ናቡተ ዎይነ ጋድያ
1ሳማረ ካዋ አካባ ጋ ማታን ናቡተስ እዝራኤለን ዎይነ ጋደይ ደኤስ።2አካብ ናቡተኮ፥ “ታ ጋዋ ማታን ደእያ ግሾ፥ ታ አታክልተ ቶክያ በሲ ኦናዉ ነ ዎይነ ጋድያ ታዉ እማ። እያ ግሾ ነዉ ታ ሀራ ሎኦ ዎይነ ጋደ እማና፤ ዎይኮ ነ ዶስኮ እያ ጋትያ ታ ነዉ ቃንፃና” ያግስ።3ናቡተይ ዛሪድ፥ “ታኒ ታ አዋታፐ ላትዳ ጋደ ነዉ እሚስያባፐ ጎዳይ ታና አሾ” ያግስ።4እዝራኤለ አደይ ናቡተይ፥ “ታኒ ታ አዋታፐ ላትዳ ጋደ ነዉ እምከ” ግዳ ግሾ፥ አካብ ይሎትሸነ አዛንሸ ባ ሶ ብድ፥ ጎዳኮ ስም ዝንእድ፥ ካካ ሞና እፅስ።5እያ ማችያ ኤልዛቤላ እያኮ ገላዳ፥ “ነና ሀይሳዳ ይሎይዳይ አይቤ? አይስ ካ ሞና እፃይ?” ያጋዳ ኦይቻሱ።6አካብ፥ “እዝራኤለ አደይ ናቡተይ፥ ‘ነ ዎይነ ጋድያ ታዉ ባይዛ ዎይኮ ነ ዶስኮ እያ ግሾ ታ ነዉ ሀራ ዎይነ ጋደ እማና’ ያግን፥ እ፥ ‘ታ ዎይነ ጋድያ ነዉ እምከ’ ያግን፥ ታ ሄሳ ግሾ ይሎትስ” ያግስ።7ኤልዛቤላ፥ “ነ እስራኤለ ቦላ ካዎ ግዳ ኡታዳ ሀይሳዳ ሀናይ? ደንዳዳ ማ! ዎዛናፐ ኡፋይታ! እዝራኤለ አድያ ናቡተ ዎይነ ጋድያ ታኒ ነዉ እምሳና” ያጋሱ።8ሄሳ ግሾ፥ እያ አካባ ሱንን ዳብዳበ ፃፋዳ፥ እያ ቦላ ማታመ ዎሱ። ናቡተራ እስፈ ካታማን ደእያ ጭማታስነ ግታ አሳታስ ኪታሱ።9ዳብዳበ ሀይሳዳ ያጋዳ ፃፋሱ፤ “እስ ጋላስ ፆማ አዋጅተ፤ አሳ እስፈ ሺሽተ፤ ናቡተ ቦንቾ በሳን ኡትስተ።10ናቡተይ፥ ‘ፆሳነ ካዋ ጫይስ’ ያግድ ማርካትያ ናምኡ ማርካታ ሺሽድ፥ ማርካታናዳ ኦተ። ሄሳፈ ጉየ፥ ካታማፐ ጋፃ ከስድ፥ ሹቻን ጫድድ ዎተ” ያጋዳ ፃፋሱ።11ሄሳ ግሾ፥ ናቡተራ እስፈ ካታማን ደእያ ጭማትነ ግታ አሳት ኤልዛቤላ ኤንታዉ ፃፍዳ ዳብዳብያን ግዳይሳዳ ኦዶሶና።12ኤንቲ ፆማ አዋጅድ፥ ናቡተ አሳ ግዶን ቦንቾ በሳን ኡትስዶሶና።13ናምኡ ዎርዶ ማርካት ይድ፥ እያኮ ስም ኡትድ፥ አሳ ስንን፥ “ናቡተይ ፆሳነ ካዋ ጫይስ” ያግድ ዎርዶ ማርካትዶሶና። ናቡተ ካታማፐ ጋፃ ከስድ፥ ሹቻን ጫድድ ዎዶሶና።14ጭማት ኤልዛቤልኮ፥ “ናቡተይ ሹቻን ጫደትድ ሀይቅስ” ያግድ ኪትዶሶና።