አስ ዶርተ፤ ሄ አደይ ታኮ ዱገ ዎ።9ሄ አደይ ታራ ኦለትድ ታና ዎኮ፥ ኑኒ ህንተ አይለ ግዳና፤ ሽን ታኒ እያ ፆናዳ ዎኮ ህንተ ኑ አይለ ግዳናነ ኑስ ሃረታና” ያግስ።10ቃስካ ሄ ፍልስፄመ አደይ፥ “ታኒ ሀች እስራኤለ ኦላንቾታ ማንዳይስ፤ ታዉ እስ አስ እምተ፤ አነ ናምአይ ኦለታና” ያግስ።11ሳኦልነ እስራኤለት ፍልስፄመ አድያ ቃላ ስእድ ዳጋምዶሶና፥ ዳሮ ያይዶሶና።12ዳዊቲ ይሁዳ ቢታን ቤተለመን ደእያ ኤፍራታ አድያ እሰየ ናአ። እሰየስ ሆስፑን አደ ናይት ደኦሶና፤ ሳኦላ ካዎተ ላይን እሰየይ ዳሮ ላይ ደእዳ ጭማ።13እሰየ ሄ ባይራ አደ ናይት ሳኦላ ካልድ ኦላ ብዶሶና። ኤንታ ሱንይ:- ባይራይ ኤልያባ፤ ካሎይ አምናዳበ፤ ሄንይ ሳማ።14ዳዊቲ ናይታ ኡባፈ ካሎ፤ ባይራ ሄ ናይት ሳኦላ ካልዶሶና።15ሽን ዳዊቲ ባ አዋ ዶርሳታ ሄማናዉ ሳኦላ ማታፐ ቤተለመ ስመረቴስ።16ሄ ፍልስፄመ አደይ ኦይታሙ ጋላስ ዎንታነ ኦማርስ ይድ እስራኤለታ ማንዴስ።17እስ ጋላስ እሰየይ ባ ናኣ ዳዊታ ሀይሳዳ ያግስ፤ “ሀ ጫጨትዳ ትያፐ ላታሙ ክሎ ግራመነ ሀ ታሙ ኡይታ ኤካዳ ነ እሻታስ ኤፋዳ ነ እሻት ዱንካንዳ ጉታ ኤለ ጋ።18ሀ ታሙ ኑካ ፕላ ኤንታ ሻላቃስ ኤፋ፤ ነ እሻት ዋን ደእያኮ በአዳ፥ ኤንቲ ሳሮ ደኤይሳስ ማላታ ኤንታፈ ኤካዳ ያ።19ካዎይ ሳኦል፥ ነ እሻትነ እስራኤለ አሳ ኡባይ ፍልስፄመታራ ኦለትሸ ኤላ ዛንጋራን ደኦሶና” ያግስ።20ዳዊቲ ጉራ ደንድድ ዶርሳታ ሀራ አስ ሄንድ፥ እሰየይ ኪትዳባ ጫን ኤክድ ብስ። እስራኤለ ኦላንቾት ባንታ ቃላ ቁ ኦድ ጋይርሸ ኦላስ ከይሽን ዳዊቲ ጋክስ።21እስራኤለትነ ፍልስፄመት እሶይ እሱዋኮ ስሚድ ሳልፕዶሶና።22ዳዊቲ ባ ኤህዳባ ሽንቀ ናገይሳ ኩሸን ዎድ፥ ኦላ ሳልፕያ ግዶ ዎፅ ብድ፥ ባ እሻታ ሳሮስ።23ዳዊቲ ባ እሻታራ ሃሳይሽን፥ ጋተፐ ይዳ ቶራ ቃራይ፥ ፍልስፄመ ጎልያድ ባ ሳልፕያፈ ጋፃ ከይድ ካሰይሳዳ እስራኤለታ ማንድሽን ዳዊቲ ስእስ።24እስራኤለ አሳ ኡባይ ሄ አድያ በእዳ ዎደ ዳሮ ያይድ ባቃትዶሶና።25እስራኤለ አሳይ እሶይ እሱዋኮ፥ “ሀ ከይያ አድያ በእደቲ? እ ቱማ እስራኤለ ማንዳናዉ ከይስ። ሀ አድያ ዎያ ኡራስ ካዎይ ሳኦል ዳሮ ሻሎ እማና፤ ባ ናእዉካ እያዉ እማና፤ እያ አዋ ኬ አሳይ እስራኤለን ካዎ ጊራ ጊረና” ያግዶሶና።