ሀዋረታ ማታ
1ታኒ የዳ ደእያ አስ ግድክና? ታ ሀዋረ ግድክና? ታኒ ኑ ጎዳ የሱስ ክርስቶሳ በአብክና? ህንተ ጎዳን ታ ዳቡራ አይፈ ግደከቲ?2ህንተ ጎዳባ ግድያ ግሾ፥ ታ ሀራታስ ሀዋረ ግዶና እፅኮካ፥ ህንተዉ ሀዋረ ግደይሳስ ህንተ ማርካ።3ታና ሀዋረ ግደና ገይሳታስ ታኒ እምያ ዛሮይ ሀይሳ።4ኑ ህንተፈ ማናዉነ ኡያናዉ ቱማ ኑስ ማት ባዌ?5ሀንኮ ሀዋረታዳ፥ ጎዳ እሻታዳነ ጰፅሮሳዳ፥ አማንያ ኑ ማቸታ ኤክድ ሄመታናዉ ኑስ ማት ባዌ?6ዎይኮ ኦድ አቃናዉ በሰይ ታራነ ባርናባሳ ፃላሌ?7ባ ሚሸን ዎታዳረታ ኦይ ኦኔ? ዎይኮ ዎይነ ቶክድ፥ እያፐ አይፈ ሞናይ ኦኔ? ዎይኮ ዉደ ሄምሸ፥ ሄ ዉድያፐ ማ ኡዮናይ ኦኔ?8ታኒ ሄሳ አሳ ቆፋ ጋይናዬ? ሙሰ ህገይ ሄሳ ጌነዬ?9ሙሰ ህግያን፥ “ዉዱማን ካ የያ ቦራ ዶና ቃቾፋ” ጌተትድ ፃፈትስ። ያትን ፆሳይ ሄሳ ቦራስ ቆፕድ ኦድዴ?10ፆሳይ ሄሳ ግዳይ ኑስ ቆፕድ ግደኔ? ኤ፥ ኑ ግሾሳ። ቢታ ጎየይስነ ካ ጌሸይስ ባና ጋከይሳ ኤካና ግድ ኡፋይሳን ኦናዉ በሴስ ጌተትድ ቱማ ኑ ግሾ ፃፈትስ።11ኑኒ ህንተ ግዶን አያና ዘረ ዘርዳ ግድኮ፥ አሾስ ኮሽያባ ኑ ህንተፈ ኤክኮ፥ ሄስ ግታባዬ?12ሀራት ሄሳ ህንተፈ ኤካናዉ ኤንታዉ ማት ደእኮ፥ ኑስ ኤንታፈ አያ ማት ዴኔ? ሽን ኑኒ ክርስቶሳ ዎንገላስ በ ግዶና መላ፥ ኡባባ ገንጮስፐ አትሽን፥ ሄ ማታን ጎኤትቦኮ።13ፆሳ ኬን ኦያ አሳት ባንታ ካ ፆሳ ኬፈ ኤከይሳ ኤረከቲ? ቃስ ያርሾ በሳን ኦያ አሳት ያርሹዋፈ ኤከይሳ ኤረከቲ?14ሄሳዳካ፥ ዎንገላ ማርካተይሳት ዱሳስ ኮሽያባ ዎንገላፐ ኤካና መላ ጎዳይ ኪትስ።15ሽን ታኒ ሀ ማታ ኡባን አይኮካ ጎኤታብከ። ታኒ ሄሳ ፃፍዳይ ታ ማታ ቦንችሳናዉ ኮያዳ ግደና። ኦንካ ታ ጬቁዋ ሀዳ ኦናፐ ሀይቆይ ታዉ ሎኦ።16ታኒ ዎንገላ ኦደይ ኪተትዳ ግሾሳፈ አትሽን፥ ታና ጬቅስያባ ግደና። ዎንገላ ኦዶና እፅኮ፥ ታና አየ!።17ታኒ ዎንገላ ዶሳዳ ኦድኮ፥ ታዉ ዎይቶይ ደኤስ። ሽን ታኒ ዎንገላ ዶሶና ኦድያባ ግድኮ፥ ሄሳ ፆሲ ታዉ ሀዳራ እሚስ።18ያትን፥ ታ ዎይቶይ አይቤ? ታኒ ዎንገላ ኦድያ ዎደ ታ ማታን ጎኤቶና፥ ዎንገላ ጋተይ ባይና ኦደይስ ታዉ ዎይቶ።19ታኒ ኦደስካ አይለ ግድከ፥ ሽን ዳሮታ ማዳናዉ ኡባስ አይለ ግዳስ።20ታኒ አይሁደታ ማዳናዉ ኤንታራ ኤንታ ግዳስ። ታ ሁጰን ህገፈ ጋርሳን ደእከ፥ ሽን ህገፈ ጋርሳን ደኤይሳታ ማዳናዉ ህገፈ ጋርሳን ደእያ አስ ግዳስ።21ፆሳ ህግያፈ ካረ ከዮና፥ ክርስቶሳ ህግያስ ኪተታሸ፥ ህገይ ባይናይሳታ ማዳናዉ ህገይ ባይና አሳዳ ሀናስ።22ታኒ ዳቡራንቾታ ማዳናዉ ዳቡራንቾ ግዳስ። ታኒ እሶታ እሶታ ማዳናዉ ኡባራ ኡባባ ሀናስ።23ታኒ ዎንገላ አንጁዋ ሻከታናዉ፥ ዎንገላ ግሾ፥ ሀ ኡባ ሀናስ።24ዎን ጋደትያ ኡባይ ዎፄስ፥ ሽን እሱዋ ፃላል ዎይቶ ኤከይሳ ኤረከቲ? ሄሳዳ ህንተካ ዎይቶ ኤካናዉ ዎፅተ።25ጋደትያ አሳ ኡባይ ኡባባን ባንታና ሃሬስ። ኤንቲ ሄሳ ዳቡረይ ይያ ዎይቶ ኤካናሳ። ሽን ኑኒ ዳቡረይ መርና ዎይቶ ኤካናሳ።26ሄሳ ግሾ፥ ታኒ ቆፍ ባይና አሳዳ ዎፅከ። ጫርኮ ይምፕያ አሳዳ ጮ ኩሸ የድከ።27ሽን ታኒ ሀራታስ ዎንገላ ኦድዳፐ ጉየ፥ ታኒ ታ ሁጰን የገትዳ አስ ግዶና መላ ታ አሳተ ዎልቃን ሃራዳ ታዉ ኪተታና መላ ኦይስ።