1Kon saɓsukohaat na in nu nik añaand wala ñaañoh, naafeeha, siis wala ɗooɓoh ɗah.2Findi komaakci han rimu na waaɗohe miis koceet, waaɗohaat ɗaa woo kiŋ Kooh, weɗ min ɗu hooɗiɗ po ŋ muca.3Laam ɗu ƴoohiɗ po ɗu inhiɗ findi Heɗi baahoh.
Atoh fi amb taɓahi
4Reɓaat ŋ Heɗi, a yi atoh fi na pese. Wa keeh ne ɓooɓi mbet ɗe mbet, waaye Kooh kooɗiɗ ɗe, te a waaɗaah keeh-keeh nga ɗe.5Ɗu ŋ haf ɗu, findi atoh ci na pese, nikaat atoh taɓahoha kahan Kooh. Ɗu nik cuuɓ seeƴkiɗoh hooliɗ wuu ce, ne ɗu seeƴkee ɗe na in ci baahiɗ ci Fuuɗsi Hoolohngaani na tumɗukohee ɗu. Ca nik seeƴuk ci neɓ ɗe taamboh ŋ Yeesu Kiristaa.6Laam inii weɗ Fiis ci woo :« Mi yii yip atoh fi amb taɓahi ngaŋ Siyong.Wa atoh fi ŋ kooɗ, atoh waaɗaah keeh-keeh,te yaa nu taɓah kosiŋ ɗe nga ɗah,a kaci'anɗi nga muk. »7Kon, ini kaɗ nga ɗu, ɗu ɓi kosiɗ ci, atoh feem waaɗaah lool. Waaye ŋ ini kaɗ ŋ kosaaɗiici, Fiis ci woo ne : « Atoh fi taɓahoh ci mbete mirndohiɗ nik atoh fi amb taɓahi. »8Te ŋ Fiis ci poyi wa « atoh fi na kafndohe, folohe. » Kosaaɗiici ɓa ɗii kafnduk ŋ atoh feem, laam ɓa teyɗukɗi woo kiŋ Kooh. Ineem weɗ ini joyee ɓa rahas.9Waaye ɗu nak, ɗu cuuɓ kooɗuuɗ, cuuɓ seeƴkiɗoh wuu Kooh Buuri, cuuɓ hooliɗ wuu ce, cuuɓi a raakoot. Ɗu nikiɗ in ceem ne ɗu yegɗoh in ci moɗohngaan ci a haɓiɗ. A yi ɓeeɗuk ɗu, ɗu pulla ŋ ñuusi, ɗu hayya ŋ siñaariŋ ɗe moɗohngaani.10Wotɓa, ɗu nikeeɗi cuuɓ,waaye woti, ɗu cuuɓiŋ Kooh,wotɓa, ɗu rahseeɗi yirmohiŋ ɗe,waaye woti, ɗu rahsiɗa.
Pes findi kosiɗ ŋ Adina
11Ɓaah ciŋ ngo ŋ keeñkoh, ɗu ɓi genohaah findi hanhe ŋ kehƴi, mi yii ñaah ɗu, ne ɗu wortuk taambiɗ in ci neɓ kiñin ciŋ ɗu, ci na hiñohe na ini nik nga ɗu.12Raakaat pesohaaɗ moɗiɗ ŋ harmban kosaaɗiici, ne ɓa yambee ɗu ne ɗu tumoh moɗaaɗi ɗah, ɓa hot tumohaaɗ ciŋ ɗu moɗiɗ ci te ɓa yakiɗ Kooh ŋ mbehi a hayohan na hatil.13Teyɗukaat kikilifa nu nik, sagu Heɗi, teyɗukɗaat buuri yakkiŋ Rom, yi adgoh kur ki,14na goornoor ci a na tuuƴe ne ɓa kuƴis tumoh moɗaaɗiici, ɓa ɗaap tumoh baahiɗ ci.15Laam, ineem weɗ Kooh waaɗ, ɗu tumee in baahiɗ ne ɗu rang nguɓ ciŋ naandiɗ ci na woye sagu inhaaɗi.16Ɗu tumohan ɗaa findi ɓoyi raak haf ce, te kinaat ɗasɗuk ŋ raaki ɗu raak haf ɗu, ɗu tumee in baahaaɗi, waaye tumaat findi ɓoyi na ñaamke Kooh.17Eɗaat ɓooɓi jen cir, ɗu waaɗ mboolndiŋ kosiɗ ci, ɗu nup Kooh, ɗu eɗ buuri cir.
Muñ miskiɗ ci findi Kiristaani
18Ɗu ɓi ñaam ci, kerhiɗaat heɗ ciŋ ɗu, ɗu eɗ ɓa cir keeh-keeh. Ŋ wooɗi ɓi baah, te ɓa soossa dong, waaye kerhiɗaat sah añaandiɗ ci.19Laam a tum in baahiɗ, ɓoyi na muñe miskiɗ ci a yeyyooɗi, te Kooh dong tah.20A raak wi nde ndam nga, ɓoyi muñ laɓ sagu tum ini lahɗi waas ? Waaye ɗu muñee miskiɗ ci, raak ɗu tum baahiɗ ɗah, ɗu tum in baahiɗ ŋ fiki Kooh.21Te Kooh ɓeeɗuk ɗu ŋ ineem, laam Kiristaani ŋ haf ce, a nameen raak miskiɗ wuu ɗu, a faɗiɗta ɗu taambɗaah, ne ɗu taamb ŋ kot ciŋ ɗe.22A moosɗi tum ali bakaaɗ, te woo ñaañoh moosɗi puloh ŋ nguɓiŋ ɗe.23A ɓasuusa ɗah, a na wirndukeeɗi. A deguusa miskiɗ ɗah, a na gapkoheeɗi, waaye a na wike haf ce ŋ yaah ciŋ Atte'ohi yurhiɗi.24A yi ŋ haf ce, a yi gaduk bakaaɗ ciŋ ɓoo ŋ faaniŋ ɗe ŋ daaƴa a daaƴu ŋ kurwaana ne ɓoo reehɗukoh na bakaaɗ, aas ŋ kipes yurhiɗ. E gaañ ciŋ ɗe wiriɗ ɗu.25Laam ɗu muuƴee muuƴ findi mbaal, waaye ɗiski wa nik ɗu dokkiɗ ŋ niiɗohi na niiɗee ɗu.