Entambala y’Emausi
1Gorigiyasi anacijaho arhôla abasirika bagenda n’amagulu bihumbi birhanu, abalwîra oku nfarasi cihumbi balya b’entwâli: banacigenda badufu.2Mpu bagendigorha ecihando c’Abayahudi n’okubarhibukira cîfudukwe, abantu b’omu cishagala c’e Siyoni bayisha babalangûla enjira.3Yûda erhi ayumva okola yêne boshi n’abantu bâge b’entwâli, barhabâla mpu bakoze entambala kuli ogwôla murhwe gwàli aha Emausi,4oku emirhwe yâbo eciri eshandabîne eburhambi bw’ecihando.5Gorigiyasi anacirhibukira budufu omu cihando ca Yûda. Ci konene arhacishimanagakwo ndi; okubundi anacirhondêra okujà abalongereza omu mirhundu, erhi anajà acibwîra erhi: barhuyâsire.6Erhi bucânûla Yûda alamukira oku kabanda n’engabo yâge ya bihumbi bisharhu; ci konene barhali badwîrhe empenzi ciru n’engôrho bakasîmire muli ago mango.7Erhi balangîra ecihando c’abapagani coshi cizibu na cibambize n’abalwî na nfarasi boshi bacizungulusire, bali bantu bakômera entambala.8Yûda anacibwîra abantu bâge erhi: murhayôbohaga ogwôla mwandu, murhanarhemukaga hano bamutulakwo entambala.9Kengêri kurhi ababusi bîrhu bafumaga omu nyanja erhi Faraoni mwâmi w’e Mîsiri akola abashimbire n’engabo y’abasirika bâge.10Ci bunôla rhuyakuzagye omu mpingu, anahashirhufà lukogo, anakengêre galya malaganyo gâge n’ababusi bîrhu, kandi anamalîra oku lwene eyôla ngabo mwabona embere zîrhu.11N’ahôla amashanja ganamanya oku hali olwîra n’oku langa Israheli.12Balya bashombanyi banaciyinamula amasù, banacilangîra Abayahudi bayishire babarhabâlire.13Banacishagamuka omu cihando bakola bakoza e ntambala, n’abo abasirika ba Yûda banaciyisha babûha emishekera.14Lwana cibumbana, abashombanyi, embaga zahungumuka zoshi, banacikûla omulindi omu kabanda.15Abâli bazinda boshi bahungumuka n’engôrho y’Abayahudi. nabo abôla Buyahudi, banacibaminika kuhika aha Gezeri na kujà omu kabanda ka Idumeya, bâbo e Azoti, lwanacigenzikanwa na Yamuniya, omu bashombanyi mwafamwo hôfi bihumbi bisharhu.16Okubundi Yûda n’engabo yâge bashûbûka emunda bali baminikîre abashombanyi.17Anacibwîra olubaga erhi: Murhahubiraga okuhagula, bulya eyi ndi ntambala eciri yarhulinda:18Gorigiyasi na ecikembe câge bali omu ntondo hôfi nîrhu, muhire omurhima omu nda rhulwîse abôla bashombanyi bîrhu, buzinda mwanayishigiba lyo muhagula buzira bôba, ebijandikwa byâbo.19Oku Yûda ayûs’iderha ntyôla, banacilangîra cigamba ciguma c’abantu ba Gorigiyasi canacilabukira oku ntondo.20Bâbona oku abâbo kuyâka bayâsire n’oku Abayahudi badûlisire ecihando câbo muliro, gulya mugî bakazâgilangira gwatumbûka gône, gwakazagiyêrekana ebyabîre.21Omu kubona ntyôla barhemuka, n’erhi babona omu kabanda oku abasirika bene Yûda bacîrheganyize okulwa.22Lêro boshi bajiyakira omu cihugo c’Abafilistini.23Enyuma lyahôla Yûda abâga lyo ayishihagula; bagukumba amasholo, enfaranga emishangi y’akaduku k’akalinga n’ak’omukara na bindi hirugu binji by’engabo.24Erhi bakola bashûbûka, Abayahudi bayimba enyimbo banakuza Ow’enyanya bayisha baderha mpu: «Bulya ali mwinjà, n’obwonjo bwâge buli bw’ensiku n’amango».25Kurhenga olwo lusiku, Bene Israheli barhangirhamûka.26Baguma bafumaga muli balya bashombanyi, bagendimanyîsa Lisiyasi ebyabîre.27Erhi ayumva ntyo, arhoga, arhemuka ebwa kubà emihigo yâge erhacibaga nka oku anali alangâlîre n’ebwa kubà amarhegeko ga mwâmi garhacigendekaga.Lisiyasi arhabâla obwa burhanzi
28Omu mwâka gwakulikiraga, Lisiyasi ashubikomekera n’abasirika bâge bagenda n’amagulu, bali bihumbi makumi galindarhu, boshi ntwâli, na bihumbi birhanu bya balwîra oku nfarasi mpu arhabâlîre Abayahudi.29Banacilîkûla omu Idumeya banacitwa icumbi hôfi na Betisuri. Yûda anacibarhabalira n’engabo yâge ya bantu bihumbi ikumi.30Omu kubona eyôla ngabo nzibuzibu ashenga ntyâla: Oyagirwe waliha côkola w’Israheli. We watwâga omu mulala gwa olya muntu ntagagajwa n’okuboko kwa mwambali wâwe Daudi, we wanahânaga ecihando c’Abafilistini omu maboko ga Yônatani, mugala wa Saulu boshi n’omubarhuzi w’emirasano yâge.31Ogonyererage eyîra ngabo omu maboko