15ናቡተይ ሹቻን ጫደትድ ሀይቅዳይሳ ኤልዛቤላ ስእዳ ዎደ፥ “እዝራኤለ አድያ ናቡተይ ነዉ ሚሸን ባይዛናዉ እፅዳ ዎይነ ጋድያ ባዳ ኤካ። እ ሀእ ሀይቅስ” ያጋሱ።16እዝራኤለ አደይ ናቡተይ ሀይቅዳይሳ አካብ ስእድ፥ ናቡተ ዎይነ ጋድያ ባዉ ኤካናዉ ደንድድ ብስ።17ሄሳፈ ጉየ፥ ተስባ አድያ ኤልያሳኮ ጎዳ ቃላይ ይድ፥18“ሳማረን ካዎትዳ እስራኤለ ካዋ አካባራ ጋሄታናዉ ባ። ሄኮ፥ እ ናቡተ ዎይነ ጋድያ ኤካናዉ ብድ፥ ያን ደኤስ።19ጎዳይ ሀይሳዳ ያጌስ ጋዳ እያዉ ኦዳ፤ ‘አድያ ዎዳ እያ ጋድያ ነዉ ኤካዳሳ ግድኪ?’ ያጋ። ቃስ ጎዳይ፥ ‘ናቡተ ሱ ካናት ላጭዳ በሳን ነ ሱካ ካናት ላጫና’ ” ያግስ።20አካብ ኤልያሳ በእዳ ዎደ፥ “ታ ሞርክያዉ፥ ታና ደማዲ?” ያግስ። ኤልያስ፥ “ኤ፥ ነና ደማስ። ኔኒ ጎዳ ስንን ኢታባ ኦናዉ ነና ናጋራስ ባይዛዳሳ።21ጎዳይ ኔኮ ሀይሳዳ ያጌስ፤ ‘ሄኮ፥ ታኒ ነ ቦላ ኢታባ ኤሀና። ታኒ ነ ኮቻታ ይሳና፤ ታኒ እስራኤለ ቢታን አካባ ሶ አሳፐ አይለ ግድን ዎማኖ ግድን፥ እስ አደይ አቶና ይሳና።22ኔኒ እስራኤለ አሳ ናጋራ ኦስሳዳ ታና ሀንቀዳ ግሾ፥ ታ ነ ሶ አሳ ናባፃ ናኣ እዮርባማ ሶ አሳዳነ አክያ ናኣ ባኦሳ ሶ አሳዳ ኦና።’23ቃስ ጎዳይ ኤልዛቤልባ ኦድሸ፥ ‘እዝራኤለ ካታማ ግምበ ድርሳ ላንቀን ካናት ኤልዛቤሎ ማና’ ያጌስ።24አካባ ኮቸ ግድድ ካታማን ሀይቅያ ኦናካ ካን ማና፤ ጋፃርያን ሀይቅያ ኦናካ ሳሎ ካፎት ማና” ያግስ።25ባ ማችያ ኤልዛቤላ ደንን፥ ጎዳ ስንን ኢታባ ኦናዉ ባና ናጋራስ ባይዝዳ አካባ መላ አስ ባዋ።26አካብ፥ ጎዳይ እስራኤለ አሳ ስንፈ ጎድድ ከስዳ አሞረታ ኤቃ ጎይንድ ዳሮ እፀትዳባ ሀንስ።27አካብ ሄሳ ስእዳ ዎደ ባ ማኡዋ ዳክድ፥ ካዮ ማኦ ማእድ ፆምስ። ካዮ ማኦ ማእድ ስኬስ፤ አዛንሸ ሄመቴስ።28ሄሳፈ ጉየ ጎዳ ቃላይ ተስባ አድያ ኤልያሳኮ ይድ፥29“አካብ ባና ታ ስንን ዋትድ ካዉሽዳኮ በአዲ? እ ታ ስንን ባና ካዉሽዳ ግሾ፥ ታኒ ዩዋ እያ ዎደ ኤህከ። ሽን ታኒ እያ ናኣ ዎደን እያ ሶ አሳ ቦላ ሀ ዩዋ ኤሀና” ያግስ።