Read 1 UJohane 2

1 UJohane2nde_bib

¹Bantwabami abathandekayo, ngililobela incwadi le ukuze lingenzi izono. Kodwa nxa umuntu enze isono, silaye osimelayo kuBaba esivikela yena uJesu Khristu oLungileyo.²Ungumhlatshelo wenhlawulo yezono zethu, kungasizono zethu kuphela kodwa lezono zomhlaba wonke.

Uthando Lenzondo Yabazalwane

³Siba leqiniso ukuthi siyamazi nxa silalela imilayo yakhe.⁴Umuntu othi, “Ngiyamazi,” kodwa angagcini imilayo yakhe uqamba amanga, leqiniso kalalo.⁵Kodwa nxa umuntu elalela ilizwi lakhe, uthando lukaNkulunkulu luyapheleliswa sibili kuye. Yikho esikwazi ngakho ukuthi sikuye:⁶Lowo othi uhlala kuye kumele aphile njengokwenziwa nguJesu.⁷Bangane abathandekayo, kangililobeli umlayo omutsha, kodwa omdala, elalilawo kusukela ekuqaleni. Umlayo lo omdala uyilizwi elalizwayo.⁸Ikanti ngililobela umlayo omutsha; iqiniso lawo libonakala kuye lakini, ngoba ubumnyama buyedlula lokukhanya kweqiniso sekukhanya.⁹Lowo othi usekukhanyeni kodwa ezonda umzalwane wakhe ulokhu esebumnyameni.¹⁰Othanda umzalwane wakhe uhlala ekukhanyeni njalo akulalutho kuye olungamenza akhubeke.¹¹Kodwa lowo ozonda umzalwane wakhe usebumnyameni njalo uyazula ebumnyameni. Kakwazi lapho aya khona ngoba ubumnyama sebumenze waba yisiphofu.

Izizatho Zokuloba

¹²Ngiyalilobela bantwana abathandekayo,ngoba izono zenu zithethelelwe ngenxa yebizo lakhe.¹³Ngiyalilobela bobaba,ngoba selimazi yena okhona kusukela ekuqaleni.Ngiyalilobela majaha,ngoba limnqobile omubi.

¹⁴Ngiyalilobela, bantwana abathandekayo,ngoba liyamazi uBaba.Ngiyalilobela bobaba,ngoba selimazi yena okhona kusukela ekuqaleni.Ngiyalilobela majaha,ngoba lilamandlalelizwi likaNkulunkulu lihlala kini,njalo limnqobile omubi.

Lingawuthandi Umhlaba

¹⁵Lingawuthandi umhlaba loba olunye ulutho olusemhlabeni. Nxa umuntu ethanda umhlaba, uthando lukaBaba kalukho kuye.¹⁶Ngoba izinto zonke ezisemhlabeni, izinkanuko zabantu abalezono, ukulangazela kwamehlo abo kanye lokuzigqaja ngempahla akuveli kuBaba, kodwa emhlabeni.¹⁷Umhlaba lezinkanuko zawo kuyadlula, kodwa umuntu owenza intando kaNkulunkulu uphila kuze kube nininini.

Isixwayiso Ngabaphika UKhristu

¹⁸Bantwana abathandekayo, lesi yisikhathi sokucina; njalo njengoba lizwile ukuthi umphikuKhristu uyeza, lakhathesi abanengi abaphika uKhristu sebekhona. Yikho esikwazi ngakho ukuthi lesi yisikhathi sokucina.¹⁹Baphuma besuka kithi, kodwa impela babengasibo bakithi. Ngoba aluba babengabakithi, babezahlala lathi; kodwa ukusuka kwabo kwatshengisa ukuthi kakho kubo owayengowakithi.²⁰Kodwa lina ligcotshwe ngoNgcwele, njalo lonke liyalazi iqiniso.²¹Kangililobeli ngoba iqiniso kalilazi, kodwa ngoba liyalazi langenxa yokuthi akulamanga aphuma eqinisweni.²²Umqambi wamanga ngubani? Ngumuntu ophikayo ukuthi uJesu unguKhristu. Umuntu onjalo ngumphikuKhristu, uphika uYise leNdodana.²³Kakho ophika iNdodana oloYise; lowo owamukela iNdodana uloYise futhi.²⁴Bonani ukuthi lokho elakuzwayo kusukela ekuqaleni kuyahlala kini. Nxa kuhlala, lani lizahlala likhona eNdodaneni lakuYise.²⁵Njalo nanku asithembisa khona, ukuphila okulaphakade.²⁶Ngililobela ngalezizinto mayelana lalabo abazama ukulidukisa.²⁷Ukugcotshwa kwenu elakwamukela kuye, kuhlezi kukini, njalo kalisweli muntu wokulifundisa. Kodwa njengoba ukugcoba kwakhe kulifundisa izinto zonke njalo njengoba ukugcoba lokho kuqotho, akusinkohliso njengoba kulifundisile, hlalani likuye.

Abantwana BakaNkulunkulu