Tah hadrah ka da bau
1Jò oh daq loh yiniq ti dabau, gleq majah hùa qnoh ka mangai ùh taq atoq hadrah, ma ùh đòeq ka mangai hadròeh hadrah.2Oh daq ma ùh loq ƀòe mangai hadròeh kô èh ma hu hadrah dìq crŏng taneh qmòh?3Oh daq ma ùh qnì bèn kô èh hadrah ƀòe ƀình plình qmòh? Loq ka ƀòe yiniq qnhòng kô.4Qmang aih, jò oh daq loh bàu ka dabau tiaq ƀòe yiniq ta qnhòng kô, hagleq majah yŏc ƀòe mangai rìh ùh loh qmòe cleq enh ngèa Tagop Hadròeh broq mangai hadrah!5Au doe qmang aih doq oh daq camaih. Enh dalam ka oh daq ma ùh i ka mangai yeo rabiaq đòeq hadrah taqne oh daq bèn qmòh?6Mahaq jò oh daq loh yiniq, cadoe qnoh enh ngèa ka mangai ùh lùi!7Joq qmang aih, oh daq tah hadrah ka dabau aih khoe pi blêq. Hagleq ma ùh waq àt, aih xài yeo lem? Hagleq ùh waq da haq dôq wì hnen rađeh aih xài yi hnau!8Mahaq cla oh daq raq broq ùh troq trong, ti habo đac ka wì, khoe aih tah hadrah glòq ka oh daq.9Oh daq ma ùh qnì ƀòe mangai ùh taq atoq i ka jò leq jah diac Boc Plình?10Cla apaq qnùt rađeh: Mangai loq rùp tango, kùh waiq dua qmù, mangai taqnong ka wì, mangai gucalô waq ka hadai gucalô, mangai gucadrì waq hadai gucadrì, mangai atùng, mangai daiq plai, mangai bù bia, mangai toq hanip, mangai loq ta atam, dìq dŏng ùh maleq jah diac Boc Plình.11Nèh haq, taqne oh daq hadai i qnah ngai rìh qmang aih, mahaq canòm ka yiniq Jesus sam Yiang Hadroèh da Boc Plình bèn, oh daq khoe jah qnheo hreo, jah hadròeh, khoe jah creo mangai taq atoq.Pariaq wia ka hangai kan ùh lem
12Pì doe “Rìm yiniq au dìq jah broq”, mahaq ùh xài rìm yiniq diq i lòeq; “Au jah broq dìq rìm yiniq”, mahaq au ùh dôq yiniq cleq jah panan au.13Dahwèq acaq đòeq ka cliac, cliac đòeq ka dahwèq acaq, mahaq èh Boc Plình raliang đac dìq baiq. Mahaq chac hamac ùh xài palauq đòeq ka tango anang, mahaq đòeq ka Chuaq, èh Chuaq đòeq ka chac hamac.14Boc Plình khoe broq ka Chuaq rìh hlài, èh Haq yŏc deh cwìang aih raq đoèq broq ka bèn hadai rìh hlài.15Oh daq ma ùh qnì chac hamac bèn aih xài jènh tì da Chirst qmòh? Qmang aih bèn akhòh yŏc jènh tì da Christ đòeq taqmùt broq mòeq ti mangai broq đì ùh? Ùh jò leq!16Oh daq ma ùh qnì cabô taqmùt ti mangai broq đì, aih khoe wìa mòeq xech ti haq? Majah qmang aih khoe i bàu doe rameh: “Wa jah wìa moeq xech akia”.17Mangai leq taqmùt pajùm ti Chuaq aih èh haq jah wìaq moeq manoh yiang ti Haq.18Drah wia ka trong tango anang, yac ka wì broq yiniq lui cleq, aih dìq enh gùng ka chac hamac cla, mahaq cabô caqnìh rađeh ta kan tango anang aih i tuiq ka chac cla.19Oh daq ma ùh qnì deh ka chac hamac aih raq hnim kùh waiq da Yiang Hadròeh, Yiang qnang oe enh dalam ka oh daq, Yiang oh daq ma khoe jah enh Boc Plình? Chac oh daq pi oe xài da cla hòm?20Oh daq khoe jah baxon yŏc hlài dìq jaq canaq. Qmang aih, yŏc chac hamac oh daq đòeq dèch kan ranhòm ka Boc Plình beq.