1Bwiꞌ goꞌ plopa bro toz mkeꞌ lazoꞌ Xud naꞌ Dios naꞌ, sa naya ndolenꞌ xinꞌ Dios; jwanꞌ nasa re xaꞌ naꞌndlid lazonꞌ Dios nayolod xaꞌ naꞌ, tak nambyolod xaꞌ Dios.2Wes na, ptanꞌ na, naya nakla naꞌ xinꞌ Dios, nde tenye tera loꞌ cho kwan ak naꞌ yoloba, mnela naꞌ senꞌ lo ryoꞌto Jesucrist, ak naꞌ xaxa nak Xaꞌ, tak xata nya Xaꞌ ta winꞌ Xaꞌ.3Nde re men jwanꞌ ngembed jwanꞌ reꞌ, lega xaꞌ nkwanꞌ xaꞌ nambi tyo xaꞌ lo Dios, ta xa nambi nak Jesucrist.4Reta men ndli jwanꞌ narax, nanxobyekta xaꞌ ley chanꞌ Dios, tak reta jwanꞌ narax ngiꞌsa ley chanꞌ Dios.5Nde mne goꞌ, leꞌ Jesús mbyed kib reta xken naꞌ, nde naꞌnchapta Xaꞌ nek tib yalke.6Reta men jwanꞌ thiblaꞌ ndono Jesús, nandlid men jwanꞌ narax, leꞌ reta xaꞌ ndli jwanꞌ narax, tera yen xaꞌ cho nak Jesús, neka nzolo xaꞌ Jesús.7Xinꞌ bix na, naꞌtaꞌda goꞌ diꞌs kwinꞌno xaꞌ goꞌ, tak xaꞌ ndli jwanꞌ galꞌ, galꞌ nak xaꞌ, xaxa galꞌ nak Jesús.8Tak xaꞌ ndli jwanꞌ narax, xinꞌ maxuꞌ nak xaꞌ, tak maxuꞌ ndli jwanꞌ narax xata mdobte mdoxkwaꞌ izyo. Jwanꞌ nasa mbyed Xinꞌ Dios, mbyed sil Xaꞌ reta jwanꞌ ndli maxuꞌ.9Reta men jwanꞌ nak xinꞌ Dios, nandlid men jwanꞌ narax, tak leꞌ yalnaban chanꞌ Dios nzo bina lenꞌ lazoꞌ men nde naꞌnyeda li men jwanꞌ narax tak leꞌ men nak xinꞌ Dios.10Jwanꞌ reꞌ ndloꞌ xanya men nak xinꞌ Dios nde xanya men nak xinꞌ maxuꞌ, re xaꞌ jwanꞌ nandlid jwanꞌ galꞌ nde ngiꞌno xaꞌ ta men xaꞌ, xaꞌ ya naꞌnakta xinꞌ Dios.11Tak diꞌs reꞌ nak jwanꞌ mbin ner goꞌ: Ndablo keꞌ lazonꞌ ta men naꞌ.12Naꞌlid naꞌ xa mbli Caín, xaꞌ ngok xinꞌ maxuꞌ mbij xaꞌ wes xaꞌ. ¿Nde kwan nak yalke mbij xaꞌ wes xaꞌ? Tak re jwanꞌ mbli xaꞌ naka jwanꞌ narax, nde leꞌ jwanꞌ mbli wes xaꞌ naka jwanꞌ galꞌ.13Wes na, ptanꞌ na, naꞌyoyenta goꞌ tez re men jwanꞌ nandlid lazonꞌ Dios, ngiꞌno xaꞌ goꞌ.14Leꞌ naꞌ mnenꞌ, mbronꞌ lo yalguj nde mblanꞌ lo yalnaban, tak nkeꞌ lazonꞌ re ta men naꞌ, leꞌ xaꞌ naꞌnkeꞌd lazonꞌ ta men naꞌ, tata benꞌ nzo xaꞌ lo yalguj.15Tak re xaꞌ ngiꞌno ta men naꞌ, nak xaꞌ, xaꞌ guj men. Nde mnela goꞌ nek tib xaꞌ guj men naꞌndonod xaꞌ yalnaban adiꞌ.16Lo ta mdayaꞌ Jesús yalnaban chanꞌ Xaꞌ por naꞌ, tamod sa mbyolonꞌ yalkeꞌ lazoꞌ, nde taga naꞌ, ndablo tayanꞌ yalnaban chanꞌ naꞌ por reta ta men naꞌ.17Tez cho xaꞌ nkeno bro jwanꞌ lo izyo reꞌ nde ngwiꞌ xaꞌ ti ta men xaꞌ ndyak yalti, nde naꞌndlata lazoꞌ xaꞌ men ya, ¿xamod keno xaꞌ ya yalkeꞌ lazoꞌ chanꞌ Dios lenꞌ lazoꞌ xaꞌ sa?18Xinꞌ bix na, leꞌ yalkeꞌ lazoꞌ men naꞌakte benꞌta diꞌs, nekla benꞌta tyoba ro men, ndablo li mena nde lipa aka.19Cheꞌ, sa ncholonꞌ ndonꞌ lo jwanꞌ li,nde yo ne lazonꞌ lo Dios,20nde tez lazonꞌ mbeza lonꞌ nchap naꞌ yalke, cho leꞌa Dios, mas naro nak Xaꞌ lo lazonꞌ, nde mne Xaꞌ reta jwanꞌ.21Wes na, ptanꞌ na, tez lazonꞌ ndenꞌ na galꞌ ndonꞌ, zyasa dib laꞌs ndonꞌ lo Dios.22Nde choja jwanꞌ nyaꞌb naꞌ lo Xaꞌ, taꞌ Xaꞌy, tak nxobyek naꞌ yalnyebeꞌ chanꞌ Xaꞌ nde ndlinꞌ re jwanꞌ ndryoꞌ lazoꞌ Xaꞌ.23Nde jwanꞌ reꞌ nak yalnyebeꞌ chanꞌ Dios: Ndablo thiptane li lazonꞌ le Jesucrist Xinꞌ Dios nde keꞌ lazonꞌ ta men naꞌ, xata mnabeꞌ Xaꞌ lonꞌ.24Nde leꞌ men ndli jwanꞌ nyebeꞌ Dios, tiblaꞌ ndono men Dios nde tiblaꞌ ndono Dios men. Nde mnenꞌ leꞌ Dios tiblaꞌ ndono Xaꞌ naꞌ tak mdaꞌ Xaꞌ Mbi Nayon chanꞌ Xaꞌ lonꞌ.