1Ɓo' nu kos ne a Yeesu, a yi Kiristaani ɗah, ɓoyeem, a kuɓu Kooh, te ɓo' nu waaɗ Baabi, yi na rime ɗah, a waaɗiɗ ɓi rimkoh nga ɗe.2Ŋ inii ɓoo inhiɗ ne ɓoo waaɗiɗ kuɓuuciŋ Kooh : Ɓoo waaɗiɗ ɓa ne ɓoo waaɗ Kooh te ɓoo taambiɗ nakoh ciŋ ɗe ɗah.3Laam waaɗ Kooh weɗ ne ɓoo taambiɗ nakoh ciŋ ɗe. Te nakoh ciŋ ɗe ɓitɗi,4laam ɓo' nu rimkoh ŋ Kooh ɗah, a miniɗ saah Adina ; te ini saah Adina, weɗ kosi ɓoo kos.5Ya ɓa a yi min Adina ɗal yi kos ne Yeesu a Kuɓkiŋ Kooh ?6Yeesu Kiristaa yeem, a yi hay taamboh ŋ masuɓ na ñif ne a muciɗ ɓoo ; a taamboh ŋ masuɓ dong haa, waaye ŋ masuɓ na ñif ; te a Fuuɗsi Hoolohngaani na seede'ee wa, laam Fuuɗsi a yi keeh ki.7Seede kaahay raakiɗ :8Fuuɗsi na masmi na ñif mi, te ca kaahay jen ca huniɗ.9Ɓo' seede ɗah, a na kosse kosu ; waaye seedeeniŋ Kooh weɗ uupiɗ hatil, te wii weɗ seedeeniŋ Kooh : A seede'iɗ Kuɓkiŋ ɗe.10Yaa nu kos Kuɓkiŋ Kooh ɗah, a raak seedeeneem ŋ ɗooƴ ce ; yaa nu kosɗi seedeeniŋ Kooh ɗah, a amb Kooh findi leyoh, a kosɗi seedeeni Kooh seede Kuɓkiŋ ɗe.11Seedeeneem weɗ ne Kooh eɗiɗ ɓoo kipes ki reehanɗi te kipes keem weɗi ŋ Kuɓkiŋ ɗe.12Yi raak Kuɓki a yi raak kipes ki ; yaa nu raakɗi Kuɓkiŋ Kooh ɗah, raakɗi kipes.13Ŋ fiis ɗu in ceem ne ɗu inah ne ɗu raakiɗ kipes ki reehanɗi, ɗu ɓi kos Kuɓkiŋ Kooh.14Oolki ɓoo raak nga ɗe, weɗ ne in nu ɓoo kiim te wa hun na waaɗ-waaɗiŋ ɗe ɗah, a kerah ɓoo.15Te ɓoo inah ne a yii kerah ɓoo ŋ in nu ɓoo kiim ɗe ɗah, ɓoo namiɗ inah ne ɓoo rahsiɗ in ci ɓoo kiim.
Kiimɗaat kosiɗ ci na bakaaɗe
16Ɓo' hot yino ŋ ɓaah ciŋ ɓoo kosiɗ ci bakaaɗee, bakaaɗi ɓekɗi ɗe kakaan ɗah, a kiimɗaat ɗe Kooh, a onu kipes ; a hey wa one ɓi bakaaɗɗi bakaaɗi ɓek ɓa kakaan. Waaye raakiɗ bakaaɗi na ɓekohe kakaan. Ineem tahɗi so nakoh kiim Kooh.17In yurhaaɗi nu nik ɗah, wa bakaaɗ, waaye raakiɗ bakaaɗ ci ɓekɗi ɓo' kakaan.18Ɓoo inhiɗ ne yaa nu rimkoh ŋ Kooh ɗah, a na bakaaɗeeɗi. A Kuɓkiŋ Kooh na niiɗee ɗe, Seytaani minɗi ɗe laal.19Ɓoo inhiɗ ne ɓoo ɓooɓiŋ Kooh te Adina jen wa ɗii ŋ yaah Seytaani.20Te ɓoo namiɗ inah ne Kuɓkiŋ Kooh hayiɗ, te a eɗiɗ ɓoo ñaañ ne ɓoo inhisoh Kooh, Keeh-keehi ; te ɓoo ɓii ngaŋ Kooh, Keeh-keehi, ngaŋ Kuɓkiŋ ɗe Yeesu Kiristaa. Yeem, a Koohi keeh-keehi, kipes ki po faw.21Komaakciŋ ngo, wortukaat kooh ci nikɗi keeh.