Xoossay Solomones Zaaridi Qoncis
1Solomoney Xoossa keethaanne kawo gadho keexidi wursida wode ba wozanan oothanaw amotida ubbaa polidaape guye,2Gaba7oonan kase qoncidaysada Goday zaaridi iyaw qoncis.3Goday, “Neeni ta sinthan woossida woosaanne waasuwa taani si7as. Neeni keexida keethay merinaw ta sunthay iyan xeegetana mela oothada geeshshas. Ta ayfeynne ta wozanay ubba wode yan daana.4Shin neeni ne aaway Dawiti hemetidaysada borey bayna suuretethan ta sinthan hemetiko, ta kiita ubbaa oothikonne ta wogaanne ta higgiya naagiko,5taani ne aawa Dawitas, ‘Isra7eele kawotetha araatan uttiya asi neeni kumethi dhayaka’ ” gidaysada ne araata Isra7eele bolla merinaw minthada essana.6“Shin ne woyko ne nayti tana kaalo aggidi guye simmiko, taani hintena kiitida ta kiitaanne ta wogaa naagonna ixidi allaga xoossata goyinniko,7Isra7eele asaa taani kase entaw immida biittafe shoddana; taani ta sunthaas geeshshida ha keethaa aggana. Isra7eeleti asa ubbaa giddon kadhesinne miichas attana.8Ha malaalsiya Xoossa keethay laaletidi laaletha doore gidana. Matara aadhiya asa ubbay dagammidi, ‘Goday ha biittanne ha Xoossa keethaa ayis haysada oothidee?’ yaagana.9Asay zaaridi, ‘Enta mayzata Gibxefe kessida, Godaa banta Xoossaa enti aggidi, allaga xoossata kaallida gishonne enta goyinnida gisho Goday enta bolla ha iitabaa ubbaa ehis’ ” yaagidi zaarana.Solomone Hara Oosota
10Solomoney ha nam7u keethata, Xoossa keethaanne ba kawo gadho keexida laatamantho laytha wursethan,11Xiroosa kawoy Kiraami xiidda, ziganne worqa ubbaa immida gisho, Galilan de7iya laatamu katamata Solomoney iyaw immis.12Shin Kiraami Xiroosape keyidi, Solomoney iyaw immida katamata be7anaw bida wode katamati iya ufaysibookona.13Kiraami Solomoneko, “Ta ishaw, haysati ne taw immida katamati ayba katamee?” yaagis. Hessa gisho, I he katamata, “Pathonna biitta” yaagidi sunthis. He heeray hachi gakanaw he sunthan xeegetees.14Kiraami 4,000 kilo giraame worqaa kawa Solomones kase yeddis.15Xoossa keethaa, kawo gadho, Miilo, Yerusalaame katama gimbiya, Haxoora, Magidonne Gezera gimbanaw kawa Solomones oosanchoti de7oosona.16Gibxe kawoy kase Gezera oykidi taman xuuggis. Kataman de7iya Kanaane asata wodhis; Solomoney ekida ba na7iw woyto oothidi immis.17Solomoney Gezeranne garsa Beet-Harona zaaridi keexis.18Ba7ilaata, Yihuda mela de7iya Tamaara,19buqura minjiya katamata ubbaa, ba paratanne para gaareta naagiya katamata, Yerusalaamen, Libaanoseninne I haariya biitta ubban keexanaw koyida ubbaa keexis.20Amooretape, Hitetape, Parzetape, Hiwetapenne Yaabusetape attida asati ubbay Isra7eele ase gidokona.21Enti Isra7eele asay biittafe wursidi dhaysanaw danda7onna ixin he biittan attida asaa kochata. Solomoney enta aylle oothin, enti hachi gakanaw aylletethan oothosona.22Shin Solomoney Isra7eele asaape oonaka aylle oothibeenna. Enti iyaw moorinnata, olanchota, toora mocona, para gaare laagiya asaas halaqanne para asi gididi oothidosona.23Enti Solomoney oosisiya keethaa keexeyisata halaqata; enti ichashu xeetanne ishatama.24Gibxe kawa na7iya Dawita katamaape Solomoney iw keexisida keetha yidaape guye, I Miilo katamaa gimbis.25Solomoney Godaas gimbida yarsho bessan xuussanne issifetetha yarsho laythan heedzu toho yarshees. Godaa sinthan ixaane cuyisees; hessan Xoossa keethay poletis.26Hessafe guye, kawoy Solomoney Edoome biittan Zo7o Abbaa gaxan, Eloota matan de7iya Exiyoon-Gabiran markabeta oothis.27Kawoy Kiraami Solomone asaara oothana mela markabe laagon loohida ba asata kiittis.28Enti Ofira biitta bidi 14,000 kilo giraame worqaa kawa Solomones ekidi yidosona.