1 Avaarnọng4mfo_lis

Akhaan-nọng ọmaana atzọhmnọng pa Sọlọmọn

1Iwa ọvaar Sọlọmọn ọdabh Israẹl biphyir.2Ma wọ iwa ode adenho p'akhaan-nọng pẹ:
Azariya kw'ode nnwa kwa Zadọk kw'ode ọfọhnẹja;3Ẹlihorẹph ọmaana Ahija p'ade va p'ijinọng pa Shisha, ade akkẹri; Jehoshaphat kw'ode nnwa kw'Ahilud, ode oye-idik;4Bẹnaya nnwa kwa Jẹhoyada, ode odenho kw'arim-egbong; Zadọk ọmaana Abiyata, ade afọhnẹja;5Azariya kw'ode nnwa kwa Natan, ode okkeri-adabhi pa ngọma; Zabud kw'ode nnwa kwa Natan, ode ọfọhnẹja ttara ọnọng kw'ọm-ọgbaak ọvaarnọng atzim;6Ahishar, ode ọphaar-idik s'ẹvaar-ttọhmma; Adoniram kw'ode nnwa kw'Abda, ode okker-itzọhm s'ini agbukha ipe.
7Iwa Sọlọmọn ọkhaam adabhi-ngọma jobh obhiri afa, k'Israẹl biphyir, p'anangi ọvaarnọng ọmaana anọng p'awobh k'ọvaar-họhm ọchattọhk. Ọnọng kpenamkpen ọkhaam ophe wani ka cho kw'osi mphaari s'ọchattọhk mva ọnanang.8Ma wọ ode che pabẹ:
Bẹn-Hur ọdabhi mgbegbeho s'Ephraim;9Bẹn-Dẹkẹr ọdabh Makaz, ọmaana Shalbim, ọmaana Bẹt-Shẹmẹsh ttara Ẹlọn-Bẹtanan;10Bẹn-Hẹsẹd ọdabh Arubot (Soko ọmaana irek sa Hẹphẹr ide sẹ);11Bẹn-Abinadab ọdabh Naphot-Dor (wa kẹ ọtzọk Taphat kw'ode ominanwa kwa Sọlọmọn k'ọbada);12Baana kw'ode nnwa kw'Ahilud, ọdabh Taanak ọmaana Mẹgido, ttara ka Bẹt-Shan biphyir kw'ọbaang Zarẹtan, k'irekh-irek kwa Jẹzrẹl, ttẹwọr ka Bẹt-Shan maa, apyiri Abẹl-Mẹhola, ajekha achina ka Jọkmeam;13Bẹn-Gẹbẹr ọdabh Ramọt-Gilead (orukhabe fa Jair kw'ode Manasẹ ka Gilead ode fẹ, ọmaana ngọma s'Argọb ka Bashan, ttara idedenmon sẹ s'ikhaam abaakha arọbh attaan p'akhaam mbaakha-mma sa brons);14Ahinadab kw'ode nnwa kw'Ido, ọdabh Mahanayim;15Ahimaz ọdabh Naphtali (kẹ okk'Basemat kw'ode ominanwa kwa Sọlọmọn ọtzọkha k'ọbada);16Baana kw'ode nnwa kwa Hushayi, ọdabh Ashẹr ọmaana Alọt;17Jehoshaphat kw'ode nnwa kwa Parua ọdabh Isaaka;18Shimeyi kw'ode nnwa kw'Ẹla, ọdabh Bẹnjamin;19Gẹbẹr kw'ode nnwa kw'Uri ọdabh Gilead (k'obhon kwa Sihon kw'ode ọvaarnọng kw'ab'Amọr, ọmaana k'obhon kwa Og kw'ode ọvaarnọng kwa Bashan). Kẹ-kẹ wọ iwa ode ọdabhi kw'ẹkhọma nduma.

