ሶሎሞነይ ጭንጫተስ ዎስስ
1ሶሎሞነይ ግብፀ ካዋራ ቦሎትድ፥ እያ ናእዉ ባዉ ማቾ ኤክስ። ባ ካዎ ጋ፥ ፆሳ ኬነ የሩሳላመ ዩሹዋ ድርሳ ግምብድ ኦንጋና ጋካናዉ እዮ ዳዊታ ካታማን ዎስ።2ጎዳ ሱንን ፆሳ ኬይ ቡሮ ኬፀትቦና ግሾ አሳይ ሄ ዎደ ቃ ጎይኖ በሳን ያርሽሸ ጋምእስ።3ሶሎሞነይ ጎዳ ዶስያ ባ አዋ ዳዊቲ ዎጋን ሄመትስ። ሽን ቃ ጎይኖ በሳን ያርሽሸነ እፃነ ጩይስሸ ጋምእስ።4ካዎይ ያርሾ ያርሻናዉ ጋባኦና ብስ፤ ሄ በሳይ ሀራ ኡባፈ አድ ኮሽያ ቃ ጎይኖ በሲ። ሶሎሞነይ ሙኩሉ መሄ ኤህድ፥ ሄ ያርሾ በሳን ፁሳ ያርሾ ያርሽስ።5ጎዳይ ሶሎሞነስ ጋባኦናን ቃማ አሙሆን ቆንጭድ፥ “ታ ነዉ አይ እማና መላ ኮያይ?” ያግስ።6ሶሎሞነይ፥ “ነ አይለይ፥ ታ አዋይ ዳዊቲ ነዉ አማነትዳ፥ ፅሎነ ሱረ አስ ግድዳ ግሾ፥ ኔኒ እያ ዶሳዳሳ። ኔኒ ሀ ኬሀተን፥ ሀች እያ አራታን ኡትያ አደ ናኣ እያዉ እማዳሳ።7“አቤት ጎዳዉ፥ ታ ፆሳዉ፥ ኔኒ ታና ነ አይልያ፥ ታ አዋ ዳዊታ በሳን ካዎዳሳ። ሽን ታኒ ጉ ናአ ግድያ ግሾ፥ አሳ ዋታዳ ካለኔኮ ኤርከ።8ታኒ፥ ነ አይለይ ነ ዶርዳ አሳ ግዶንነ ታይቦይ ባይና አሳ ግዶን ደአይስ።9ሄሳ ግሾ፥ ታኒ ነ አሳ አይሳናዉ ሎኦነ ኢታ ሻካዳ ኤራና መላ ታዉ ነ አይልያስ አኬካ ዎዛና እማ። ሄስ ሀኖና እፅኮ፥ ሀ ነ ግታ አሳ ኦን ካለናዉ ዳንዳኢ?” ያግስ።10ሶሎሞነይ ሄሳ ኦይችዳ ግሾ፥ ጎዳይ ኡፋይትስ።11ፆሳይ እያኮ፥ “ኔኒ ነዉ ላይ አዱቃና መላ ዎይኮ ዱረ ግዳናዉ ዎይኮ ነ ሞርከት ሀይቃና መላ ኦይቾናሽን፥ ሀ አሳ ሱረ ፕርዳን አይስያ ጭንጫተ ኦይችዳ ግሾ፥12ሄኮ፥ ነ ኦይችዳይሳ ታ ነዉ እማና። ሀይሳፈ ካሰ ነ መል ባይናይሳዳ ህዛፐ ጉየ ነ ማል ደንዶናዳ ጭንጫተነ አኬካ ዎዛና ነዉ እማና።13ቃስ ነ ኦይቾናባካ ታ ነዉ እማና፤ ኔኒ ደእዳ ላይ ኡባን ሀራ ካዎይ ደሞና ዱረተነ ቦንቹዋ ታ ነዉ እማና።14ነ አዋይ ዳዊቲ ሄመትዳይሳዳ ታ ኦግያን ነ ሄመትኮ፥ ታ ዎጋነ ታ ኪታ ናግኮ፥ ታ ነ ላይ አዱሳና” ያግስ።15ሶሎሞነይ ስኮፈ ባርክድ፥ ሄኮ፥ ፆሳይ እያዉ አሙሆን ኦድዳይሳ አኬክስ። እ፥ የሩሳላመ ስሚድ፥ ጎዳ ጫቆ ታቦትያ ስንን ኤቅድ፥ ፁሳ ያርሾነ እስፈተ ያርሾ ያርሽስ። ያትድ፥ ባ ሞርናታስ ግብራ ጊግስስ።ሶሎሞነይ ሱረ ፕርድስ