26ዳዊቲ ባ ማታን ኤቅዳ አሳ፥ “ሀ ፍልስፄመ አድያ ዎድ፥ ሀ ዬላ እስራኤለፐ ደንያ ኡራስ አይበ ኦሰታናይ? ሀ ቃፃረትቦና ፍልስፄመይ ደኦ ፆሳ ኦላንቾታ ማንደይ እ ኦኔ?” ያግድ ኦይችስ።27ኤንቲ፥ “ሀ አድያ ዎያ ኡራስ ሀይስ ሀይስ ኦሰታና” ያግድ ካሰይሳዳ ዛርዶሶና።28ዳዊቲ አሳራ ኦደተይሳ እያ ባይራ እሻይ ኤልያብ ስእድ፥ ዳዊታ ቦላ ሸነ ኤፅስ። “ኔኒ ሀ በሳ አይስ ያዲ? ሄ ጉ ዶርሳታ ባዞን ኦደስ የጋዲ? ነ ኦቶሩዋነ ነ ዎዛና ኢታተ ታ ኤራይስ፤ ኔኒ ኦላ በአናዉ ያዳሳ” ያግስ።29ዳዊቲ፥ “ታኒ ሀእ አይ ኦድና? ሀር አቶሽን ኦደታናዉካ ዳንዳእክና?” ያግስ።30ዳዊቲ ባ እሻ አግድ፥ ሀራ አሳኮ ስሚድ፥ ካሰይሳዳ ኦይችን አሳይ እያዉ ካሰይሳዳ ዛርዶሶና።31ዳዊቲ ኦድዳይሳ ስእዳ አሳይ ሳኦላስ ኦድን፥ ሳኦል ዳዊታ ፄግስስ።32ዳዊቲ ሳኦላኮ፥ “ሀ አድያ ጋሶን ኦደ ዎዛንካ ትልኦፎ፤ ታኒ ነ አይለይ ባዳ፥ ሀ ፍልስፄመ አድያራ ኦለታና” ያግስ።33ሳኦል ዳዊታኮ፥ “ኔኒ ናአ፤ እ ባ ናአተፈ ዶምድ ኦላ ሜዘትድ ድጭዳ ግሾ፥ ሀ ፍልስፄመ አድያራ ኔኒ ኦለታናዉ ዳንዳአካ” ያግስ።34ሽን ዳዊቲ፥ “ታኒ፥ ነ አይለይ ታ አዋ ዶርሳታ ሄምያ ዎደ ጋሞይ ዎይኮ ጋርማፌለይ ከይድ ዶርሰ ኦይክያ ዎደ፥35እያ ካላ ባዳ እያ ዶናፐ ዎ ኤካይስ። ታኮ ስምያ ዎደ ቆያ ጩላዳ ዎይስ።36ታኒ ነ አይለይ ጋሞነ ጋርማፌለ ዎስ፤ ሀ ቃፃረትቦና ፍልስፄመ አደይ ደኦ ፆሳ ኦላንቾታ ጉዳ ግሾ እ ኤንታፈ እሱዋዳ ሀናና።37ጋሞፈነ ጋርማፌለፐ ታና አሽዳ ጎዳይ፥ ሀ ፍልስፄመ አድያ ኩሸፐ ታና አሻና” ያግስ። ሳኦል ዳዊታኮ፥ “ባ፥ ጎዳይ ኔራ ግዶ” ያግስ።38ሳኦል ባ ማኡዋ ዳዊታ ማይዝስ፤ ዳዊታ ሁጰን ናሰ ብራታ ባርኔፃ ዎስ፤ ናሰ ብራታ ፁሩርያ ዳዊታ ማይዝስ።39ዳዊቲ ባ ኦላ ማኡዋ ቦላ ማሻ ዳንጭድ ሄመትድ በእስ። ሽን ሄሳ መላ ማኦ ማእድ ኤሮና ግሾ ሄመታናዉ ዳንዳእቤና። ሄሳ ግሾ፥ ዳዊቲ ሳኦላኮ፥ “ታኒ ሀይሳ መላ ማኦ ማአዳ ሜዘታቦና ግሾ ሀይሳራ ባናዉ ዳንዳእከ” ያግድ ኦላ ማኡዋ ቃርስ።40ዳዊቲ ባ ሄን ፃምአ ኦይክድ፥ ሻፋፐ እቻሹ ሙሉሙቀ ሹቹ ዶር ኤክድ፥ ባ ሄን ቃርፂታን የግድ፥ ባ ያምባርሻ ኦይክድ፥ ጎልያዳኮ ሺቅስ።41ጎልያድ ባ ጎንዳልያ ቶክያ አድያራ እስፈ ሄመትሸ ዳዊታኮ ማትስ።42እ ዳዊታ ትሽ ኦ ፄልድ፥ ዳዊቲ አርሰ፥ ማላ ሎኦነ ናአ ግደይሳ በእድ ካስ።43እ ዳዊታኮ፥ “ኔኒ ፃምአ ኦይካዳ ታኮ ያናዉ ታና ካና ጋዲ?” ያግስ። ባ ፆሳታ ሱንን ዳዊታ ባድስ።