g’oluhaga lwâwe Israheli, enshonyi zibabumbe boshi n’abasirika bâbo abagenda n’amagulu na banyakulwîra oku nfarasi bâbo.32Ohire entemu omu bigamba byâbo, orhibule eyôla misî yâbo balimbira n’okuhimwa kwâbo, ojire kubajugumye.33Obagalike n’engôrho y’abakukunda, na ngasi boshi banayishi izîno lyâwe bakuhè ebîtakîro bya okukukuza.34Lwanacibumbana, bantu bihumbi birhanu byanacifà omu ngabo ya Lisiyasi banacikahirima embere z’Abayahudi.35Erhi abona engabo yâge yamahimwa, n’oku oburhwâli bwa bene Yûda buli, abâli bacîhânyire mpu balame erhi bafè n’oburhwâli, Lisiyasi anacishubira e Antiyokiya, anacishûbûza eyindi ngabo nyinji kulusha mpu ayishubirane e Buyahudi.Obucêse bw’ecirhînyiro
36Yûda na bene wâbo banaciderha mpu: Lolà oku rhwamâhima abashombanyi bîrhu. Kanyi rhugendicêsa ecirhînyiro cîrhu rhunacishagalule.37E ngabo yoshi yanacishûbûzanya, yanacisôkera oku ntondo ya Siyoni.38Bashimâna kuli eyo ntondo aka-Nyamuzinda gukola gubà mulangabule, oluhêrero erhi mîra balusherêzagya, ebirhebo erhi byarhenzire, obululi erhi bûkola bumeziremwo ebiri nka oku ntondo, ebisîka erhi mîra byahongolagwa.39Okuhandi boshi banacisharhangula emyambalo yâbo, bajà omu mishîbo minene, babulagira oluvù okw’irhwe lyâbo.40Okuhandi boshi bafukama bayûnamiriza akamalanga kahika oku idaho erhi n’emishekera edwîrhe yabûhwa, boshi bakazibandira orhuhababo emalunga.41Okuhandi Yûda anacirhegeka murhwe muguma mpu bagendilwîsa ab’e Sîriya baciri omu cihugo kuhika bacêse ecirhînyiro.42Okubundi anacicîshoga abadâhwa barhaliko ishembo, abacigwêrhe obushiru oku kanwa ka Nnâmahanga.43Bacêsa aka-Nyamuzinda, banacilunda hantu haguma galya mabuye bakahomôlagamwo.44Okuhandi bacîdôsa kurhi bankajira oluhêrero lw’enterekêro lwahemula gwa.45Enkengêro nyinji zanacibayishira z’okuluhongola lulya luhêrero, lulekibakoza nshonyi kulya kubà abapagani baluzinzize. Banaciluhongola,46n’okugendilunda amabuye galo oku ntondo y’aka-Nyamuzinda, aha hantu hashingânîne, okubalinda omulêbi wababwîra oku bajira.47Banacirhôla amabuye nka kulya ganali, kulya irhegeko linadesire, banaciyûbakamwo oluhêrero luhyâhya nka oku binadesirwe omu burhegesi bwa mîra.48Banaciyûbaka ahatagatîfu kuguma n’omu ndalâlà y’aka-Nyamuzinda; bayumanyanya obululi.49Bashubihiramwo ebirugu bihyâhya, bahiramwo akandikandi kamole; oluhêro lw’omugavu n’eyindi ntalulè.50Batumbûkiza enshangi oku luhêro, bayâsa matara gali oku kamole ganacimoleka omu ka-Nyamuzinda koshi.51Banacihira emigati oku ntalulè banacimanika emyenda, emishangi. Erhi babà bamâyûsa emikolo banajiraga yoshi,52omu nsiku makumi abiri n’irhanu z’omwêzi gwa mwenda, ogwôla mwêzi guderhwa Kisilewu, omu mwâka gw’igana na makumi anni na munâni, banacizûka hibungubungu,53Banacigendirherekêra enterekêro kulya irhegeko linadesire kuli lulya luhêro luhyâhya, lw’enterekêro z’embâgwa banali bamârheganya.54Bajira olusiku lukulu lw’okugishwa kw’oluhêrero.55Olubaga lwoshi lwafukamiriza, lwaharâmya, lwanacikuza ow’enyanya ye wabahimiraga abashombanyi.56Bageza nsiku munâni erhi bajira olukulu lw’okugishwa kw’oluhêro, banacirherekêra embâgwa zâbo n’obusîme bunene, barherekêra enterekêro z’omurhûla n’ez’okukuza.57Banaciyinjihya amalanga g’aka-Nyamuzinda n’ebiri nka bimanè bya masholo, banacishakûlula emihango y’aka-Nyamuzinda kuguma n’ebisîka, banacihiramwo enyumvi.58Olubaga lwashagaluka bwenêne n’enshonyi z’abapagani balubonesagya zahwa.59Yûda boshi na bene wâbo kuguma n’olubaga (endêko y’Israheli), banacirhôla emihigo mpu agôla mango oluhêro lwagishagwa, gakayôrha gakengwa ngasi mwâka miregerege munâni kurhenga omu nsiku munâni, kurhenga omu nsiku makumi abiri n’irhanu z’omwêzi gwa mwenda, basîme banacîshinge.60Muli agôla mango gônene, omu marhambi g’entondo ya Siyoni bamuzongolosa ngurhu zijîre enyanya n’eminâra mizibuzibu, mpu lyo abapagani balekicishubiyîsha n’okuhemukira eyôla nyumpa okw’embere.61Yûda ahiraho abalanzi bakazâgilanga entondo Siyoni. Azibuhya Betisuri mpu lyo olubaga lubà n’akacikirizo kazibu ah’ishiriza lya Idumeya.