16እስ ጋላስ ናምኡ ላይማ ማጫሳት ካዋ ሶሎሞነኮ ይድ፥ እያ ስንን ኤቅዶሶና።17ኤንታፈ እስንያ፥ “ታ ጎዳዉ፥ ታንነ ሀ አስያ እስ ኬን ደኦስ። ያን እያ ታራ እስፈ ደእሽን፥ ታ እስ ናአ የላስ።18ታ ናአይ የለትዳ ሄን ጋላስ ሀ ማጫስያካ እስ ናአ የላሱ። ሄ ኬን ኑፐ፥ ናምኣፈ ሀራ አስ ኦንካ ባዋ።19“እስ ቃማ እያ ባና ናኣ ቦላ ዝንእዳ ግሾ፥ ሀ ማጫሰ ናአይ ሀይቅስ።20እያ ቃማ ደንዳዳ፥ ታኒ፥ ነ አይልያ ስክዳሽን፥ ታ ናኣ ታ ምየፐ ኤካዳ፥ ባ ክኦን ዎዳ፥ ባ ሀይቅዳ ናኣ ታ ክኦን ዎሱ።21ዎንታ ታኒ ታ ናኣ ንናዉ ደንድያ ዎደ፥ ሄኮ ሀይቅስ። ሽን ታኒ ዎንታ ፖኦን ትሽ ኦዳ ፄልያ ዎደ፥ ሄኮ፥ ታ ናኣ ግደና” ያጋሱ።22ሀንኮ ማጫስያ፥ “አካይ፥ ፓፃ ደኤይስ ታ ናኣ፤ ሀይቅዳይስ ነ ናኣ” ያጋሱ። ሽን ኮይሮ ማጫስያ ዛራዳ፥ “አካይ፥ ሀይቅዳይስ ነ ናኣ፤ ፓፃ ደኤይስ ታ ናኣ” ያጋሱ። ሄሳዳ ግድ ኤንቲ ካዋ ስንን ፓላምዶሶና።23ካዎይ ሶሎሞነይ፥ “ሀ ማጫስያ፥ ‘ፓፃ ደእያ ናአይ ታይሳ፤ ሀይቅዳይስ ነይሳ’ ያጋዉሱ፤ ሀንክያካ፥ ‘አካይ፥ ነ ናአይ ሀይቅዳይሳ፤ ታ ናአይ ፓፃ ደኤይሳ’ ያጋዉሱ” ያግስ።24ካዎይ፥ “ታዉ ማሻ ኤክድ ዪተ” ያግን፥ ኤንቲ እያዉ ማሻ ኤህዶሶና።25ካዎይ፥ “ፓፃ ደእያ ናኣ ናምኡ ከስድ ቃንፅድ፤ እስ ባጋ ሀንስ እምተ፤ እስ ባጋ ህንስ እምተ” ያግስ።26ፓፃ ደእያ ናአይ እባ ግድዳ ማጫስያ ባ ናኣስ ምሸታዳ፥ “ታ ጎዳዉ፥ ፓፃ ደእያ ናኣ እዉ እማ! እያ ዎፓ” ያጋሱ። ሽን ሀንክያ፥ “ታዉካ ነዉካ ግዶፖ፤ ናምኡ ከይድ ቃንፀቶ” ያጋሱ።27ካዎይ፥ “ናኣ ዎፕተ፤ ሀ ፓፃ ደእያ ናኣ ሀ ኮይሮ ማጫሴስ እምተ፤ ናኣ አይያ እዮ” ያግድ ፕርድስ።28እስራኤለ አሳ ኡባይ ካዎይ ፕርድዳ ፕርዳ ስእዳ ዎደ፥ ኤንቲ ካዋ ዳሮ ቦንችዶሶና። አሳስ ፅሎተን ፕርዳናዉ እያዉ ጭንጫተ ፆሳፈ እመትዳይሳ በእዶሶና።