1Nawe xa ina gim a ie mamaet mii iexa untaltaalnge, ngalisa ta tsap sangan unininte ta xap atii Moroaa, o ga xap laa sangan no untaltaalnge?2Gim xap atixi, we biaa no untaltaalnge di ba ininte sin xolkolmoxo? O nawe gim ba ininte sin xolkolmoxo o gim ba sen ininte we sin no xirabas dokdok?3Gim xap atii we gita no untaltaalnge gita ba ininte sin no angelo? Ma nawe aweaatia, ngalisa gim ta xap pupua ngali atutiki no maarang sin abala tino?4Biaabi gim na xap laa sangan xaa unininte biaa no muun taltaalnge. Xa ina no untaltaalnge ina xan matenaanua Moroaa naba pupua ngali lolong sin nagim no mamaet ma naa xosaraa malum labatina gim.5Iaa paatinai abala ngali amangieli gim, a xap xa labatina gim ta sinaae pupua ngali ininte sin abia xirabas labatina no untaltaalnge?6Oro iexa untaltaalnge a laa nan ininte mii iexa untaltaalnge ma di ga papaalii no muun taltaalnge di ga ininte labatina di.7Laamuaan no matan Moroaa asuk xap tutiik ngali tali iexa uk untaltaalnge laamuaan xadi xalkale ina ininte no muun taltaalnge. Naba suk axaau so ngali poroklii iexa untaltaalnge na xosaraa namaang tsaxa sin gim o na pula sin gim.8Oro gim tsaa gim apanaai ma xosaraa no namaang tsaxa sin nagim no taamat.9Gim xap atii we, biaa di ta morokon di ba xap tapkina xan Maradaan Moroaa. Gim na xap apanaai gim tsaa, biaa di ta xosaraa namaang ina exus, ma langlangaari sin no malagan, ma di ta matmatuul mii aina o taamat minaxis, no taamat in nan sal ma no taamat di ta exus mii no taamat,10no unpulapula, no angen tsaxa, no unnunun, no unaamamok, ma unaababaa, di ba xap tapkina xan maradaan Moroaa.11Ma biexaal ina gim di tii weaatia ti laamua, Oro sin iesan Orong Iesu Karisito ma Nantanuan xida Moroaa, Orong a se guraili nagim no namaang tsaxa ma ga apati ma atutiki gim.
Manglen Moroaa taman nagim pakpak
12Biexaal di paare weaatala, â Iaa pupua ngali xosaraa no maarang araraa.â Oro iaa xisi weaatala, â A xap no maarang araraa a mamainaang sin gim ngali xosaraa.â Biexaal di paare weaatala, â Iaa pupua ngali xosaraa no maarang araraa.â Oro iaa xisi weaatala, â Iaa ba xap tsap xa untutule sin abia no maarang.â13â Luxaal ngali bal ma bal ngali luxaal,â oro Moroaa naba xosor atsoti no arie. Balawaa pakpak a xap ngali xosaraa namaang tsaxa in nan sal, oro ngali Orong ma Orong ngali pakpak.14Sin xan xoror Moroaa tii atapaasi Orong xaal sin minet ma naba atapaasi gita bula.15A sen parawe, gim xap atii we nagim no pakpak, no xolkolot ina Karisito tsaa? A pupua ngali iaa na adi no xolot ina Karisito ma ina aturung todomien no, ngali tsap malen xolot ina xan pakpak aina in nan sal? Asuk xap!16A sen parawe, gim xap atii bula we, iwaa xa ta todomien ia tsaa mii aina in nan sal, delu se arie tsap pakpak axuuk. Sinsa Moroaa tii se paare, â Delulu ba se tsap pakpak axuuk mu.â17Oro iwaa xa ta todomien ia tsaa mii Orong, ia axuuk mii ia lalon nantanua.18Sol papaalii no namaang tsaxa in nan sal. Biexaa namaang tsaxa taamat ta xosaraa a tsap lokobel ina xan pakpak, oro iwaa xa ta xosaraa namaang tsaxa in nan sel, a se xosaraa namaang tsaxa sin xan pakpak tsaa.19A sen parawe, gim xap atii we biaa nagim pakpak Xan Anua Moroaa ina Nantanua Pat, iwaa lalon gim, iwaa gim ta adi sin Moroaa? Gim xap tapkina gim tsaa.20Moroaa tii uuli gim taman iliil, biaabi gim na manglen Moroaa taman nagim pakpak.