44ካልድ ዳዊታኮ፥ “ሃያ፤ ታኒ ነ አሹዋ ሳሎ ካፎታስነ ሳአ ዶአታስ እማና” ያግስ።45ዳዊቲ፥ “ኔኒ ማሻ፥ ቶራነ ጉምባ ኦይካዳ ታኮ ያሳ፤ ሽን ታኒ ኡባፈ ዎልቃማ ጎዳ ሱንን፥ ኔኒ ጉዳ እስራኤለ ኦላንቾታ ፆሳ ሱንን ነ ቦላ ያይስ።46ሀች ጎዳይ ነና ታ ኩሸን አድ እማና፤ ታኒ ነና ሾጫና፤ ነ ቆያ ሙጫ ሆላና። ፍልስፄመ ኦላንቾታ አሀ ሳሎ ካፎታስነ ሳአ ዶአታስ ሀች እማና። ሄ ዎደ እስራኤለን ፆሲ ደኤይሳ ሳአን ደእያ አሳ ኡባይ ኤራና።47ጎዳይ ባ አሳ አሻናዉ ቶራ ዎይኮ ማሸ ኮዮናይሳ ሀይሳን ሺቅዳ አሳ ኡባይ ኤራና። ኦላይ ጎዳባ ግድያ ግሾ፥ እ ህንተና ኡባ ኑ ኩሸን አድ እማና” ያግስ።48ፍልስፄመ አደይ ደንድድ፥ ዳዊታራ ኦላ ጋሄታናዉ ሺቅዳ ዎደ ዳዊቲ እያራ ጋሄታናዉ ኦላ ደምባ ዎፅድ ብስ።49ዳዊቲ ባ ቃርፂታን ኩሸ የድድ፥ እስ ሹቹ ኤክ ያምባርድ፥ ፍልስፄመ አድያ ሶምኡዋን ጫድስ። ሹቻይ እያ ሶምኡዋ ሉክድ ገልስ፤ ያትን፥ አደይ ባ ሶምኡዋራ ሳአን ኩንድስ።50ዳዊቲ ፍልስፄመ አድያ ያምባርሻንነ ሹቻን ፆንስ። ዳዊቲ ባ ኩሸን ማሽ ባይና ፍልስፄመ አድያ ጫድድ ዎስ።51ዳዊቲ ዎፅ ብድ፥ እያ ቦላ ከይ ኤቅድ፥ እያ ዎድ፥ ፍልስፄመ አድያ ማሻ ሾሁዋፐ ሾድድ፥ እያ ቆያ ሙጭ የግስ። ፍልስፄመት ባንታ ቶራ ቃራይ ሀይቅዳይሳ በእዳ ዎደ ባቃትዶሶና።52እስራኤለ አሳይነ ይሁዳ አሳይ ደንድድ ገሬርሸ፥ ፍልስፄመታ ጋተነ ኤቅሮና ፐንገታ ጋካናዉ የደዶሶና። ፍልስፄመ አሳ አሀይ ጋተነ ኤቅሮና ጋካናዉ ሻእራይማ ኤፍያ ኦግያ ኡባን ኩንድስ።53እስራኤለ አሳይ ፍልስፄመታ የደ ስሚድ፥ ኤንቲ ዱንካንዳ ጉታ ቦንቅዶሶና።54ዳዊቲ ፍልስፄመ አድያ ሁጵያ የሩሳላመ ኤህስ፤ ሽን ፍልስፄመ አድያ ኦላ ሚሽያ ባ ዱንካንያ ግዶን ዎስ።55ዳዊቲ ፍልስፄመ አድያራ ኦለታናዉ ብሽን፥ ሳኦል በእድ፥ ቶራ ሞጮና አበኔራ፥ “ሀ ናአይ ኦደ ናኤ?” ያግድ ኦይችስ። አበኔር ዛሪድ፥ “ካዋዉ፥ ቱማ ነ አሾ ታኒ እያ ኤርከ” ያግስ።56ካዎይ ዛሪድ፥ “ሀ ናአይ ኦደ ናኤኮ አነ ኦይቻ” ያግስ።57ዳዊቲ ፍልስፄመ አድያ ዎድ ስምዳ ዎደ አበኔር እያ ሳኦላ ስን ኤህስ። ሄ ዎደ ዳዊቲ ሙጭዳ ፍልስፄመ አድያ ሁጵያ ባ ኩሸን ኦይክድ ኡትስስ።58ሳኦል፥ “ታ ናአዉ፥ ነ ኦደ ናኤ?” ያግድ ኦይችስ። ዳዊቲ ዛሪድ፥ “ታኒ ቤተለመን ደእያ ነ ኦሳንቹዋ፥ እሰየ ናአ” ያግስ።