Ikkọ ọmaana ekkoji cha Sọlọmọn

20Iwa anọng pa Juda ọmaana p'Israẹl ahaabhi mach'oyeyeng kw'ẹraanga-kha. Wa anọng mba achi, agwo ettem ebire ẹdaam bẹ.21Mando kwa Sọlọmọn ọdabhi ivaarbhon nna biphyir, ttẹwọr k'ọraanga kw'Euphrates, akwu apyiri k'irerek s'aPhilistiya maa, apyiri k'enem ch'Ijip. Wa ngọma nna mminchena Sọlọmọn nnduma, sẹ mbiri nwobha k'irekh-irek kwẹ, k'akpen pẹ biphyir.22Iwa ọchattọhk fa Sọlọmọn orori k'ewu ode akwakkama ẹrọbh obhiri jobh p'abubuma akkakka, ọmaana akwakkama arọbh attaan p'ọchattọhk.23Abhaam jobh pa bẹ anangi ọchattọhk k'ọpa, abhaam ẹrọbh pa bẹ anangi araraari, ọmaana arukhimaan arọbh azen ọmaana avu, akwu attara k'achimi, ọmaana njip, ọmaana ochimi-hora ttara inọhn s'ijibhi for.24Wa kẹ ọdabhi avaar p'idedenmon biphyir, k'okhubha kw'ewuchen em-edimi k'Ọraanga kw'Euphrates, ttẹwọr ka Tiphsa maa, apyiri Gaza obiro oruk k'odidiri k'okhubha kpenamkpen.25Israẹl ọmaana Juda, ttẹwọr ka Dan maa, apyiri Beershẹba arukhi k'odidiri, k'ogbe kwa Sọlọmọn. Ọnọng kpenamkpen ochi agrep ttara afig pa bẹ-bẹ ọkhaam.26Iwa Sọlọmọn ọkhaam obe fa bẹ am-ohok akpaar pa nnyanyaang mmindọr nnọhna jobh, obiro ọkhaama anyanyaang-pa nnọhna ẹrọbh obhiri jobh.27Adabhi pa ngọma, atzọk ọnọng-ọnọng k'ophe kwẹ, am-achena ọvaar Sọlọmọn ọchattọhk, ọmaana anọng biphyir p'am-achi ọttọhk k'okpokkoro kw'ọvaarnọng. Bẹ an-are bi, ọttọhk manda vani, bẹ kowori.28Bẹ abira atzima nnanga sabẹ sa abarli, ọmaana araraari-bukhi pa bẹ anang nnyanyaang sa mmindọr akpaar, ttara nnyanyaang ndọdọk, akwu ahok atzor k'obe fabẹ.

Ekkoji cha Sọlọmọn

29Iwa Ibinọkpaabyi ọnang Sọlọmọn ekkoji ọmaana eronga ch'ideden, ttara etzina ch'ẹhaabhi mach'oyeyeng kw'ẹraanga-kha.30Ekkoji cha Sọlọmọn ẹbari ẹyọhnga ekkoji ch'anọng biphyir k'okhubha kw'ewuchen em-eyin, ebire ẹbar ọtzam ẹyọhnga ekkoji ch'Ijip biphyir.31Wa kẹ ọkhaam ekkoji ọyọhnga ọnọng kpenamkpen, attar Ẹtan kw'ofon Ẹzra. Ọkhaama ekkoji ọyọhnga Heman, ọmaana Kalkol, ọmaana Darda p'ade va p'ijinọng pa Mahol. Ọtza che k'idibhon idọdọk biphyir.32Ọgbaak adem nnọhna arọbh azenamfa obhiri arọbh jobh, obiro ọkkọhn amọng nnọhna mfa obhiri arọbh jobh obhiri azen.33Ọgbaak idik okhuri akpen p'araraari, ttẹwọr k'ichirọnọgbagba sa Lebanọn maa, apyiri ka hisop p'ameni k'echumi. Obiro ọgbaak idik s'ikhuri nden, ọmaana ọnọhn, jọhk ttara atzum, ọmaana nsitzen.34Avaarnọng p'ọyagbin p'akk'odik kw'ekkoji cha Sọlọmọn abhaanga, am-atzọhm anọng p'afon ka ngọma ndọdọk biphyir bi, bẹ akwu ayonga itzọhng anang ekkoji cha Sọlọmọn.
expand_more
Search