Abiveni Kauta Kanobata Ena Koakoa Ulata Sia De'ula.
1Kau ka Iesu eabivenia ia 'eva Keliso kauna kanaua 'eva Dilava nakuna, Kamana elalo'au venia kauna 'eva ia enai epulu melona vaka elalo'au venita.2Dilava kalalo'au venia mai ena talavatu luvata kadada'a vaita koanai, ekaikabasi komolo ita 'eva Dilava nakuna kalalo'au venita.3Ita Dilava kalalo'au venia 'eva ena talavatu luvata ekada'a vaita. Maivaka ena talavatu luvata 'eva sia depasisi ita kevatai.4'Olana Dilava nakuna boutai 'eva kanobata siavuna deva'ekoasia. Ita Dilava kabivenia, koakoa kanania'i kanobata ena siavu kava'ekoasia.5Kanaua 'ounai kanobata siavuna deva'ekoasia kauta kataua mo sibota deabiveni Iesu 'eva Dilava Nakuna.
Dilava Eta'u Nakuna Valina Ekava.
6Iesu Keliso 'eva veiai mai lalai easi, veiai eidi'u kabukabu mai au ido'o valaukuna akanai eba. Ia 'eva sia veiai mo easi, ia veiai mai lalai easi. Idume Kabukabuna vaka eluva asi, 'olana Idume Kabukabuna 'eva Dilava ena luva umauna.7Kanaua 'ounai kakoina 'eva Iesu devamomo'aia:8Idume Kabukabuna, vei, mai lala, kakoina eta luva 'eva ka'onamo, Iesu 'eva Dilava Nakuna.9Ita kau deluva asi luvata eka abitadae, beia Dilava eluva asi luvana 'eva namavaikana 'olana ia 'eva Dilava, eluva asi vaia luvana 'eva ia Nakuna valina.10Kau ka Dilava Nakuna eabivenia kauna 'eva eluva asi vaia luvana kanania ia nuanai emimia. Dilava sia eabivenia kauna 'eva Dilava dede kaunai evaoa, 'olana kau kanaua 'eva Dilava Nakuna enai eluvaia luvana kanaua sia eabivenia.11Dilava eluva asi vaia luvana 'eva kanania: Dilava 'eva mauli keinikeini evenita, inoku mauli kanania 'eva ia Nakuna enai emimia.12Dilava Nakuna eabia dae kauna 'eva mauli 'ani eabia, ia Dilava Nakuna sia eabia dae kauna 'eva mauli sia eabia.
Mauli Keinikeini.
13Dilava Nakuna vana oi oabivenia kaumui malele kanania alele venimui, 'olana oi boikabasi mauli keinikeini 'eva 'ani oi oabia.14Ita 'eva vakula'ila kanania kabia Dilava vailanai, ita ia ena ula vitaitanai dava ka ekanoia koanai leleta e'ika.15Ita ekaikabasi Dilava enai dava dava kanoinoi vaita 'eva leleta e'ika koanai, ekaikabasi komolo kanoinoi vai davata 'eva 'ani eka abita.16Kau ka bo'akalana enai si'avana kanaua sia eba davana eikala koanai akanai bemeamea, inoku Dilava betata'u bo'akalana kanaua mauli bevenia. Lau kau kataua eta si'avana sia bevuata beda'a ba 'abuna kauta luvata aluluva. Beia kau vaida si'avana ka devavaia kanaua betata'u bevuata beda'a ba 'abuna. Lau si'avana kanaua akanai bameamea davana lovana sia akua.17Va'eva vavai boutai 'eva si'avana, beia si'avana vaida 'eva sia devuata deda'a ba keinikeini 'abuna.18Ita kaikabasi Dilava nakunai de'ao kauta 'eva si'avana sia devavai basibasi. Dilava Nakuna e'imata kave'i, kau si'avana vaika ia sia beabita kovo.19Kaikabasi ita 'eva Dilava nakuna, ia kanobata itoina 'eva kau si'avana vaika ena siavu laloanai.20Maivaka ita kaikabasi Dilava Nakuna easi 'eva nuata eva'ailalala, kanaua'i ita Dilava umauna ekaikabasia, mai ita 'eva Dilava umauna nuanai mai Nakuna Iesu Keliso nuanai kamimia. Iesu Keliso 'eva Dilava umauna maivaka ia 'eva mauli keinikeini Dilavana.21Naku'u ma'adi e, dede dilavata kevatai oi bo'imamui kave'i mai kevatai oi boda'a tau.