1Ɓo' nga ɗu leer na ɓaah ce ɗah, a kaañoh na gong ɓo'-Kooh ci, a nakee yurhaaɗiici ne ɓa attee ɓa ?2Wala ɗu inahɗi ne e ɓo'-Kooh ci atte'an ɓi Adina ? Nik ne e ɗu joy atte Adina ɗah, kon in hend an ƴissuut joyiɗ ɗu wooñ atte'u e ?3Ɗu inahɗi ne e ɓoo na hee atte'e sah malaakaaci e ? Ŋ woyisɗi ɗa leeroh ciŋ adinaanii !4Waaye ɗu, ɗu raakka muuƴoh findi an ɗah, ɗu na kaɗe ɓaya ɓooɓi Janguuni sikɗukɗi, ɓa atte'ee ɗu !5Ini mi na woye wii, wa kaciikiŋ ɗu. Ali wa mand na, ɓo' raakiɗ liiɓohaaɗ moɗiɗ joyiɗ raak ŋ ɗooƴ ɗu, ɓoyi min atte harmban ɓaah ci muuƴoh !6Waaye, fu hotee ɓaah kanak ngele, po ɓa ngelee sah ŋ fiki atte'oh kosaaɗi !7Ngel ŋ harmban ɗu dong, wa ngonjom keeh-keeh nga ɗu. Kon wa ye tah, muñ tooñi fu tooñu ngisohiɗɗi ɗu ? Faɗaat rokoh ci ɓa rok ɗu rek, weɗ ngisoh !8Te sah, e ɗu ŋ haf ɗu, e ɗu na tooñe, ɗu roke, te ini uup misik, ɗu na tume in ceem ɓaah ciŋ ɗu kosiɗ ci.9Ɗu inhiɗ ne yurhaaɗiici raakanɗi ɓak ŋ Nguuriŋ-Kooh. Wala ɗu inahɗi ineem ? Kinaat ñaañoh haf ciŋ ɗu. Mbalayoh ci, na ɓi na ñaamke kooh ci nikaaɗiici, na njaalo'oh ci, na ƴaar-ɓitiɓ ci,10na rok ci, na waaɗiɗ kopor ci, na laaroh ci, na yahoh tiik ci, na nguɗndukohoh ci, ɓeem, ɓa raakanɗi ɓak ŋ Nguuriŋ-Kooh.11Te ineem weɗ ɓi ɓo' nga ɗu nikohe. Waaye ɗu hoolɗuusa, ɗu tumuusa wuu Kooh, ɗu tumuusa ɓo' yurhiɗ taamboh ŋ tiikiŋ Yeesu Kiristaa Heɗi na Fuuɗsiŋ Koohiŋ ɓoo.
Yakɗaat Kooh taamboh ŋ faan ciŋ ɗu
12Raakiɗ ɓi na woye ne : « Ñam raak haf fo. Ŋ miniɗ tum in nu ŋ waaɗ tum ɗah. » Ɓo' miniɗa woo, waaye e in ci jen raakiɗ ɓo' etoh haa. Te ali nik ne ŋ miniɗ tum ini ŋ waaɗ sah, ŋ teyɗukanɗi ali in wa yilif fo.13Ɓum na name woo ne : « Kañam wa wuu rook te rook wuu kañam te ca kanak jen, Kooh hey ca sooƴɗe. » Ɓo' miniɗa woo, waaye kina liiɓ ne faan raakɗi njiriñ. Wa haɓɗuuɗi wuu mbalayoha ; faan raakiɗ njiriñ wuu Heɗi te Heɗi raakiɗ njiriñ wuu faan.14Te Kooh yi hultiɗ Heɗi, a hey ɓoo name hultiɗ ŋ hatiliŋ ɗe.15Ɗu inahɗi ne faan ciŋ ɗu, ceɗ cir ciŋ faaniŋ Kiristaani e ? Ŋ hey ɓaye cir ngaŋ faaniŋ Kiristaani ŋ tumee ca cir toonkoh e ? Muk !16Wala ɗu inahɗi inahɗi ne ɓo' nu hun na toonkoh ɗah, na nike faan yino na ɗe ? Ŋ ini kaɗ ŋ ƴaar na ɓitiɓ, Fiis ci woyiɗ ne : « Kanak ci nikan faan yino. »17Waaye ɓo' ŋoɗta ŋ Heɗi ɗah, na nike yino na ɗe ŋ liiɓohaaɗ.18Nupaat faankoh sangohuuɗ ! Raakɗi bakaaɗi ɓo' na haɓɗe po wa mannda naa, ŋ findi wa na laalohe faan. Ɓo' nu faankoh faankoh sangohuuɗ ɗah, a na bakaaɗe ŋ faaniŋ ɗe haf ce.19Ɗu inahɗi ne faan ciŋ ɗu ceɗ kahan Fuuɗsi Hoolohngaani e ? Fuuɗsi gen nga ɗu, Fuuɗsi Hoolohngaani Kooh eɗ ɗu. E ɗu raak haf ɗu haa.20Ɗu romuuɗ po candoomiŋ ɗu eɗohuuɗ. Kon yakɗaat Kooh na faan ciŋ ɗu.