1Kon, mi yii ñaah yakak ci adgoh ɗu, mi yi yakak findiiɓa, ŋ seede ngaŋ miskiɗ ciŋ Kiristaani te ŋ raakiɗ ɓak ŋ yaki a yak, wi teeɓohsan.2Mi yii ñaah ɗu yakak ci, taambkohaat gati Kooh dengkoh ɗu ; kinaata niiɗ ŋ ñak pehey, waaye niiɗaata sagu waaɗi ɗu waaɗa tum, findi Kooh waaɗoh. Ɗu joyɗi waak kopor nga ŋ ini lahɗi waas waaye ɗu joy niiɗ gatiŋ ɗu na sawar.3Ɓooɓi Kooh dengkoh ɗu, kinaat ɓa toon kikilifa ; waaye nikaat altiɗkohaah nga ɓa.4Ŋ ineem, Niiɗohi yaki hay ɗah, ɗu hey rahse raayaani moɗkiŋ wa minɗi yahuk.
Findi kosiɗ ci joy mand
5Ɗu ɓi komaakci, namaat kerhiɗ yakak ci. Ɗu ɓi kosiɗ ci jen ruhsiɗaat haf ɗu, ne yaa nu nga ɗu ɗah taambkohee morom ce, laam Fiis ci woo ne :« Kooh hunɗi na yaksiɗkoh ci,ɓi ruhsiɗ haf ɓa, ɓeɗ a na teeɓe baah kiŋ ɗe. »6Ruhsiɗaat haf ɗu ŋ fiki Kooh, yi raak hatil, ne a meeɓ ɗu ŋ jamanooni a waaɗoha.7Kaambsukaat jaahiɗ ciŋ ɗu jen nga ɗe, laam a yi na taambkohee ɗu.8Hunaat na sagoociŋ ɗu te ɗu yunuk ! Sangiɗiŋ ɗu, Seytaani, yii wil findi gayndeeni na ŋaare, a na waake ɓoyi a sifiñsohan.9Ndengsiɗkohaat na ɗe na kos ndengiɗ. Te ɗu inah ne ɓaah ciŋ ɗu kosiɗ ci ŋ adinaani jen, ɓa ɗii raak miskiɗ findiiɗu.10Miskiɗiŋ ɗu hey ɓaate maañ ƴissuut. Waaye Kooh, yi Heɗ baahoh, ɓeeɗkiɗ ɗu ŋ haf ce ne ɗu ɓaah na ɗe ndamiŋ ɗe po faw ŋ niki ɗu nik ŋ Kiristaani. Kooh yeem hey ɗu mitɗe, a ndengiɗ ɗu tir po ali in minanɗi ɗu fol.11A yi nikaat Heɗ hatil po faw ! Amiin !
Askohi
12Ɓaah ɓoo Silweng, ŋ amb ɗe findi ɓaah cariɗ oolku, ŋ taamboh nga ɗe, ŋ kaɓɗohha ɗu woo ci rohƴiɗ cii, ne ŋ ñaah ɗu, ŋ seede'iɗ ɗu ne ɗu amb ŋ baahohiŋ Kooh keeh-keehi.13Ɓi Janguuni Kooh kooɗ findiiɗu ŋ kur-taahi na woyse Babilon, ɓa ɗii kañiɗ ɗu. Maarko, kuɓuuso, yii kañiɗ ɗu.14Kañɗohaat ŋ harmban ɗu na morgiɗkoh huniɗ na waaɗoh. Ɗu ɓi nik ŋ Kiristaani jen, nikaat ŋ jam !