ሳባ ካውዉ
1ሳባ ካውያ ጎዳይ ሶሎሞነስ ቆንጭስዳ ማላልስያ ጭንጫተ ዎርያ ስአዳ፥ ዴፆ ኦይሻታ ኤካዳ እያ ፓጫናዉ ባሱ።2ሳዉዋ፥ ዳሮ ዎርቃነ አልኦ ሹቹ ጫንዳ ዳሮ ግማለ ጩጋራ ዳሮ አጃባን የሩሳላመ ጋካዳ ሶሎሞነ ስን ሺቃሱ። ባ ዎዛናን ደእያ ኡባ ሶሎሞነ ኦይቻሱ።3ሶሎሞነይ እያ ኦይችዳባ ኡባ ዛርስ፤ እዉ ብርሾናሽን፥ እያፐ ጌምድ አትዳባይ አይብካ ባዋ።4ሳባ ካውያ ሶሎሞነ ጭንጫተ፥ እ ኬፅዳ ካዎ ጋዋ፥5እያ ጋይታን ሺቅያ ካ፥ እያ ሞርናት ኡትያ ኡተ፥ እያ አይለት ኦያ ኦሱዋ፥ ኤንቲ ማእያ ማኡዋ፥ ኤስ ዱቀይሳታነ ፆሳ ኬን ሺሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።6እያ፥ ካዋ ሶሎሞነኮ፥ “ነባነ ነ ጭንጫባ ታኒ ታ ቢታን ደአሸ ስእዳይስ ቱማ።7ሽን ታኒ ያዳ፥ ታ አይፈን በአና ጋካናዉ ኤንቲ ታዉ ኦድዳባ አማናብከ። ሄኮ፥ አሳይ ታዉ ኦድዳይስ ባጋ ጋከና፤ ነ ጭንጫተይነ ነ ዱረተይ ታኒ ስእዳይሳፈ ዳሮ አስ።8ኡባ ዎደ ነ ስንን ኤቅድ፥ ነ ጭንጫተ ስእያ ነ አሳትነ ነ ሞርናት አይ መላ ቃዳራ ደእያ አሰ!9ነናን ኡፋይትድ፥ ነና እስራኤለ ካዎተ አራታን ኡትስዳ ጎዳይ ነ ፆሳይ ጋላተቶ! ጎዳይ እስራኤለ አሳ መርናዉ ሲቅዳ ግሾ ኔኒ ሱረ ፕርዳነ ፅሎተ ኦና መላ እ ነና ካዎስ” ያጋሱ።10ሳባ ካውያ 4,000 ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ። ሳባ ካውያ ካዋ ሶሎሞነስ እምዳይሳ መላ ዳሮ ሳዎ ሄሳፈ ስምን ኦንካ ኤህቤና።11(ካዋ ክራማ ማርካበት፥ ኦፍራፐ ዎርቃ ኤህዳይሳት ያፐ ዳሮ ሳንዳለ ምነ አልኦ ሹቹ ኤህዶሶና።12ካዎይ ሶሎሞነይ ሄ ሳንዳለፐ ፆሳ ኬነ ካዎ ጋ ቱቀታ፥ ዛማረታስ ዲነ ማስንቆ ኦስስስ። ሄሳ መላ ሳንዳለይ ሄ ዎደፐ ስምን ይድ ኤረና፤ በንት ኤረና።)13ካዎይ ሶሎሞነይ እማናዉ በሲያ እሞታታፐ ሀራ፥ ሳባ ካውያ አሞታዳ እያ ኦይችዳባ ኡባ እዉ እሚስ። ሄሳፈ ጉየ፥ ሳባ ካውያ ባ አጃባራ ደንዳዳ ባ ቢታ ስማሱ።ሶሎሞነ ቦንቹዋ
14ሶሎሞነይ ላይን ላይን ኤክያ ዎርቃይ 23,000 ክሎ ግራመ።15ሄስ ዛልአንቾታፐ ኤክያ ቃራፃ፥ አራበ ካዎታፐነ እስራኤለ ቢታን ሃረይሳታፐ ኤክያ ጊራ ጉጀና።16ሶሎሞነይ ናምኡ ፄቱ ግታ ጎንዳለታ ዎርቃፈ ቆፅድ ኦስስስ። እስ እስ ጎንዳልያን ኡሱፑን ክሎ ግራመ ግድያ ዎርቀይ ገልስ።17ቃስ ሄ ፄቱ ጉ ጎንዳለታ ዎርቃፈ ቆፅድ ኦስስስ። እስ እስ ጉ ጎንዳልያን ናምኡ ክሎ ግራመ ግድያ ዎርቀይ ገልስ። ካዎይ ሄ ጎንዳለታ “ልባኖሰ ዎራ” ጌተትያ ባ ካዎ ጋን ዎስ።18ቃስ ካዎይ እስ ግታ አራታ ዳንጋርሳ ዛለፐ ኦስስድ ጌሻ ዎርቃን ላንፅስስ።19አራታይ ደእያ በሳ ፑደ ከያናዉ የያ ኡሱፑን ደት ደኦሶና። ሄ አራታስ ጉየ ባጋራ ሁጵያ ቦላ ገርቶይ ደኤስ። አራታስ ናምኡ ባጋራ ቀሰ ዘምፕስያ በሳት ደኦሶና፤ ሄ ናምኡ በሳታ ምየን ኤቅዳ እስ እስ ጋሞ ምስለይ ደኤስ።20ሄ አራታ ቦላ ከይያ ኡሱፑን ደታስ ያ ባጋራነ ሀ ባጋራ እስ እስ ጋሞ ምስለይ፥ ኩመ ታማነ ናምኡ ምስለት ደኦሶና። ሄሳ መላ አራት ሀራ ካዎተን አዉንካ ኦሰትቤና።21ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ “ልባኖሰ ዎራ” ጌተትያ ካዎ ጋን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብራስ ጎእ ባይና ግሾ ብራፐ ኦሰትዳባይ ባዋ።22ካዋ ክራማ ማርካበታራ ዛልእያ ግታ ማርካበት አባን ደኦሶና። ሄ ማርካበት ዎርቃ፥ ብራ፥ ዳንጋርሳ ዛለ፥ ገለሾ፥ ቃረነ አያና ካፎ ጫንድ ሄ ላይፈ እስ ቶሆ ስሞሶና።23ካዎይ ሶሎሞነይ ዱረተንነ ጭንጫተን ሳአን ደእያ ካዎታ ኡባፈ አስ።24ሳአን ደእያ አስ ኡባይ እያኮ ያናዉነ ፆሳይ እያ ዎዛናን ዎዳ ጭንጫተ ስአናዉ ኮዬስ።25ላይን ላይን ያ ኡባይ እያዉ ዎርቃ፥ ብራ፥ ማኦ፥ ኦላ ሚሸ፥ ሳዎ፥ ፓራነ ባቁሎ እሞታ ኤክድ ዮሶና።26ሶሎሞነይ ፓራ ጋረታነ ፓራታ ሺሽስ፤ እያዉ 1,400 ፓራ ጋረትነ 12,000 ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎስ።27ካዎይ የሩሳላመን ብር ሹቻዳ፥ ዝግ ዙማ ፃጶን ድጭያ ቦባዳ ዳራናዳ ኦስ።28ሶሎሞነ ፓራት ግብፀፈነ ቃወ ቢታፈ ዮሶና። ካዋ ዛልአንቾት ኤንታ ቃወፐ ሻምድ ኤሆሶና።29ኤንቲ እስ እስ ፓራ ጋረ ኡሱፑን ፄቱ ብራ ሳንትመን፥ እስ እስ ፓራ ፄታነ እሻታሙ ብራ ሳንትመን ግብፀፈ ሻምድ ኤሆሶና። ኤንቲ ህተታ ካዎታስነ ሶረ ካዎታስ ባይዞሶና።